Skip to content

Skip to table of contents

 PERGUNTA 2

Tansá haʼu hanoin barak kona-ba haʼu-nia isin-lolon?

Tansá haʼu hanoin barak kona-ba haʼu-nia isin-lolon?

TANSÁ MAK IMPORTANTE?

Iha buat balu neʼebé importante liu fali buat neʼebé ó haree iha espellu.

SAIDA MAK HAʼU SEI HALO?

Imajina toʼok situasaun neʼe: Bainhira Julia haree ba espellu, nia sempre hanoin: “Haʼu bokur-teen. Haʼu presiza hatún isin.” Maibé tuir loloos, Julia nia inan-aman no kolega sira sempre hatete ba nia katak ninia isin lotuk.

Maski nuneʼe, Julia hanoin: “Haʼu sei halo buat naran deʼit atu hatún isin. Tan neʼe, haʼu sei la han ba loron tolu . . .”

Se ó mak iha Julia nia situasaun, saida mak ó sei halo?

PARA HODI HANOIN LAI!

Dala ruma ó bele hanoin sala kona-ba ó-nia an, hanesan kuandu leno an iha espellu neʼebé la kabeer

La sala atu hanoin kona-ba ó-nia isin-lolon ka oin. Bíblia mós temi kona-ba ema balu hodi hatete katak sira mak bonitu ka bonita, porezemplu Sara, Rakel, José, David, Abigail, no mós feto ida naran Abisag neʼebé “bonita tebetebes”.—1 Reis (Raja-Raja) 1:4.

Maibé, joven barak hanoin demais kona-ba sira-nia isin-lolon. Hanoin hanesan neʼe bele lori problema boot ba joven sira. Porezemplu:

  • Tuir peskiza ida iha rai-Estadus Unidus, porsentu 58 husi feto joven sira mak hatete katak sira bokur demais, maibé tuir loloos, porsentu 17 deʼit mak presiza hatún isin.

  • Tuir peskiza ida seluk, husi feto sira neʼebé hanoin katak sira bokur demais, porsentu 45 mak loloos presiza aumenta isin!

  • Joven balu hakarak tebes atu hatún isin no halo dieta iha dalan neʼebé sala, tan neʼe ikusmai sira hetan moras aat ida naran anorexia. Moras neʼe mosu bainhira ema hanoin katak sira bokur, tan neʼe sira lakohi han toʼo ikusmai sai isin-krekas tebes.

 Se ó mós hanoin katak ó iha moras anorexia, ka iha problema kona-ba dieta, ó presiza hetan ajuda. Fó sai ó-nia problema ba ó-nia inan-aman, ka ema ruma neʼebé ó bele tau fiar. Bíblia dehan: “Belun neʼebé loos hatudu domin iha tempu hotu, no nia sai hanesan maun-alin ida iha tempu susar.”—Provérbios (Amsal) 17:17.

DALAN NEʼEBÉ LOOS ATU HADIʼA Ó-NIA AN

Tuir loloos, buat neʼebé halo ita bonitu ka bonita, mak ita-nia laran. Hanoin toʼok kona-ba Liurai David nia oan-mane Absalão. Bíblia dehan:

La iha mane ida iha Izraél neʼebé . . . bonitu hanesan Absalão. Nia isin kabeer hotu husi ninia ain okos toʼo ulun leten.”—2 Samuel 14:25.

Maibé, Absalão mak ema neʼebé foti-an, buka oin no laran-makerek! Tuir Bíblia, Absalão laʼós ema neʼebé bonitu iha laran, maibé nia mak ema neʼebé la hatudu laran-metin duni, no ohodór.

Bíblia nia konsellu mak:

“Tau fali ema [hahalok] foun neʼebé Maromak fó ba ita.”—Koloso 3:10.

“Keta hafurak imi-nia an tuir deʼit buat neʼebé ema haree . . . maibé buat neʼebé imi tenke hafurak mak imi-nia laran.”—1 Pedro 3:3, 4.

La sala atu hakarak sai bonitu ka bonita, maibé buat neʼebé importante liu mak ita-nia laran. Ikusmai, buat neʼebé sei halo ema gaba ita no gosta liu ita mak ita-nia hahalok diʼak, laʼós ita-nia isin neʼebé haree kapás! Feto joven ida naran Felísia hatete: “Se ita mak bonitu ka bonita, neʼe bele dada kedas ema seluk nia atensaun, maibé buat neʼebé ema sei hanoin-hetan liu mak ita-nia laran no hahalok diʼak.”

BUKA-HATENE

Dala barak ó sente laran-tun kona-ba ó-nia isin-lolon ka lae?

Ó hanoin ona atu halo dieta neʼebé bele lori perigu ba ó-nia saúde ka atu hetan operasaun ruma atu sai bonitu ka bonita ka lae?

Se ó bele, ó hakarak atu iha mudansa kona-ba ó-nia parte isin-lolon ida-neʼebé? (Tau marka ba buat neʼebé ó hakarak atu troka.)

  • ALTURA

  • TODAN

  • FUUK

  • ISIN

  • OIN

  • KÓR BA KULIT

  • SELUK TAN

Se ó hatán “sin” ba pergunta primeiru no segundu, no ó tau marka ba buat tolu ka liu iha pergunta terseiru, hanoin toʼok kona-ba neʼe: Maski ó hanoin katak ó mak oin aat, bokur-teen ka ó-nia fuuk la jeitu, maibé karik ema seluk la hanoin hanesan neʼe kona-ba ó. Baibain fasil ba joven sira atu koko buat oioin tan deʼit hanoin demais kona-ba sira-nia isin-lolon.—1 Samuel 16:7.