Skip to content

Skip to table of contents

 ISTÓRIA 101

Jesus mate

Jesus mate

HAREE ba buat aat tebes akontese daudauk! Ema oho Jesus. Sira tara nia iha ai-riin. Sira hedi ninia liman no ain ho pregu. Tanbasá sira hakarak halo hanesan neʼe ba Jesus?

Tanba ema ruma odi Jesus. Hatene sira-neʼe mak sé? Sira-neʼe ida mak anju aat Diabu Satanás. Nia mak halo Adão no Eva la halo tuir Jeová. No Satanás mak halo Jesus nia inimigu sira atu halaʼo buat aat hanesan neʼe.

Molok inimigu sira hedi Jesus, sira halo tiha ona buat aat tebetebes ba nia. Hanoin-hetan ka lae oinsá sira mai toʼo jardín Jetsémani no kaer nia? Inimigu sira-neʼe mak sé? Sira mak naʼi-ulun relijiaun. Entaun, mai ita haree saida mak akontese depois neʼe.

Bainhira naʼi-ulun sira kaer tiha Jesus, ninia apóstolu sira halai. Sira husik Jesus mesak ho ninia inimigu, tanba sira taʼuk. Maibé, apóstolu Pedro no João la bá fatin dook. Sira mós tuir husi kotuk atu haree saida mak akontese ba Jesus.

Amlulik sira lori Jesus ba katuas ida naran Anás nia uma. Nia uluk amlulik boot ida. Sira la hela kleur iha neʼe. Sira lori fali Jesus ba Caifás nia uma. Nia mak agora nuʼudar amlulik boot. Naʼi-ulun relijiaun sira barak mak halibur ona iha ninia uma.

Iha neʼe iha Caifás nia uma, sira halo prosesu. Sira lori mós ema neʼebé atu koʼalia bosok kona-ba Jesus. Naʼi-ulun relijiaun sira hotu hatete: ‘Jesus tenke mate.’ Hafoin, sira tafui ba Jesus nia oin, no tuku nia.

Durante buat hotu neʼe akontese, Pedro iha uma oin. Kalan neʼe malirin, no ema sunu ahi. Durante sira haneruk ahi, atan-feto ida hateke ba Pedro hodi dehan: ‘Mane neʼe mós uluk hamutuk ho Jesus.’

Pedro hatán: ‘Lae, laʼós haʼu!’

Dala tolu ema hatete ba Pedro katak nia hamutuk ho Jesus. Maibé Pedro sempre nega. Kuandu Pedro nega ba dala tolu, Jesus fila oin no hateke ba nia. Pedro sente an tebes tanba lia-bosok neʼe, no halai sees hodi tanis.

Dadeer-saan deʼit iha loron-sesta, amlulik sira lori Jesus ba sala Sinédriu, reuniaun-fatin neʼebé boot. Iha neʼebá, sira koʼalia kona-ba saida mak sira sei halo ba Jesus. Sira lori nia ba Pónsiu Pilatos, ukun-naʼin iha distritu Judéia.

Amlulik sira dehan ba Pilatos: ‘Nia ema aat. Nia tenke mate.’ Husu tiha pergunta balu ba Jesus, Pilatos hatete: ‘Haʼu la hetan buat ida neʼebé aat iha nia.’ Hafoin, Pilatos haruka Jesus ba Herodes Ántipas. Herodes mak ukun-naʼin iha Galiléia, maibé nia hela iha Jeruzalein. Herodes mós la hetan buat ida neʼebé aat, tan neʼe nia haruka filafali Jesus ba Pilatos.

Pilatos hakarak husik tiha Jesus. Maibé inimigu sira hakarak husik tiha ema ida seluk, laʼós Jesus. Ema neʼe mak naʼok-teen ida naran Barrabás. Agora besik ona meiudia, Pilatos lori sai Jesus ba liʼur. Pilatos hatete ba povu: ‘Haree bá! Imi-nia liurai!’ Maibé amlulik boot sira haklalak: ‘Nia tenke mate! Oho tiha nia! Oho tiha nia!’ Tan neʼe Pilatos husik tiha Barrabás, no sira lori Jesus atu oho.

Lokraik iha loron-sesta, ema hedi Jesus ba ai-riin. Iha Jesus nia sorin-sorin, sira mós tara ema aat naʼin-rua neʼebé hetan kastigu-mate. Ó la haree sira iha dezeñu neʼe. Lakleur antes Jesus mate, ema aat neʼe ida hatete ba nia: ‘Hanoin fali haʼu kuandu Ita tama iha Ita-nia reinu.’ Jesus hatán: ‘Haʼu promete ba ó katak ó sei hamutuk haʼu iha Paraízu.’

Ida-neʼe promesa diʼak tebes, loos ka lae? Ó hatene Jesus koʼalia kona-ba paraízu ida neʼebé? Paraízu neʼebé Maromak halo ulukliu mak iha neʼebé? Sin, iha Rai. No kuandu Jesus ukun nuʼudar liurai iha lalehan, nia sei halo mane neʼe moris filafali no haksolok iha Paraízu foun iha Rai. Ita sente kontente kona-ba ida-neʼe, loos ka lae?