Skip to content

Skip to table of contents

 ISTÓRIA 91

Jesus hanorin iha foho ida

Jesus hanorin iha foho ida

HAREE Jesus tuur iha neʼe. Nia hanorin ema sira-neʼe iha foho ida iha Galiléia. Sira neʼebé tuur besik liu Jesus mak ninia dixípulu sira. Nia hili tiha ona ema naʼin-12 nuʼudar apóstolu. Apóstolu mak Jesus nia dixípulu espesiál. Hatene sira-nia naran ka lae?

Iha Simão Pedro no ninia alin André. No mós Tiago no João, sira naʼin-rua mós maun-alin. Apóstolu ida tan mós naran Tiago, no ida seluk tan mós naran Simão. Apóstolu naʼin-rua naran Judas. Ida mak Judas Iscariotes, no ida seluk mak ema bolu mós Tadeu. Iha tan Filipe no Natanael (ema bolu mós Bartolomeu), no Mateus no mós Tomé.

Depois fila husi Samaria, Jesus hahú haklaken: ‘Reinu lalehan nian besik ona.’ Hatene saida mak reinu neʼe? Neʼe mak Maromak nia governu. Jesus mak reinu neʼe nia liurai. Nia sei ukun husi lalehan no sei lori dame ba Rai. Maromak nia reinu sei halo Rai tomak sai paraízu neʼebé furak.

Jesus iha neʼe hanorin ema kona-ba reinu neʼe. Nia hatete: ‘Imi tenke halo orasaun hanesan neʼe: Ami Aman iha lalehan, halo Ita-nia naran sai santu. Halo Ita-nia reinu toʼo mai ami. Halo Ita-nia hakarak halaʼo iha Rai hanesan iha lalehan.’ Ema barak temi orasaun neʼe ‘Ami Aman.’ Seluseluk temi ‘Naʼi nia Orasaun.’ Hatene orasaun neʼe tomak ka lae?

No mós Jesus hanorin ema kona-ba hahalok neʼebé sira tenke hatudu ba malu. Nia hatete: ‘Halo ba ema seluk buat neʼebé imi hakarak ema halo ba imi.’ Ó gosta ka lae, kuandu ema hatudu hahalok neʼebé laran-diʼak ba ó? Nuneʼe, Jesus hatete katak ita tenke hatudu laran-diʼak ba malu. Sei diʼak tebes iha Rai paraízu bainhira ema hotu halo hanesan neʼe, loos ka lae?