Skip to content

Skip to table of contents

 LISAUN 13

Saida mak sei akontese ba relijiaun sira?

Saida mak sei akontese ba relijiaun sira?

1. Relijiaun hotu mak diʼak ka lae?

Relijiaun hotu iha ema balu neʼebé laran-moos. Maromak haree no hanoin ema sira-neʼe. Maibé buat neʼebé halo ita triste mak ema barak neʼebé fiar makaʼas ba sira-nia relijiaun halo hahalok aat. (2 Korinto 4:3, 4; 11:13-15) Tuir relatóriu sira, relijiaun balu envolve an iha terrorizmu, funu, halo aat no estraga labarik. Neʼe halo ema neʼebé fiar Maromak sente triste.​—Lee Mateus 24:3-5, 11, 12.

Relijiaun neʼebé loos fó glória ba Maromak, maibé relijiaun falsu halo Maromak la kontente. Relijiaun falsu hanorin ideia barak neʼebé la bazeia ba Bíblia, inklui hanorin falsu kona-ba Maromak no kona-ba ema mate. Maibé Maromak Jeová hakarak ema atu hatene lia-loos kona-ba nia.​—Lee Eclesiastes 9:5, 10; 1 Timóteo 2:3-5.

2. Saida mak sei akontese ba relijiaun sira?

Maski relijiaun barak dehan katak sira hadomi Maromak, maibé sira barak nia hahalok hatudu katak sira hadomi liu Satanás nia mundu neʼe. Sira labele lohi Maromak. (Tiago 4:4) Maromak nia Liafuan hanaran relijiaun falsu hotu nuʼudar “Babilónia Boot”. Babilónia mak sidade antigu neʼebé relijiaun falsu barak komesa mosu depois Rai-Nabeen iha Noé nia tempu. Lakleur tan, Maromak sei halakon relijiaun hotu neʼebé lohi no fó-terus ba ema.​—Lee Apokalipse 17:1, 2, 5, 16, 17; 18:8.

Jeová la haluha ema laran-moos sira neʼebé ohin loron iha relijiaun falsu sira-nia leet. Jeová halibur daudaun ema sira-neʼe hodi hanorin lia-loos ba sira.​—Lee Miqueias 4:2, 5.

 3. Ema laran-moos presiza halo saida?

Relijaun neʼebé loos halo ema iha unidade

Jeová hanoin ema neʼebé buka lia-loos no hakarak halo buat neʼebé loos. Nia hakarak tebes sira atu sai husi relijiaun falsu. Ema neʼebé hadomi Maromak prontu atu halo mudansa iha sira-nia moris hodi halo Maromak kontente.​—Lee Apokalipse 18:4.

Bainhira ema laran-moos sira iha tempu uluk rona liafuan diʼak husi apóstolu sira, sira hadiʼa sira-nia moris hodi tuir Jeová nia matadalan. No tanba sira halo ida-neʼe, sira-nia moris sai kontente liu, iha folin no iha esperansa ba futuru. Sira hatudu ezemplu diʼak ba ita tanba bainhira sira rona liafuan diʼak, sira tau uluk Jeová nia hakarak iha sira-nia moris.​—Lee 1 Tesalónika 1:8, 9; 2:13.

Maromak Jeová simu ema neʼebé sai husi relijiaun falsu, no sira sei sai ninia povu. Se Ita simu Jeová nia konvite neʼe, Ita sei sai ninia belun, sai parte husi família boot neʼebé adora nia, no bele hetan moris rohan-laek.​—Lee Marcos 10:29, 30; 2 Korinto 6:17, 18.

4. Oinsá mak Maromak sei lori ksolok ba mundu tomak?

Lakleur tan, Maromak sei halakon relijiaun falsu, neʼe mak liafuan diʼak. Iha tempu neʼebá, mundu tomak sei sai livre husi ema neʼebé fó susar ba ema seluk. Sei la iha tan relijiaun falsu neʼebé lohi no haketak ema. Ema hotu sei adora Maromak loos mesak deʼit ho unidade.​—Lee Apokalipse 18:20, 21; 21:3, 4.