Skip to content

Skip to table of contents

 ISTÓRIA 106

Sai livre husi kadeia

Sai livre husi kadeia

HAREE ba anju neʼebé loke kadeia nia odamatan iha neʼe. Mane sira neʼebé anju hasai daudauk husi kadeia neʼe mak Jesus nia apóstolu. Mai ita haree saida mak akontese toʼo ema hatama sira iha kadeia.

Lakleur deʼit husi tempu neʼebé espíritu santu nakfakar tiha ba Jesus nia dixípulu sira, ida-neʼe mak akontese: Lokraik ida iha Jeruzalein, Pedro no João atu tama iha templu laran. Iha neʼebá, besik odamatan, iha mane ida neʼebé moris kudeʼik kedas. Loroloron, ema lori nia no tau iha neʼe atubele husu osan ba sira neʼebé tama ba templu. Bainhira nia haree Pedro no João, nia husu sira atu fó buat ruma ba nia. Saida mak apóstolu sira sei halo?

Sira para no fihir mane neʼebé kasian tebes. Pedro hatete: ‘Osan haʼu la iha, maibé haʼu sei fó ba ó buat neʼebé haʼu iha. Hodi Jesus nia naran, hamriik no laʼo bá!’ Pedro kaer mane neʼe nia liman loos, no tempu neʼe kedas nia haksoit no hahú laʼo. Bainhira ema haree, sira hakfodak no kontente tebes kona-ba milagre furak ida-neʼe.

Pedro hatete: ‘Ami halo milagre ida-neʼe ho kbiit neʼebé mai husi Maromak, ida neʼebé halo Jesus moris filafali husi mate.’ Kuandu nia no João sei koʼalia daudauk, naʼi-ulun relijiaun balu mosu. Sira hirus tanba Pedro no João koʼalia ba ema kona-ba Jesus moris hiʼas husi mate. Nuneʼe, sira kaer apóstolu sira no hatama iha kadeia.

Loron tuirmai, naʼi-ulun relijiaun sira halo reuniaun boot ida. Ema lori Pedro no João mai hamutuk ho mane neʼebé kura tiha ona. Naʼi-ulun relijiaun sira husu: ‘Hodi kbiit ida neʼebé mak imi halo milagre ida-neʼe?’

Pedro hatete ba sira katak hodi kbiit husi Maromak ida neʼebé halo Jesus moris filafali husi mate. Amlulik sira la hatene atu halo saida, tanba sira la bele nega kona-ba milagre furak neʼebé akontese duni. Tan neʼe sira fó avizu makaʼas ba apóstolu sira atu labele koʼalia tan kona-ba Jesus, no husik sira bá.

Loron laʼo daudauk, apóstolu sira kontinua haklaken kona-ba Jesus no kura ema moras sira. Ema barak konta ba malu kona-ba milagre hirak-neʼe. Tan neʼe, ema barak husi aldeia neʼebé haleʼu Jeruzalein lori ema moras ba apóstolu sira atu kura. Ida-neʼe halo naʼi-ulun relijiaun sira sai laran-moras, tan neʼe sira kaer apóstolu sira no hatama iha kadeia. Maibé, apóstolu sira la hela kleur iha neʼebá.

Hanesan ó haree iha neʼe, iha kalan, Maromak nia anju loke kadeia nia odamatan. Anju neʼe hatete: ‘Bá no hamriik iha templu, no kontinua koʼalia ba ema.’ Dadeer-saan tuirmai, kuandu naʼi-ulun relijiaun sira haruka ema ba kadeia atu lori apóstolu mai, sira la iha ona. Tuirfalimai, sira hetan apóstolu sira hanorin daudauk iha templu, nuneʼe, sira kaer apóstolu sira no lori ba sala Sinédriu.

Naʼi-ulun relijiaun sira hatete: ‘Ami manda tiha ona ba imi atu labele hanorin tan kona-ba Jesus, maibé imi hakonu Jeruzalein ho imi-nia hanorin.’ Apóstolu sira hatán: ‘Ami tenke halo tuir Maromak nuʼudar ukun-naʼin liu fali ema.’ Nuneʼe, sira kontinua hanorin ‘lia-foun diʼak.’ Ezemplu neʼe diʼak tebes atu ita mós tuir, loos ka lae?