Skip to content

Skip to table of contents

 ISTÓRIA 54

Mane forte liu hotu

Mane forte liu hotu

HATENE mane forte liu hotu neʼebé uluk moris nia naran? Nia mak juis ida naran Sansão. Jeová mak fó forsa ba Sansão. Liuliu, antes Sansão moris, Jeová fó-hatene ninia inan: ‘Lakleur ó sei hetan oan-mane ida. Nia sei lori Izraél hodi salva sira husi ema Filístia.’

Povu Filístia neʼebé aat tebes hela iha Kanaan. Sira iha soldadu barak, no sira haterus ema Izraél. Loron ida, kuandu Sansão laʼo ba ema Filístia nia fatin, nia hasoru leaun boot ho lian makaʼas. Maibé, Sansão oho leaun neʼe ho liman mamuk deʼit. Nia mós oho ema Filístia neʼebé aat naʼin atus ba atus.

Lakleur, Sansão laran monu ba feto ida naran Dalila. Ulun-naʼin Filístia sira promete katak se Dalila fó-hatene saida mak halo Sansão forte liu, sira ida-ida sei fó Dalila osan-mutin 1.100. Dalila hakarak osan neʼe. Nia laʼós belun loos ba Sansão, no ba Maromak nia povu. Nuneʼe, nia husu Sansão dala barak kona-ba saida mak halo nia forte liu.

Ikusmai, Dalila konsege halo Sansão fó-hatene segredu kona-ba ninia forsa. Sansão hatete: ‘Durante moris haʼu-nia fuuk nunka tesi. Husi tempu haʼu moris-mai, Maromak hili haʼu atu sai atan espesiál nuʼudar nazireu. Se tesi haʼu-nia fuuk, haʼu-nia forsa sei lakon.’

Entaun, kuandu Dalila rona ida-neʼe, nia husik Sansão toba iha ninia kelen. Depois nia bolu ema ida atu tesi Sansão nia fuuk. Bainhira Sansão hadeer, ninia forsa lakon tiha ona. Ema Filístia mai no kaer nia. Sira hasai ninia matan rua, no halo nia sai atan.

Loron ida, ema Filístia iha festa boot atu adora sira-nia maromak Dagon, no sira lori Sansão husi kadeia atu goza nia. Maibé, agora Sansão nia fuuk sai naruk fali. Sansão hatete ba labarik neʼebé lori nia: ‘Husik haʼu kaer koluna neʼebé tahan uma neʼe.’ Sansão halo orasaun kedas atu husu Jeová fó forsa ba nia, no nia kaer koluna sira-neʼe. Nia hakilar: ‘Husik haʼu mate hamutuk ho ema Filístia.’ Ema Filístia naʼin-3.000 iha festa neʼe, no bainhira Sansão dudu koluna sira-neʼe, uma monu no ema aat hotu neʼe mate.