Skip to content

Skip to table of contents

 ISTÓRIA 9

Noé halo ró boot

Noé halo ró boot

NOÉ iha feen no oan-mane naʼin-tolu. Nia oan-mane nia naran mak Sem, Cam no Jafet. Sira naʼin-tolu iha feen. Nuneʼe iha Noé nia família iha ema naʼin-ualu.

Agora Maromak haruka Noé atu halo buat ida neʼebé lahanesan baibain. Nia haruka Noé atu halo ró boot. Ró boot neʼe haree hanesan kaixa ida neʼebé boot no naruk. Maromak hateten: ‘Halo ró boot toʼo andár tolu, no halo kuartu sira iha laran.’ Kuartu sira-neʼe ba Noé no nia família, animál sira, no ai-han neʼebé sira hotu presiza.

Maromak mós haruka Noé atu hametin ró boot neʼe hodi bee la bele tama. Maromak hateten: ‘Haʼu sei halo rai-nabeen boot atu sobu mundu tomak. Ema hotu neʼebé la tama iha ró boot neʼe sei mate.’

Noé no nia oan-mane sira halo tuir Jeová, no hahú halo ró boot neʼe. Maibé ema seluk hamnasa deʼit. Sira kontinua halo aat. La iha ema ida neʼebé fiar ba Noé kuandu nia fó-hatene sira saida mak Maromak sei halo.

Uza tempu barak atu halo ró boot neʼe, tanba boot tebetebes. Toʼo tinan barak, ró neʼe prontu. Agora, Maromak haruka Noé atu hatama animál oioin ba ró boot laran. Balun hatama rua-rua, aman ida no inan ida, no balun hatama toʼo hitu. Noé halo duni buat hotu neʼebé Maromak haruka nia atu halo.

Tuirmai, Noé no nia família mós tama ró boot. Depois Maromak mak taka odamatan. Iha ró boot nia laran, Noé no nia família hein udan. Hanoin toʼok katak ó hamutuk ho sira iha ró boot nia laran; imi hein udan deʼit. Rai-nabeen sei mosu tebes hanesan Maromak hateten ka lae?