Skip to content

Skip to table of contents

 LISAUN 8

Tanbasá Maromak husik buat aat no terus akontese?

Tanbasá Maromak husik buat aat no terus akontese?

1. Oinsá mak buat aat mosu?

Maromak fó tempu ba ema atu ukun an rasik atu hatudu katak sira la iha kbiit atu rezolve ema nia problema

Buat aat hahú bainhira Satanás koʼalia lia-bosok primeiru. Foufoun Maromak kria nia nuʼudar anju ida neʼebé perfeitu, maibé “nia la kaer metin ba lia-loos”. (João 8:44) Nia haburas hakarak atu ema adora nia maski Maromak deʼit mak merese atu simu adorasaun. Satanás bosok Eva, no book feto primeiru neʼe atu halo tuir nia duké halo tuir Maromak. Adão mós hili atu hamutuk ho Eva hodi kontra Maromak. Ninia desizaun neʼe lori terus no mate ba ema hotu.​—Lee Génesis 3:1-6, 19.

Kuandu Satanás lohi Eva atu la halo tuir Maromak, Satanás kontra hasoru Maromak nia direitu atu ukun. Ema barak halo tuir Satanás hodi la simu Maromak nuʼudar sira-nia Ukun-Naʼin. Nuneʼe Satanás sai “ukun-naʼin mundu neʼe nian”.​—Lee João 14:30; 1 João 5:19.

2. Maromak nia kriatura sira ikusmai hatudu hahalok aat, neʼe Maromak nia sala ka lae?

Lae, tanba buat hotu neʼebé Maromak kria mak perfeitu. Maromak kria anju no ema ho kbiit atu halo tuir Ninia hakarak. (Deuteronómio 32:4, 5) Maibé Maromak mós fó liberdade mai ita hodi bele hili atu halo buat neʼebé diʼak ka aat. Liberdade neʼe fó oportunidade mai ita atu hatudu domin ba Maromak.​—Lee Tiago 1:13-15; 1 João 5:3.

3. Tanbasá mak Maromak husik terus akontese toʼo agora?

Husi tempu neʼebé Adão no Eva halo sala, Jeová la hapara ema neʼebé kontra Ninia ukun. Tanbasá? Atu hatudu katak se ema koko atu ukun an rasik hodi haketak an husi Maromak, sira sei nunka hetan susesu. (Eclesiastes 7:29; 8:9)  Durante tinan 6.000, ema nia istória hatudu ho klaru katak ema nia ukun labele lori justisa, halakon funu, krime no moras.​—Lee Jeremias 10:23; Roma 9:17.

Maibé Maromak nia ukun sempre lori bensaun ba ema neʼebé hakruʼuk ba nia. (Isaias 48:17, 18) Lakleur tan, Jeová sei halakon ema nia ukun hotu. Ema neʼebé simu Maromak nia ukun deʼit mak sei hela iha mundu neʼe.​—Isaias 11:9; Lee Daniel 2:44.

Haree vídeo Tanbasá mak Maromak husik terus akontese?

4. Maromak nia pasiénsia fó oportunidade saida ba ita?

Satanás hatete katak la iha ema ida mak serbí Jeová tanba domin. Ita hakarak hatudu katak Satanás mak bosok-teen, loos ka lae? Maromak nia pasiénsia fó oportunidade ba ita hotu atu apoia Maromak nia ukun ka ema nia ukun. Liuhusi dalan neʼebé ita halaʼo moris loroloron nian, ita hatudu ukun ida-neʼebé mak ita apoia. ​—Lee Job 1:8-12; Provérbios 27:11.

5. Oinsá mak ita bele hatudu katak ita hili Maromak nuʼudar ita-nia Ukun-Naʼin?

Ita-nia desizaun hatudu katak ita hili Maromak nuʼudar ita-nia Ukun-Naʼin

Ita hili Maromak nuʼudar ita-nia Ukun-Naʼin hodi aprende no halo tuir Bíblia nia hanorin kona-ba adorasaun loos. (João 4:23) Hanesan ho Jesus, ita la simu Satanás nia ukun hodi la envolve an iha funu no buat polítiku nian.​—Lee João 17:14.

Satanás book ema atu haburas hahalok la morál neʼebé lori perigu. Kuandu ita sees husi hahalok sira-neʼe, karik ita-nia kolega no família balu sei goza ka kontra ita. (1 Pedro 4:3, 4) Tan neʼe, ita tenke halo desizaun. Ita sei ransu ho ema neʼebé hadomi Maromak ka lae? Ita sei halo tuir ninia ukun-fuan neʼebé nia fó ho domin ka lae? Se ita halo nuneʼe, ita hatudu katak Satanás mak bosok-teen tanba nia hatete ema sei la halo tuir Maromak kuandu hetan susar.​—Lee 1 Korinto 6:9, 10; 15:33.

Maromak nia domin mak hanesan garantia katak nia sei halakon buat aat no terus hotu. Ema neʼebé fiar Maromak no halo tuir nia sei hetan moris ba nafatin iha mundu.​—Lee João 3:16.