Skip to content

Skip to table of contents

 LISAUN 1

Saida mak liafuan diʼak?

Saida mak liafuan diʼak?

1. Saida mak liafuan diʼak husi Maromak?

Maromak hakarak ema moris kontente iha mundu. Nia kria mundu no buat hotu iha mundu tanba nia hadomi ema. Lakleur tan, Maromak sei halo buat ruma atu ema hotu bele iha futuru neʼebé kapás. Nia sei halakon ema nia terus hotu.​—Lee Jeremias 29:11.

Toʼo agora, ema nia governu nunka hetan susesu atu halakon violénsia, moras no mate. Maibé iha liafuan diʼak. Lakleur tan, Maromak sei troka ema nia governu hotu ho ninia governu rasik. Iha tempu neʼebá, ema sei moris ho dame no saúde diʼak.​—Lee Isaias 25:8; 33:24; Daniel 2:44.

2. Tanbasá mak liafuan diʼak importante tebes ohin loron?

Atu ema bele moris livre husi terus, Maromak tenke halakon ema aat husi mundu neʼe. (Sofonias 2:3) Maibé bainhira loos mak ida-neʼe sei akontese? Maromak nia Liafuan fó-hatene nanis kona-ba situasaun aat oioin neʼebé akontese ohin loron. Buat sira-neʼe hatudu katak lakleur tan Maromak sei halakon ema aat sira.​—Lee 2 Timóteo 3:1-5.

3. Ita presiza halo saida?

Ita presiza aprende kona-ba Maromak husi ninia Liafuan, Bíblia. Bíblia mak hanesan karta ida husi aman neʼebé hadomi ninia oan. Bíblia fó-hatene ita oinsá atu halaʼo moris kontente agora, no oinsá mak ita bele haksolok ho moris ba nafatin iha futuru. Karik ema balu la gosta haree Ita estuda Bíblia, maibé keta husik buat ida hanetik Ita atu hetan futuru neʼebé diʼak.​—Lee Provérbios 29:25; Apokalipse 14:​6, 7.