Skip to content

Skip to table of contents

 ISTÓRIA 87

Labarik Jesus iha templu

Labarik Jesus iha templu

HAREE ba labarik-mane neʼebé koʼalia daudauk ho katuas sira-neʼe. Sira mak mestre iha Maromak nia templu iha Jeruzalein. No labarik neʼe mak Jesus. Nia boot ona, tinan 12.

Mestre sira hakfodak tebes tanba Jesus hatene buat barak kona-ba Maromak no buat neʼebé hakerek iha Bíblia laran. Maibé tansá mak José no Maria la hamutuk ho nia? Sira iha neʼebé? Mai ita haree toʼok.

Tinan-tinan José lori nia família bá Jeruzalein atu tuir festa espesiál naran Páskua. Sira laʼo dook husi Nazaré bá Jeruzalein. Ema ida la iha karreta, no mós la iha komboiu. Tempu neʼebá, buat hirak-neʼe la iha. Ema barak laʼo deʼit, no demora loron tolu atu bá Jeruzalein.

Agora, José iha família boot. Nuneʼe tenke tau matan mós ba Jesus nia alin-mane no alin-feto sira. Entaun, iha tinan neʼe, José no Maria laʼo dook fila fali ba sira-nia rai Nazaré hamutuk ho sira-nia oan. Sira hanoin katak Jesus mós laʼo hamutuk ho ema seluk. Maibé toʼo kalan, sira la haree Jesus. Sira buka nia iha maluk no kolega nia leet, maibé nia la hamutuk ho sira! Nuneʼe, sira fila fali ba Jeruzalein atu buka nia iha neʼebá.

Ikusmai, sira hetan Jesus iha neʼe hamutuk ho mestre sira. Nia rona ba sira no husu pergunta. Ema hotu hakfodak loos tanba Jesus matenek tebes. Maibé Maria hatete: ‘Oan, tansá ó halo hanesan neʼe? Ó-nia aman no haʼu laran-susar tebes atu buka ó.’

Jesus hatán: ‘Tansá imi tenke buka haʼu? Imi la hatene katak haʼu sei hela iha haʼu-nia Aman nia uma?’

Loos, Jesus gosta tebes atu bá fatin neʼebé nia bele aprende kona-ba Maromak. Ita mós tenke sente hanesan neʼe, loos ka lae? Iha Nazaré, Jesus toman bá reuniaun atu adora Maromak semana-semana. Tanba nia sempre rona didiʼak, nia aprende buat barak husi Bíblia. Mai ita banati-tuir Jesus. Dezeñu iha pájina tomak