Skip to content

Skip to table of contents

 LISAUN 11

Oinsá mak Bíblia nia matadalan lori benefísiu mai ita?

Oinsá mak Bíblia nia matadalan lori benefísiu mai ita?

1. Tanbasá mak ita presiza Maromak nia matadalan?

Oinsá mak Bíblia nia prinsípiu bele ajuda ita atu halo buat hotu ho seguru?​—SALMO 36:9.

Ita-nia Kriadór matenek liu fali ita. Nuʼudar Aman neʼebé iha domin, nia hanoin ita. Nia mós la kria ita atu ukun an rasik. (Jeremias 10:23) Hanesan labarik sira presiza inan-aman atu fó matadalan ba sira, ita hotu mós presiza matadalan husi Maromak. (Isaias 48:17, 18) Bíblia nia matadalan mak prezente furak husi Maromak.​—Lee 2 Timóteo 3:16.

Jeová nia ukun-fuan no prinsípiu sira hanorin ita oinsá atu halaʼo moris neʼebé diʼak liu no oinsá atu hetan bensaun ba nafatin iha futuru. Tanba Maromak mak kria ita, nia merese simu ita-nia respeitu no agradese hodi halo tuir ninia matadalan.​—Lee Salmo 19:7, 11; Apokalipse 4:11.

2. Bíblia nia prinsípiu katak sá?

Bíblia nia prinsípiu mak lia-loos neʼebé nunka troka. Maibé lei sira baibain bele aplika ba situasaun espesífiku deʼit. (Deuteronómio 22:8) Ita presiza uza ita-nia matenek atu hatene oinsá mak ita bele uza prinsípiu husi Bíblia iha situasaun ida-idak. (Provérbios 2:10-12) Porezemplu, Bíblia hanorin katak moris mak prezente husi Maromak. Prinsípiu neʼe bele ajuda ita atu kuidadu an no la halo buat neʼebé perigu iha serbisu-fatin, iha uma, no mós kuandu laʼo iha dalan.​—Lee Apóstolu 17:28.

3. Ukun-fuan rua saida mak importante liu?

Jesus koʼalia kona-ba ukun-fuan rua neʼebé importante liu. Ukun-fuan primeiru hatudu katak objetivu ba ita-nia moris mak atu hatene kona-ba Maromak, atu hadomi nia, no atu serbí nia ho laran tomak.  Kuandu ita halo desizaun oioin iha ita-nia moris, ita presiza hanoin uluk kona-ba ukun-fuan neʼe. (Provérbios 3:6) Ema neʼebé halo tuir ukun-fuan neʼe sei sai Maromak nia belun, hetan kontente neʼebé loos, no sei hetan moris rohan-laek.​—Lee Mateus 22:​36-38.

Ukun-fuan segundu bele ajuda ita atu iha relasaun diʼak ho ema seluk. (1 Korinto 13:4-7) Atu bele aplika ukun-fuan segundu neʼe iha ita-nia moris, ita presiza halo tuir dalan neʼebé Maromak hatudu laran-diʼak ba ema.​—Lee Mateus 7:12; 22:39, 40.

4. Oinsá mak Bíblia nia matadalan lori benefísiu mai ita?

Bíblia nia matadalan hanorin família sira oinsá atu hatudu domin ba malu hodi bele iha unidade. (Koloso 3:12-14) Bíblia hanorin ita katak kuandu ema kaben, sira presiza moris hamutuk toʼo mate. Hanorin neʼe bele proteje família sira.​—Lee Génesis 2:24.

Hodi tuir Bíblia nia hanorin, ida-neʼe bele ajuda ita atu sees husi problema kona-ba osan no ajuda ita atu moris kontente. Porezemplu, patraun barak gosta atu fó serbisu ba ema neʼebé moris tuir Bíblia nia matadalan kona-ba hatudu laran-moos no serbisu ho badinas. (Provérbios 10:4, 26; Ebreu 13:18) Maromak nia Liafuan mós ajuda ita atu kontente ho buat neʼebé ita iha ona, no atu hafolin liu ita-nia relasaun ho Maromak duké sasán no osan.​—Lee Mateus 6:24, 25, 33; 1 Timóteo 6:8-10.

Halo tuir Bíblia nia matadalan bele proteje ita-nia saúde. (Provérbios 14:30; 22:24, 25) Porezemplu, Maromak nia ukun-fuan kona-ba la hemu tua toʼo lanu proteje ita husi moras no asidente oioin. (Provérbios 23:20) Maski Jeová la bandu ita atu hemu tua, maibé ita labele hemu demais. (Salmo 104:15; 1 Korinto 6:10) Bíblia nia matadalan mós hanorin ita atu hatudu hahalok diʼak no mós kuidadu buat neʼebé ita hanoin iha laran. (Salmo 119:97-100) Ema Kristaun neʼebé loos halo tuir Maromak nia matadalan, laʼós tan deʼit hakarak hetan buat diʼak ba sira-nia an, maibé tanba hakarak hahiʼi Maromak Jeová.​—Lee Mateus 5:14-16.