Skip to content

Skip to table of contents

 ISTÓRIA 58

David no Golias

David no Golias

EMA Filístia mai fali atu funu hasoru ema Izraél. David nia maun boot naʼin-tolu tama iha Saul nia tropa. Loron ida, Jessé hatete ba David: ‘Lori ai-han ba ó-nia maun sira. Haree sira oinsá.’

Kuandu David toʼo iha soldadu nia fatin, nia halai ba funu fatin atu buka ninia maun sira. Jigante Filístia naran Golias mai atu goza ema Izraél. Nia goza sira dadeer-dadeer no kalan-kalan ba loron 40 tiha ona. Nia hakilar: ‘Hili ema ida atu hasoru haʼu. Se nia manán no oho haʼu, ami sei sai imi-nia atan. Maibé, se haʼu manán no oho nia, imi sei sai ami-nia atan. Haʼu sadik imi atu hili ema ida atu hasoru haʼu.’

David husu soldadu balu: ‘Mane neʼebé oho ema Filístia neʼe no halo Izraél la moe tan, sei simu saida?’

Soldadu ida hatete: ‘Saul sei fó rikusoin barak, no fó ninia oan-feto rasik nuʼudar feen.’

Maibé, ema Izraél hotu taʼuk Golias, tanba nia boot tebes. Nia ain-aas besik metru tolu, no Golias iha soldadu ida atu kaer ninia eskudu.

Soldadu balu bá fó-hatene Saul katak David hakarak hasoru Golias. Maibé Saul hatete ba David: ‘Ó la bele hasoru ema Filístia neʼe. Ó sei joven, maibé nia, ninia moris tomak nuʼudar soldadu.’ David hatán: ‘Haʼu oho tiha ona ursu ida no leaun ida neʼebé foti haʼu-nia aman nia bibi. No ema Filístia neʼe sei sai hanesan sira. Jeová sei ajuda haʼu.’ Nuneʼe, Saul hatete: ‘Bá, bá ho Jeová.’

David bá foti fatuk kabeer lima husi mota-oan, no tau iha ninia pasta. Depois, nia foti ninia tali atu soe fatuk, no sai atu hasoru jigante neʼe. Kuandu Golias haree David, nia la fiar. Nia hanoin fasil deʼit atu oho David.

Golias hatete: ‘Mai deʼit, no haʼu sei fó ó-nia isin-mate ba manu no animál atu han.’ Maibé David hatete: ‘Ó mai hasoru haʼu ho surik no diman, maibé haʼu mai hasoru ó ho Jeová nia naran. Loron neʼe, Jeová sei husik ó iha haʼu-nia liman no haʼu sei oho ó.’

Iha tempu neʼebá kedas, David halai ba Golias. Nia foti fatuk ida husi ninia pasta, tau iha tali, no soe ho ninia forsa hotu. Fatuk neʼe kona Golias iha ninia reen-toos, no nia monu mate! Kuandu ema Filístia haree katak sira-nia asuwaʼin mate tiha ona, sira halai. Ema Izraél halai tuir sira no manán funu neʼe.