Skip to content

Skip to table of contents

 ISTÓRIA 109

Pedro vizita Cornélio

Pedro vizita Cornélio

MANE ida neʼebé hamriik iha neʼe mak apóstolu Pedro, no ema neʼebé hamriik iha kotuk mak ninia kolega. Maibé tansá mak ema neʼe hakneʼak ba Pedro? Loos atu halo hanesan neʼe ka lae? Hatene nia mak sé?

Ema neʼe naran Cornélio. Nia mak komandante ida iha tropa Roma. Cornélio la koñese Pedro, maibé nia simu avizu atu konvida Pedro ba ninia uma. Mai ita haree oinsá ida-neʼe akontese.

Dixípulu sira neʼebé primeiru tuir Jesus mak ema judeu, maibé Cornélio laʼós ema judeu ida. Maski nuneʼe, nia hadomi Maromak, halo orasaun, no halo buat barak neʼebé diʼak ba ema. Entaun, lokraik ida, anju ida mosu ba nia no hatete: ‘Maromak kontente ho ó, no sei hatán ba ó-nia orasaun. Haruka ema balu atu bolu mane ida naran Pedro. Nia hela daudauk iha Jope, iha Simão nia uma, besik tasi.’

Entaun, Cornélio haruka kedas ema balu atu buka Pedro. Loron tuirmai, bainhira ema sira-neʼe atu besik toʼo Jope, Pedro tuur iha Simão nia uma-leten. Iha neʼebá, Maromak halo Pedro hanoin katak nia haree hena boot ida tun mai husi lalehan. Iha hena neʼe, iha animál oioin. Tuir Maromak nia ukun-fuan, animál hirak-neʼe mak foʼer no labele han. Maibé lian ida hatete: ‘Hamriik, Pedro. Oho sira no han.’

Pedro hatán: ‘La bele! Haʼu nunka han buat neʼebé foʼer.’ Maibé, lian neʼe dehan ba Pedro: ‘Labele tan atu bolu foʼer ba buat neʼebé Maromak hatete moos ona.’ Buat neʼe akontese dala tolu. Kuandu Pedro hanoin daudauk buat neʼe katak sá, ema neʼebé Cornélio haruka toʼo tiha ba uma no husu atu hasoru Pedro.

Pedro tun ba kraik no hatete: ‘Haʼu mak imi buka. Tansá imi mai iha neʼe?’ Kuandu sira esplika katak anju ida mak hatete Cornélio atu konvida Pedro ba ninia uma, Pedro hatán atu bá hamutuk ho sira. Loron tuirmai, Pedro ho ninia kolega sira bá atu vizita Cornélio iha Sezareia.

Cornélio halibur tiha ona ninia família no belun sira. Bainhira Pedro mai, Cornélio simu nia. Nia hakneʼak no hakruʼuk iha Pedro nia ain, hanesan ó haree iha neʼe. Maibé Pedro hatete: ‘Hamriik tiha; Haʼu rasik mós ema deʼit.’ Loos, Bíblia hatudu katak laloos atu hakruʼuk hodi adora ema. Ita tenke adora Jeová mesak deʼit.

Agora, Pedro haklaken ba ema neʼebé halibur iha neʼe. Pedro hatete: ‘Haʼu haree katak Maromak simu ema hotu neʼebé hakarak serbí nia.’ Nia koʼalia daudauk, Maromak haruka ninia espíritu santu, no ema sira-neʼe hahú koʼalia iha língua oioin. Dixípulu judeu sira neʼebé mai hamutuk ho Pedro hakfodak tebes, tanba sira hanoin katak Maromak gosta ema judeu deʼit. Ida-neʼe hanorin ba sira katak Maromak la haree ema husi rasa ida mak diʼak liu ka importante liu fali ema husi rasa seluk. Diʼak atu ita hotu la haluha kona-ba neʼe, loos ka lae?