Skip to content

Skip to table of contents

 ISTÓRIA 51

Rute no Noemi

Rute no Noemi

IHA Bíblia laran iha livru ida naran Rute. Livru neʼe mak istória kona-ba família ida neʼebé moris iha tempu neʼebé Izraél iha juis sira. Rute feto husi rai Moab; nia laʼós husi Maromak nia nasaun Izraél. Maibé, kuandu Rute aprende kona-ba Maromak loos, Jeová, nia hadomi tebes Jeová. Noemi mak feto idade liu neʼebé ajuda Rute aprende kona-ba Jeová.

Noemi feto Izraél ida. Iha tempu neʼebé Izraél hahán ladún iha, nia hamutuk ho nia laʼen no oan-mane naʼin-rua muda ba rai Moab. Loron ida, Noemi nia laʼen mate. Depois, ninia oan naʼin-rua kaben ho feto Moab naran Rute no Orpa. Maibé, depois tinan 10 liu tiha, Noemi nia oan-mane naʼin-rua mós mate. Ida-neʼe halo Noemi no feto naʼin-rua neʼe triste tebetebes! Agora, Noemi sei halo saida?

Loron ida, Noemi deside atu laʼo-rai dook hodi fila fali ba ninia povu. Rute no Orpa hakarak hamutuk nia, nuneʼe sira mós bá. Maibé, depois sira laʼo dook uitoan Noemi hatete ba sira: ‘Fila fali ba uma no hela hamutuk imi-nia inan sira.’

Noemi reʼi feto sira-neʼe atu fó adeus. Sira tanis, tanba sira hadomi tebes Noemi. Sira hatete: ‘Lae! Ami sei bá hamutuk ho Ita toʼo Ita-nia povu.’ Maibé Noemi hatán: ‘Imi tenke bá fali, haʼu-nia oan-sira. Diʼak liu imi bá fali imi-nia uma.’ Nuneʼe Orpa komesa atu laʼo ba uma. Maibé Rute la bá.

Noemi hatete ba Rute: ‘Orpa bá tiha ona. Ó mós bá hamutuk ho nia.’ Maibé Rute hatán: ‘Labele obriga haʼu! Husik haʼu bá hamutuk Ita. Iha neʼebé Ita bá, haʼu sei bá. Iha neʼebé Ita hela, haʼu sei hela. Ita-nia povu sei sai haʼu-nia povu, no Ita-nia Maromak, haʼu-nia Maromak. Iha neʼebé Ita mate, haʼu sei mate, no iha neʼebá ema sei hakoi haʼu.’ Bainhira Rute hatete ida-neʼe, Noemi la obriga tan nia atu bá fali uma.

Ikusmai, feto naʼin-rua neʼe toʼo iha Izraél. Sira hela iha neʼebá. Rute komesa kedas atu halo serbisu iha toʼos, tanba tempu neʼebá ema koʼa natar. Mane ida naran Boaz husik Rute koʼa natar iha ninia toʼos. Hatene sé mak Boaz nia inan? Raab, husi sidade Jerikó.

Loron ida, Boaz hatete ba Rute: ‘Haʼu rona buat barak kona-ba Ita. Kona-ba oinsá Ita hatudu laran-diʼak ba Noemi. Haʼu hatene katak Ita husik Ita-nia aman no inan no rai atu hela hamutuk ho povu neʼebé Ita seidauk koñese. Haʼu hein katak Jeová haraik laran-diʼak ba Ita!’

Rute hatán: ‘Señór hatudu laran-diʼak mai haʼu. Señór halo haʼu sente diʼak liu tanba dalan diʼak neʼebé koʼalia mai haʼu.’ Boaz gosta Rute tebes, no lakleur sira naʼin-rua kaben. Hanoin toʼok, ida-neʼe halo Noemi kontente tebes! Maibé, Noemi kontente liután bainhira Rute no Boaz iha oan-mane primeiru naran Obed. Depois, Obed sai David nia avó. Ita sei aprende liután kona-ba David iha istória seluk.

Livru Rute iha Bíblia laran.