Skip to content

Skip to table of contents

 LISAUN 3

Bíblia mai husi Maromak ka lae?

Bíblia mai husi Maromak ka lae?

1. Bíblia mai husi sé?

Bíblia fó sai liafuan diʼak kona-ba ema nia esperansa atu moris ba nafatin iha mundu. (Salmo 37:29) Bíblia iha livru kiʼik hamutuk 66. Maromak uza maizumenus ema naʼin-40 atu hakerek livru sira-neʼe. Moisés mak hakerek livru lima primeiru maizumenus tinan 3.500 liubá. Apóstolu João mak hakerek livru ikus maizumenus tinan 1.900 liubá. Ema sira neʼebé hakerek Bíblia, hakerek sé-nia hanoin? Maromak fó sai ninia hanoin ba ema sira-neʼe liuhusi ninia espíritu santu. (2 Samuel 23:2) Sira hakerek Maromak nia hanoin, laʼós sira rasik nian. Tan neʼe, Bíblia mai husi Maromak Jeová.​—Lee 2 Timóteo 3:16; 2 Pedro 1:20, 21.

Haree vídeo Bíblia mai husi sé?

2. Oinsá mak ita bele fiar katak Bíblia mai husi Maromak?

Ita hatene katak Bíblia mai husi Maromak tanba buat hotu neʼebé Bíblia fó-hatene nanis kona-ba futuru sempre sai loos. La iha ema ida mak bele halo ida-neʼe. (Josué 23:14) Maromak Kbiit Boot Liu hotu deʼit mak bele hatene ema nia futuru.​—Lee Isaias 42:9; 46:10.

Bíblia mai husi Maromak, la hanesan ho livru sira seluk. Ohin loron, ema tradús Bíblia iha língua atus ba atus, no mós fahe ona Bíblia hamutuk 2.000.000.000 liu. Maski Bíblia mak livru antigu, maibé Bíblia sempre loos kuandu koʼalia kona-ba siénsia. No mós buat neʼebé ema naʼin-40 hakerek iha Bíblia la kontra malu. Liután neʼe, Bíblia hatudu sai Maromak nia domin, no husi tempu uluk toʼo agora, Bíblia iha kbiit atu troka ema nia moris. Buat sira-neʼe halo ema barak fiar katak Bíblia mak Maromak nia Liafuan.​—Lee 1 Tesalónika 2:13.

Haree vídeo Tansá bele fiar katak Bíblia laʼós inventa deʼit?

 3. Bíblia fó sai kona-ba saida deʼit?

Bíblia fó sai Maromak nia hakarak ba ema, no ida-neʼe mak liafuan diʼak. Bíblia esplika oinsá ema primeiru lakon sira-nia oportunidade atu moris ba nafatin iha jardín Eden, no oinsá Maromak sei hadiʼa mundu tomak sai fali paraízu hanesan jardín Eden.​—Lee Apokalipse 21:​4, 5.

Iha Bíblia, ita bele hetan Maromak nia ukun-fuan, matadalan no konsellu. Bíblia mós konta istória kona-ba buat neʼebé Maromak halo ba ema diʼak no ema aat iha tempu uluk, no istória sira-neʼe hatudu sai Maromak nia hanoin no hahalok. Bíblia bele ajuda ita atu hatene didiʼak Maromak, no esplika oinsá mak ita bele sai ninia belun.​—Lee Salmo 19:7, 11; Tiago 2:23; 4:8.

4. Oinsá mak Ita bele komprende Bíblia?

Jesus hanorin ema hodi uza eskritura sira husi Bíblia no esplika “signifika husi Eskritura sira”. Livru ida-neʼe mós uza dalan hanesan neʼe atu ajuda Ita komprende Bíblia.​—Lee Lucas 24:27, 45.

Liafuan diʼak husi Maromak mak furak liu hotu. Maibé ema balu ladún interese, no iha mós ema neʼebé la gosta atu rona kona-ba neʼe. Maski nuneʼe, Ita lalika sente triste tanba se Ita kontinua aprende kona-ba Maromak, Ita iha esperansa atu moris ba nafatin.​—Lee João 17:3.