Skip to content

Skip to table of contents

 PERGUNTA 3

Oinsá mak haʼu bele koʼalia ho haʼu-nia inan-aman?

Oinsá mak haʼu bele koʼalia ho haʼu-nia inan-aman?

TANSÁ MAK IMPORTANTE?

Se ó iha relasaun diʼak ho ó-nia inan-aman, ó-nia moris sei sai diʼak liu no hakmatek.

SAIDA MAK HAʼU SEI HALO?

Imajina toʼok situasaun neʼe: Iha loron-kuarta lokraik, mane joven ida ho tinan 17 naran Atoi halo hotu ona ninia TPC. Agora mak ninia tempu atu deskansa uitoan! Nia tuur iha sofá, no loke televizaun.

Derrepente deʼit, Atoi nia aman tama mai. Ho hirus, nia dehan:

“Atoi! Tanbasá ó sempre gasta tempu hanesan neʼe? Loloos, ó tenke ajuda ó-nia alin atu halo ninia TPC! Ó nunka halo tuir buat neʼebé haʼu hatete!”

“Toʼo ona bá.” Atoi koʼalia ho lian kiʼik, maibé ninia aman rona.

Nia hatete: “Ó dehan saida?”

Atoi hatán ho baruk: “Lae ida sá.”

Agora Atoi nia aman sai hirus liután: “Keta koʼalia hanesan neʼe mai haʼu!”

Se ó mak Atoi, oinsá ó bele hasees an husi haksesuk-malu hanesan neʼe?

PARA HODI HANOIN LAI!

Koʼalia ho ó-nia inan-aman mak hanesan lori karreta. Se buat ruma taka dalan no hanetik ó atu liu, ó presiza buka dalan seluk atu toʼo ba fatin neʼebé ó hakarak atu bá.

 POREZEMPLU:

Feto joven ida naran Lea hatete: “Haʼu sente susar tebes atu koʼalia ho haʼu-nia apá. Dala ruma kuandu haʼu koʼalia kleur tiha kona-ba haʼu-nia problema ba apá, ikusmai nia husu: ‘Ohin ó koʼalia ho haʼu ka?’”

LEA BELE HILI IDA HUSI OPSAUN TOLU TUIRMAI NEʼE.

  1. Hakilar ba ninia apá.

    Lea hakilar dehan: “Rona lai apá, neʼe importante!”

  2. La koʼalia tan ba ninia apá.

    Lea deside atu la koʼalia tan ninia problema ba apá.

  3. Hein ba tempu seluk atu koko koʼalia fali.

    Lea deside atu koko koʼalia fali iha tempu seluk, ka hakerek surat ba apá atu fó sai ninia problema.

Tuir ó-nia hanoin, diʼak liu ba Lea atu hili ida-neʼebé?

HANOIN DIDIʼAK: Lea nia apá okupadu hela, tan neʼe nia la hatene katak Lea hakarak fó sai ninia problema. Se Lea hili Opsaun A, ninia apá sei la komprende tansá mak nia hakilar. No hahalok neʼe mós la hatudu respeitu, no la ajuda ninia apá atu rona ba nia. (Éfeso 6:2) Opsaun neʼe sei la lori buat diʼak ba Lea no mós ba ninia apá.

Se buat ruma hanetik ó atu koʼalia ho inan-aman, ó bele buka dalan seluk atu bele koʼalia ho sira

Karik fasil deʼit atu hili Opsaun B, maibé neʼe ladún matenek. Tanbasá? Atu rezolve Lea nia problema, nia presiza koʼalia ba ninia apá. No oinsá mak ninia apá bele ajuda nia se ninia apá la hatene ho loloos ninia problema? Loos duni, nonook deʼit sei la rezolve buat ida.

Maibé ho Opsaun C, Lea la husik buat ida atu hanetik nia hodi koʼalia ba ninia apá. Nia la rende an maibé nia koko buka tempu seluk atu fó sai ninia problema. No se Lea hili atu hakerek surat ba ninia apá, neʼe mós ajuda nia atu sente diʼak lalais.

Hodi hakerek surat bele ajuda Lea atu fó-hatene ho loloos buat neʼebé nia hakarak atu koʼalia. No kuandu ninia apá lee surat neʼe, nia bele komprende Lea nia hanoin no hakarak. Opsaun C sei lori rezultadu diʼak ba Lea no mós ba ninia apá, no neʼe mós tuir duni Bíblia nia matadalan atu “buka buat neʼebé haburas dame”.—Roma 14:19.

Lea mós bele iha opsaun seluk tan ka lae?

Hanoin toʼok kona-ba buat seluk tan neʼebé Lea bele halo. Tuirmai, hakerek toʼok, opsaun neʼe bele lori rezultadu saida?

 KETA HALO Ó-NIA APÁ-AMÁ KOMPRENDE SALA

Hanoin-hetan bá, katak buat neʼebé ó koʼalia dala ruma la hanesan ho buat neʼebé ó-nia apá-amá komprende.

POREZEMPLU:

Ó-nia apá-amá husu tansá ó oin-buis. Ó hatete: “Haʼu lakohi atu koʼalia kona-ba neʼe.”

Maibé ó-nia apá-amá komprende sala, no hanoin katak ó lakohi fó sai ó-nia problema ba sira tanba ó la fiar sira, no katak ó hakarak koʼalia sai ba ó-nia kolega sira deʼit, laʼós ba sira.

Hanoin toʼok, ó hasoru daudaun problema ida no ó-nia apá-amá hatete katak sira hakarak ajuda ó. Maibé ó hatete: “Keta hanoin barak. Haʼu bele rezolve rasik.”

  • Karik ó-nia apá-amá sei komprende sala, no hanoin katak:

  • Tan neʼe, karik diʼak liu ó hatete: