Skip to content

Skip to table of contents

 KAPÍTULU 1

Maromak nia domin iha ba nafatin

Maromak nia domin iha ba nafatin

“Domin ba Maromak signifika katak ita halo tuir ninia ukun-fuan sira, no ninia ukun-fuan sira la susar liu atu kumpre.”​—1 JOÃO 5:3.

1, 2. Tanbasá mak Ita hadomi Maromak Jeová?

ITA hadomi Maromak ka lae? Karik Ita hadomi tebes nia toʼo Ita dedika Ita-nia an ba nia. Karik Ita sente katak nia mak Ita-nia Belun diʼak. Maski nuneʼe, antes Ita hadomi Jeová, nia mak hadomi uluk Ita. Bíblia hatete: “Ita hatudu domin tanba nia hadomi uluk ita.”​—1 João 4:19.

2 Mai ita hanoin kona-ba dalan oioin Jeová hatudu ona domin ba ita. Nia fó ita mundu furak nuʼudar hela-fatin no fó buat hotu neʼebé ita presiza atu bele moris kontente. (Mateus 5:45; Apokalipse 4:11) Nia hakarak ita atu iha relasaun diʼak ho nia, no nia mós loke dalan ba ita atu aprende kona-ba nia. Bainhira ita lee Bíblia, ita rona ba Jeová. Bainhira ita halo orasaun, nia rona ba ita. (Salmo 65:2) Nia dirije no hametin ita ho ninia espíritu santu neʼebé forsa boot. (Lucas 11:13) Nia mós haruka ninia Oan-Mane neʼebé nia hadomi atu mai toʼo mundu hodi halo ita livre husi sala no mate.​—Lee João 3:16; Roma 5:8.

3. Oinsá mak ita bele kontinua iha relasaun diʼak ho Jeová?

 3 Hanoin toʼok kona-ba belun diʼak ida neʼebé sempre hamaluk Ita iha tempu kontente no mós triste. Atu bele iha relasaun diʼak hanesan neʼe, ita presiza hakaʼas an. Nuneʼe mós ho ita-nia relasaun ho Jeová, ita-nia Belun neʼebé diʼak liu hotu. Ita bele iha relasaun neʼebé metin ho nia ba nafatin. Tan neʼe Bíblia dehan: “Hela nafatin iha Maromak nia domin.” (Judas 21) Oinsá? Bíblia hatán: “Domin ba Maromak signifika katak ita halo tuir ninia ukun-fuan sira, no ninia ukun-fuan sira la susar liu atu kumpre.”​—1 João 5:3.

“DOMIN BA MAROMAK SIGNIFIKA”

4, 5. Oinsá mak Ita-nia domin ba Jeová komesa sai buras?

4 Saida mak book Ita atu iha “domin ba Maromak”? Ita hanoin-hetan tempu neʼebé Ita foin komesa hadomi Jeová ka lae?

Bainhira Ita dedika Ita-nia an ba Jeová no hetan batizmu, Ita hatudu katak Ita hadomi nia no hakarak atu halo tuir nia ba nafatin

5 Hanoin kona-ba buat neʼebé Ita sente bainhira Ita foin aprende katak Jeová hakarak Ita atu moris ba nafatin iha mundu foun. Ita aprende ona buat hotu neʼebé nia halo hodi bele kumpre ninia hakarak, no Ita rekoñese katak prezente folin-boot liu neʼebé Jeová fó ona ba ita mak ninia Oan-Mane neʼebé nia haruka mai mundu. (Mateus 20:28; João 8:29; Roma 5:12, 18) Bainhira Ita hatene katak Jeová hadomi tebes Ita, ida-neʼe book Ita atu komesa hadomi nia.​—Lee 1 João 4:9, 10.

6. Hadomi ema ida envolve saida? Ita-nia domin ba Maromak book Ita rasik atu halo saida?

6 Maski nuneʼe, la toʼo atu sente deʼit domin ba  Maromak. Porezemplu, bainhira ita hadomi ema ida, ita la dehan deʼit “haʼu hadomi ó”, maibé ita mós presiza halo buat ruma. Ita-nia domin book ita atu halo kontente ema neʼe. Nuneʼe mós, Ita-nia domin ba Jeová book Ita atu halaʼo moris iha dalan neʼebé halo nia kontente. Bainhira domin neʼe sai boot, karik neʼe book Ita atu dedika Ita-nia an ba nia no hetan batizmu. Bainhira Ita dedika Ita-nia an, Ita promete atu serbí Jeová ba nafatin. (Lee Roma 14:7, 8.) Oinsá mak Ita bele kumpre promesa neʼe?

“ITA HALO TUIR NINIA UKUN-FUAN SIRA”

7. Se ita hadomi Jeová, ita sei halo saida? Saida mak Jeová nia ukun-fuan balu?

7 Tanba ita hadomi Jeová, “ita halo tuir ninia ukun-fuan sira”. Liuhusi Bíblia, ita aprende Jeová nia hakarak kona-ba oinsá atu halaʼo moris. Porezemplu, nia hatete ba ita katak sala atu sai lanu, naʼok, bosok, halo relasaun seksuál ho ema neʼebé laʼós ita-nia kaben, no adora ema ka buat seluk.​—1 Korinto 5:11; 6:18; 10:14; Éfeso 4:28; Koloso 3:9.

8, 9. Oinsá mak ita bele hatene Jeová nia hanoin kona-ba situasaun ruma se la iha ukun-fuan iha Bíblia kona-ba neʼe? Fó toʼok ezemplu.

8 Maibé atu halo Jeová kontente, la toʼo atu halo tuir deʼit ninia ukun-fuan, ita mós presiza halo buat seluk tan. Jeová la fó ukun-fuan ba situasaun hotu iha ita-nia moris. Tan neʼe, dala ruma ita sei la hetan ukun-fuan iha Bíblia neʼebé fó-hatene ita kona-ba buat neʼebé ita tenke halo. Entaun, oinsá mak ita bele halo desizaun diʼak? (Éfeso 5:17) Ita bele hetan  prinsípiu sira iha Bíblia, neʼe mak lia-loos báziku neʼebé hanorin ita Jeová nia hanoin. Se ita lee Bíblia, ita bele hatene didiʼak Jeová no komprende ninia hanoin, inklui buat neʼebé nia hadomi no odi.​—Lee Salmo 97:10; Provérbios 6:16-19; haree Apéndise 1.

9 Porezemplu, oinsá mak ita deside buat neʼebé ita bele haree iha televizaun ka internét? Jeová la fó ukun-fuan kona-ba saida mak ita tenke halo iha situasaun ida-idak. Maibé nia fó ita prinsípiu neʼebé bele ajuda ita atu halo desizaun diʼak. Ohin loron, atividade halimar nian barak nakonu ho violénsia no buat seksuál. Iha Bíblia, Jeová dehan katak “nia odi ema hotu neʼebé gosta violénsia” no nia “sei tesi-lia ba ema neʼebé halo sala seksuál”. (Salmo 11:5; Ebreu 13:4) Oinsá mak prinsípiu sira-neʼe ajuda ita atu halo desizaun diʼak? Se ita hatene katak Jeová odi buat ruma ka haree ida-neʼe nuʼudar buat neʼebé la morál, ita presiza hasees an husi buat sira-neʼe.

10, 11. Tanbasá ita halo tuir Jeová?

10 Tanbasá ita halo tuir Jeová? Neʼe laʼós tanba ita lakohi hetan kastigu ka lakohi hetan problema kuandu halo desizaun sala. (Galásia 6:7) Ita halo tuir Jeová tanba ita hadomi nia. Hanesan oan neʼebé hakarak halo ninia aman kontente, ita mós hakarak halo ita-nia Aman iha lalehan kontente. Halo Jeová kontente mak buat neʼebé diʼak liu hotu.​—Salmo 5:12; Provérbios 12:2; haree Apéndise 2.

11 Ita halo tuir Jeová laʼós deʼit bainhira fasil ka la iha opsaun seluk. Ita la hili ukun-fuan ka prinsípiu neʼebé mak ita hakarak atu halo tuir no lakohi  halo tuir. (Deuteronómio 12:32) Maibé, ita halo tuir Jeová iha buat hotu, hanesan ema neʼebé hakerek salmo ida. Nia dehan: “Haʼu gosta Ita-nia mandamentu sira, sin, haʼu hadomi sira.” (Salmo 119:47; Roma 6:17) Ita hakarak sai hanesan Noé, neʼebé hatudu domin ba Jeová hodi halo tuir buat hotu neʼebé Jeová haruka nia atu halo. Bíblia dehan katak Noé “halo nuneʼe duni”. (Génesis 6:22) Ita hakarak Jeová mós koʼalia hanesan neʼe kona-ba Ita ka lae?

12. Oinsá mak ita bele halo Jeová kontente?

12 Jeová sente oinsá bainhira ita halo tuir nia? Nia sente “laran haksolok”. (Provérbios 11:20; 27:11) Imajina toʼok, ita bele halo Kriadór ba universu sente haksolok se ita halo tuir nia. Maibé, nia nunka obriga ita. Nia fó ita liberdade atu hili. Neʼe katak ita livre atu deside atu halo buat neʼebé loos ka sala. Jeová hakarak ita atu halo desizaun diʼak tanba ita hadomi nia. Rezultadu mak ita bele halaʼo moris neʼebé diʼak liu.​—Deuteronómio 30:15, 16, 19, 20; haree Apéndise 3.

“NINIA UKUN-FUAN SIRA LA SUSAR LIU ATU KUMPRE”

13, 14. Oinsá mak ita hatene katak Jeová nia ukun-fuan sira la susar liu atu halo tuir? Fó toʼok ezemplu.

13 Oinsá se ita hanoin katak Jeová nia ukun-fuan mak susar liu atu halo tuir ka halakon ita-nia liberdade? Bíblia fó sai ho klaru, dehan: “Ninia ukun-fuan sira la susar liu atu kumpre.” (1 João 5:3) Liafuan Gregu neʼebé tradús nuʼudar “susar liu atu kumpre” bele mós signifika “todan”. Iha eskritura seluk,  liafuan neʼe uza atu refere ba lei neʼebé hatodan ema, ka ema neʼebé koko atu kontrola no fó-terus ba ema seluk. (Mateus 23:4; Apóstolu 20:29, 30) Maibé Jeová nia ukun-fuan la “todan”, neʼe katak la susar liu ba ita atu halo tuir. Nia nunka husu ita atu halo buat neʼebé liu fali ita-nia kbiit.

14 Porezemplu, imajina toʼok Ita ajuda belun ida muda ba uma foun. Nia haloot ninia sasán hotu iha kaixa sira. Kaixa balu mak kmaan no fasil atu hiʼit, kaixa seluk todan no presiza ema naʼin-rua atu hiʼit. Ita-nia kolega sei husu Ita atu hiʼit kaixa neʼebé todan mesak deʼit ka lae? Lae duni! Tanbasá? Tanba nia lakohi Ita-nia kotuk moras. Nuneʼe mós ho Jeová, nia sei nunka husu ita atu halo buat neʼebé susar liu. (Deuteronómio 30:11-14) Jeová komprende ita. Nia “hatene ho didiʼak nia kria ita husi saida, no nia hanoin-hetan katak ita mak rai-rahun deʼit”.​—Salmo 103:14.

15. Tanbasá ita bele fiar katak Jeová nia ukun-fuan sira sei lori buat diʼak ba ita?

15 Moisés hatete ba nasaun Izraél katak bainhira sira halo tuir Jeová nia ukun-fuan, neʼe sempre “lori diʼak” ba sira no sira bele “kontinua moris”. (Deuteronómio 5:28-33; 6:24) Nuneʼe mós ho ohin loron. Buat hotu neʼebé Jeová husu ita atu halo sei lori diʼak ba ita-nia moris. (Lee Isaias 48:17.) Ita-nia Aman Jeová sempre hatene buat neʼebé diʼak ba ita. (Roma 11:33) Bíblia hatete: “Maromak mak domin.” (1 João 4:8) Neʼe katak Jeová koʼalia no halo buat hotu tanba domin.

16. Oinsá mak ita hatene katak ita bele halo tuir Jeová maski ita la perfeitu no moris iha mundu aat?

 16 Dala barak la fasil atu halo tuir Jeová. Ita moris iha mundu aat neʼebé Diabu mak ukun. Nia koko atu book ema halo hahalok aat. (1 João 5:19) Ita-nia hanoin no sentimentu neʼebé la perfeitu mós bele book ita atu la halo tuir Maromak, tan neʼe mak ita tenke luta hasoru buat sira-neʼe. (Roma 7:21-25) Maibé ita-nia domin ba Maromak fó ita kbiit atu halo buat neʼebé loos. Maromak haree ita-nia hakaʼas an atu halo tuir nia, no nia ajuda ita hodi fó ninia espíritu santu neʼebé forsa boot. (1 Samuel 15:22, 23; Apóstolu 5:32) Espíritu santu ajuda ita atu haburas hahalok diʼak neʼebé sei halo fasil ba ita atu halo tuir nia.​—Galásia 5:22, 23.

17, 18. (a) Ita sei aprende saida iha livru neʼe? (b) Ita sei aprende saida iha kapítulu tuirmai?

17 Iha livru neʼe, ita sei aprende oinsá atu halaʼo ita-nia moris iha dalan neʼebé halo Maromak kontente. Ita sei aprende oinsá atu aplika Maromak nia prinsípiu no matadalan sira kona-ba morál iha ita-nia moris. Hanoin-hetan katak Jeová nunka obriga ita atu halo tuir nia. Bainhira ita deside atu halo tuir nia, ita-nia moris sei sai diʼak liu no ita sei iha futuru neʼebé diʼak. Importante liu mak bainhira ita halo tuir Maromak, ita hatudu katak ita hadomi tebes nia.​—Haree Apéndise 4.

18 Jeová fó konxiénsia ba ita ida-idak atu ajuda ita hatene buat neʼebé loos no sala. Se ita treinu ita-nia konxiénsia, neʼe bele ajuda ita atu “halo tuir ninia ukun-fuan sira”. Entaun, saida mak konxiénsia? Oinsá atu treinu ida-neʼe? Mai ita haree.