Skip to content

Skip to table of contents

 ISTÓRIA 75

Mane-klosan naʼin-haat iha Babilónia

Mane-klosan naʼin-haat iha Babilónia

LIURAI Nabucodonosor lori ema Izraél sira neʼebé iha edukasaun boot liu atu bá Babilónia. Depois neʼe, liurai hili mane-klosan sira neʼebé bonitu liu no matenek liu husi ema sira-neʼe. Balu mak mane-klosan naʼin-haat neʼebé ó haree iha neʼe. Ida mak Daniel, no sira seluk mak ema Babilónia bolu Sadraque, Mesaque, no Abednego.

Nabucodonosor halo planu atu fó treinu ba mane-klosan sira atu serbí iha ninia uma. Kuandu treinu ba tinan tolu ramata tiha, nia sei hili ema matenek liu deʼit mak ajuda nia atu rezolve problema. Liurai hakarak mane-klosan sira-neʼe atu sai forte no isin-diʼak durante tempu neʼebé sira simu treinu. Tan neʼe, nia haruka ba ninia atan sira atu fó ba joven sira neʼe hotu hahán kapás no tua-uvas hanesan ho liurai no ninia família nian.

Haree bá mane-klosan Daniel. Hatene saida mak nia koʼalia daudauk ba Aspenaz, xefe ba Nabucodonosor nia atan sira? Daniel hatete katak nia lakohi simu hahán diʼak husi liurai nia meza. Maibé, Aspenaz laran-susar. Nia hatete: ‘Liurai deside tiha ona kona-ba saida mak imi han no hemu. Se nia haree imi la iha isin-diʼak hanesan ho joven seluseluk, nia sei oho haʼu.’

Daniel bá hasoru ema ida neʼebé Aspenaz hili atu tau matan ba nia no ninia kolega naʼin-tolu. Daniel hatete: ‘Halo favór, koko ami ba loron sanulu. Fó mai ami modo baibain deʼit no bee atu hemu. Depois neʼe, kompara ami ho joven seluseluk neʼebé han liurai nia hahán, no haree toʼok sé mak iha isin-diʼak liu.’

Ema neʼe simu atu halo nuneʼe. Liutiha loron 10, nia haree katak Daniel no ninia kolega naʼin-tolu mak isin-diʼak liu fali joven seluseluk hotu. Tan neʼe, nia husik sira atu han nafatin modo baibain duké han buat neʼebé liurai fó.

Tinan tolu ramata tiha, joven sira hotu tenke bá hasoru Liurai Nabucodonosor. Koʼalia tiha ho sira hotu, liurai hatene katak Daniel no ninia kolega naʼin-tolu mak matenek liu. Tan neʼe, nia hili sira atu ajuda nia iha ninia uma. Kuandu liurai husu pergunta ruma ba Daniel, Sadraque, Mesaque no Abednego, ka husu kona-ba problema neʼebé susar, sira hatene liu fali ninia amlulik no matenek-naʼin sira dala sanulu. Dezeñu iha pájina tomak