Skip to content

Skip to table of contents

 ISTÓRIA 74

Mane ida neʼebé la taʼuk

Mane ida neʼebé la taʼuk

HAREE bá ema sira neʼebé goza mane iha neʼe. Hatene sé mak mane neʼe? Ida-neʼe mak Jeremias. Nia mak Maromak nia profeta ida neʼebé importante tebes.

Lakleur depois Liurai Josias hahú halakon estátua sira husi rai neʼe, Jeová haruka Jeremias atu sai Ninia profeta. Maibé, Jeremias hanoin katak ninia tinan seidauk toʼo atu sai profeta. Maski nuneʼe, Jeová hatete katak Nia sei ajuda Jeremias.

Jeremias hatete ba ema Izraél sira atu husik hahalok aat. Nia hatete: ‘Maromak sira neʼebé ema iha nasaun seluk adora mak falsu.’ Maibé ema Izraél barak gosta liu atu adora estátua sira-neʼe duké adora Maromak loos, Jeová. Bainhira Jeremias hatete ba ema katak Maromak sei fó kastigu ba sira tanba sira-nia hahalok aat, sira hamnasa deʼit ba nia.

Tinan ba tinan liu tiha, Josias mós mate. Liutiha fulan tolu, ninia oan-mane naran Jeoaquim mak sai liurai. Jeremias nafatin hatete ba ema: ‘Jeruzalein sei lakon se imi la troka imi-nia hahalok neʼebé aat.’ Amlulik sira kaer Jeremias no hakilar: ‘Ó tenke mate tanba koʼalia buat hanesan neʼe.’ Tuirmai, sira hatete ba liurai-oan sira iha Izraél: ‘Jeremias tenke hetan kastigu-mate, tanba nia koʼalia aat hasoru ita-nia sidade neʼe.’

Saida mak Jeremias sei halo agora? Nia la taʼuk! Nia hatete ba sira hotu: ‘Jeová haruka haʼu atu koʼalia buat hirak-neʼe ba imi. Se imi la troka imi-nia moris neʼebé aat, Jeová sei halakon duni Jeruzalein. Maibé hanoin didiʼak: Se imi oho haʼu, imi sei oho ema ida neʼebé la halo buat neʼebé sala.’

Liurai-oan sira husik Jeremias moris, maibé ema Izraél sira la troka sira-nia hahalok neʼebé aat. Liutiha tempu balu, Nabucodonosor, liurai Babilónia, mai atu funu hasoru Jeruzalein. Ikusmai, Nabucodonosor halo ema Izraél sai ninia atan. Nia lori sai ema rihun ba rihun ba Babilónia. Hanoin toʼok, oinsá mak ó sente se ema neʼebé ó la hatene lori ó husi uma bá rai seluk neʼebé ó la hatene!