Skip to content

Skip to table of contents

 LISAUN 7

Saida mak Maromak nia Ukun?

Saida mak Maromak nia Ukun?

1. Saida mak Maromak nia Ukun?

Tanbasá Jesus mak Liurai neʼebé diʼak?​—MARCOS 1:40-42.

Maromak nia Ukun, ka Reinu, mak governu ida iha lalehan. Governu neʼe sei troka governu sira hotu iha mundu no sei halo Maromak nia hakarak iha lalehan no mós iha rai. Neʼe mak liafuan diʼak duni. Lakleur tan, Maromak nia Ukun sei fó buat neʼebé ema presiza. Ukun neʼe sei halo ema hotu iha mundu moris ho unidade.​—Lee Daniel 2:44; Mateus 6:9, 10; 24:14.

Maromak Jeová hili ninia Oan-Mane Jesus Kristu atu sai Liurai iha Ninia Ukun.​—Lee Apokalipse 11:15.

Haree vídeo Saida mak Maromak nia Ukun?

2. Tanbasá Jesus mak Liurai neʼebé diʼak?

Jesus mak Liurai neʼebé diʼak tanba nia hatudu laran-diʼak no kaer metin ba buat neʼebé loos. (Mateus 11:28-30) Jesus mós iha kbiit atu ajuda ema tanba nia sei ukun mundu tomak husi lalehan. Depois Jesus moris hiʼas tiha, nia fila fali ba lalehan no hein iha Maromak Jeová nia liman-loos. (Ebreu 10:12, 13) Ikusmai, Maromak fó kbiit ba Jesus atu komesa ukun.​—Lee Daniel 7:13, 14.

3. Sé deʼit mak sei ukun hamutuk ho Jesus?

Grupu ida neʼebé Bíblia bolu “ema santu sira” mós sei ukun hamutuk ho Jesus iha lalehan. (Daniel 7:27) Primeiru, Maromak hili Jesus nia apóstolu sira neʼebé laran-metin atu sai ema santu. Toʼo agora, Maromak Jeová kontinua hili mane no feto sira neʼebé laran-metin atu sai ema santu. Hanesan ho Jesus, ema santu sira-neʼe sei hetan moris-hiʼas ho isin espíritu nian.​—Lee João 14:1-3; 1 Korinto 15:42-44.

 Ema naʼin-hira mak sei bá lalehan? Jesus bolu sira neʼebé atu bá lalehan nuʼudar “bibi-lubun kiʼik”. (Lucas 12:32) Sira hamutuk naʼin–144.000. Sira sei ukun mundu tomak hamutuk ho Jesus.​—Lee Apokalipse 14:1.

4. Saida mak akontese kuandu Jesus komesa ukun?

Maromak nia Ukun hahú iha tinan 1914. * Bainhira Jesus sai Liurai, nia soe tun Satanás ho ninia anju aat sira ba rai. Ida-neʼe halo Satanás hirus makaʼas no komesa fó susar ba ema iha mundu tomak. (Apokalipse 12:7-10, 12) Husi tempu neʼebá, situasaun iha mundu sai aat ba beibeik. Funu, rai-hamlaha, moras-peste no rai-nakdoko mak parte husi “sinál” neʼebé hatudu katak lakleur tan Maromak nia Ukun sei kontrola buat hotu iha mundu.​—Lee Lucas 21:7, 10, 11, 31.

5. Saida mak Maromak nia Ukun sei halo?

Liuhusi serbisu haklaken iha mundu tomak, Maromak nia Ukun halibur daudauk ema-lubun boot husi nasaun hotu. Ema rihun ba rihun neʼebé laran-maus sai povu ba Maromak nia Ukun. Sira sei hetan protesaun bainhira Maromak nia Ukun sei halakon buat aat hotu iha mundu neʼe. Tan neʼe, ema hotu neʼebé hakarak hetan bensaun husi Maromak nia Ukun presiza hakruʼuk an ba Liurai Jesus.​—Lee Apokalipse 7:9, 14, 16, 17.

Durante tinan 1.000, Liurai Jesus ho sira neʼebé ukun hamutuk ho nia sei kumpre Maromak nia hakarak uluk nian ba ema. Iha tempu neʼebá, mundu tomak sei sai paraízu. Tinan 1.000 liutiha, Jesus sei entrega fali Ukun neʼe ba ninia Aman. (1 Korinto 15:24-26) Ita hakarak atu koʼalia kona-ba liafuan diʼak neʼe ba ema seluk, loos ka lae?​—Lee Salmo 37:10, 11, 29.

 

^ par. 6 Atu aprende liután Bíblia nia profesia kona-ba tinan 1914, haree pájina 217-220 husi livru Ita Bele Komprende Bíblia!