Skip to content

Skip to table of contents

 ISTÓRIA 70

Jonas no ikan boot

Jonas no ikan boot

HAREE bá ema iha bee laran. Nia iha problema boot, loos ka lae? Ikan neʼe atu besik tolan nia! Hatene sé mak ema neʼe? Ninia naran mak Jonas. Mai ita haree tansá mak nia hetan susar hanesan neʼe.

Jonas mak Jeová nia profeta ida. Lakleur depois profeta Eliseu mate, Jeová hatete ba Jonas: ‘Bá sidade boot Nínive. Ema nia hahalok aat iha neʼebá mak boot tebes, no haʼu hakarak ó atu koʼalia ba sira kona-ba neʼe.’

Maibé, Jonas la gosta atu bá. Entaun, nia saʼe ró atu bá fatin seluk neʼebé dook husi Nínive. Jeová la kontente tanba Jonas halai-sees. Tan neʼe, Nia halo anin-fuik neʼebé boot. Anin neʼe makaʼas tebetebes toʼo ró atu mout. Ró-naʼin sira taʼuk tebes, no hakilar ba sira-nia maromak atu ajuda.

Ikusliu, Jonas hatete ba sira: ‘Haʼu adora Jeová, Maromak neʼebé kria lalehan no Rai. Haʼu halai husi buat neʼebé Jeová haruka haʼu atu halo.’ Ró-naʼin sira husu: ‘Saida mak ami tenke halo ba ó atu anin neʼe bele para?’

Jonas hatete: ‘Soe tiha haʼu ba tasi laran, no tasi sei kalma fali.’ Ró-naʼin sira la gosta halo hanesan neʼe, maibé anin huu makaʼas liután, no ikusmai, sira soe duni Jonas husi ró. Oras neʼe kedas, anin para, no tasi sai kalma fali.

Jonas mout daudauk iha tasi laran, no ikan boot tolan nia. Maibé, nia la mate. Durante loron tolu no kalan tolu, nia iha ikan neʼe nia kabun laran. Jonas sente triste tebes tanba nia la halo tuir Jeová no la bá Nínive. Tan neʼe, hatene ka lae, saida mak Jonas halo?

Jonas harohan ba Jeová hodi husu ajuda. Jeová halo ikan neʼe muta fali Jonas iha rai-maran. Depois neʼe, Jonas bá fali toʼo Nínive. Ida-neʼe hanorin mai ita katak importante tebes atu ita halo buat saida deʼit neʼebé Jeová haruka, loos ka lae? Dezeñu iha pájina tomak

Livru Jonas iha Bíblia laran.