Skip to content

Skip to table of contents

 ISTÓRIA 65

Reinu fahe ba rua

Reinu fahe ba rua

HATENE tanbasá mak ema neʼe lees ninia faru rohan-rohan? Jeová mak haruka nia atu halo hanesan neʼe. Ema neʼe mak Maromak nia profeta Aijá. Hatene profeta katak sá? Profeta mak ema ida-neʼebé Jeová fó-hatene nanis kona-ba saida mak sei akontese iha futuru.

Aijá koʼalia daudauk ba Jeroboão. Salomão haruka Jeroboão atu toma konta serbisu atu harii uma sira. Bainhira Aijá hasoru Jeroboão iha dalan neʼe, Aijá halo buat neʼebé la hanesan baibain. Nia hasai ninia faru foun no lees toʼo rohan 12. Nia hatete ba Jeroboão: ‘Foti faru rohan 10 ba Ita-nia an.’ Hatene tanbasá mak Aijá fó faru rohan 10 ba Jeroboão?

Aijá fó-hatene Jeroboão katak Jeová sei foti fali reinu husi Salomão. Nia hatete katak Jeová sei fó suku 10 ba Jeroboão. Ida-neʼe dehan katak Salomão nia oan Roboão sei ukun ba suku rua deʼit.

Kuandu Salomão rona kona-ba buat neʼebé Aijá hatete ba Jeroboão, Salomão sai hirus tebes. Nia koko atu oho Jeroboão. Maibé, Jeroboão halai ba Ejitu. Ikusmai, Salomão mate. Nia ukun ba tinan 40, maibé agora ninia oan Roboão mak sai liurai. Iha Ejitu, Jeroboão rona katak Salomão mate ona, nuneʼe nia mai fali Izraél.

Roboão mak liurai ida neʼebé la diʼak. Nia hatudu laran-aat ba povu liu fali ninia aman Salomão. Jeroboão hamutuk ho ema-boot seluk hasoru Liurai Roboão no husu nia atu hatudu laran-diʼak ba povu. Maski nuneʼe, Roboão lakohi rona. Maibé, nia sai laran-aat liután. Tan neʼe, povu foti Jeroboão sai liurai ba suku 10, maibé suku rua, suku Benjamim no suku Judá, hili nafatin Roboão nuʼudar sira-nia liurai.

Jeroboão lakohi ninia povu bá Jeruzalein atu adora iha Jeová nia templu. Tan neʼe, nia halo karau-oan osan-mean rua, no haruka povu husi reinu suku 10 atu adora karau-oan sira-neʼe. Lakleur rai neʼe nakonu ho krime no violénsia.

Reinu suku rua mós hetan problema. Besik tinan lima depois Roboão sai liurai, Ejitu nia liurai mai funu hasoru Jeruzalein. Nia foti rikusoin barak husi Jeová nia templu. Tan neʼe, templu sai la hanesan.