Skip to content

Skip to table of contents

 KAPÍTULU 4

Sé mak Jesus Kristu?

Sé mak Jesus Kristu?

1, 2. (a) Se Ita hatene ema-boot ida nia naran, neʼe katak Ita hatene didiʼak ema neʼe ka lae? Bele esplika toʼok. (b) Ema balu hanoin saida kona-ba Jesus?

IHA mundu tomak, iha ema barak neʼebé naran-boot. Karik Ita mós hatene ema-boot balu nia naran. Maibé hatene ema-boot ida nia naran la dehan katak Ita hatene didiʼak nia, ninia moris no buat neʼebé nia gosta.

2 Karik Ita rona istória kona-ba Jesus Kristu, neʼebé moris iha mundu maizumenus tinan 2.000 liubá. Maibé ema barak ladún hatene nia ema oinsá. Ema balu hatete katak nia mak ema neʼebé diʼak, balu tan hanoin nia mak profeta, no iha mós ema neʼebé fiar katak nia mak Maromak. Oinsá ho Ita?​—Haree Apéndise 12.

3. Tanbasá mak importante ba Ita atu hatene didiʼak Maromak Jeová no mós Jesus Kristu?

3 Importante ba Ita atu hatene didiʼak Jesus. Tanbasá? Bíblia hatete: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit, no mós Jesus Kristu neʼebé Ita haruka mai.” (João 17:3) Se Ita hatene lia-loos kona-ba Jeová no Jesus, Ita bele moris ba nafatin iha mundu paraízu. (João 14:6) Hodi hatene kona-ba Jesus, neʼe mós bele ajuda Ita ohin loron tanba nia fó ona ezemplu neʼebé diʼak liu hotu kona-ba oinsá atu halaʼo moris no oinsá atu hatudu hahalok diʼak ba ema seluk. (João 13:34, 35) Iha Kapítulu 1, ita aprende ona lia-loos kona-ba  Maromak. Agora, mai ita aprende saida mak Bíblia hanorin kona-ba Jesus.

AMI HETAN ONA MESIAS!

4. Liafuan “Mesias” no “Kristu” katak sá?

4 Tinan barak antes Jesus moris, Jeová promete ona iha Bíblia katak nia sei haruka Mesias, ka Kristu. Liafuan “Mesias” mak lian Ebraiku, no “Kristu” mak lian Gregu. Títulu rua neʼe refere ba ema neʼebé Maromak hili, no simu pozisaun espesiál. Mesias neʼe sei kumpre Maromak nia promesa hotu, no ajuda ita neʼebé moris ohin loron. Maibé antes Jesus moris, ema barak hanoin: ‘Sé mak sei sai Mesias?’

5. Jesus nia dixípulu sira fiar saida kona-ba nia?

5 Jesus nia dixípulu sira fiar duni katak nia mak Mesias neʼebé Maromak promete nanis ona. (João 1:41) Porezemplu, Simão Pedro hatete ba Jesus: “Ita mak Kristu.” (Mateus 16:16) Mai ita buka-hatene oinsá mak ita bele fiar katak Jesus mak Mesias.

6. Oinsá mak Jeová ajuda ema neʼebé laran-moos atu hatene Mesias?

6 Tinan barak antes Jesus moris, Maromak nia profeta sira fó sai informasaun barak neʼebé bele ajuda ema atu hatene Mesias. Oinsá? Hanoin toʼok, Ita-nia kolega husu Ita atu bá terminál bís hodi hasoru ema oin-foun ida. Se Ita-nia kolega esplika didiʼak kona-ba ema neʼe, neʼe ajuda Ita atu buka-hetan nia. Jeová mós uza ninia profeta sira atu fó-hatene ita kona-ba buat neʼebé Mesias sei halo no buat neʼebé sei akontese ba nia. Liuhusi profesia sira neʼebé kumpre ona, ema neʼebé laran-moos bele hatene katak Jesus mak Mesias.

7. Oinsá mak profesia rua hatudu katak Jesus mak Mesias?

 7 Agora, mai ita hanoin kona-ba profesia rua. Primeiru, tinan 700 antes Jesus moris, profeta Miqueias fó-hatene nanis katak Mesias sei moris iha sidade kiʼik ida naran Belein. (Miqueias 5:2) No Jesus moris duni iha Belein. (Mateus 2:1, 3-9) Segundu, Daniel fó-hatene nanis katak Mesias sei mai iha tinan 29 EC. (Daniel 9:25) Profesia rua neʼe no mós profesia seluk tan hatudu ho momoos katak Jesus mak Mesias neʼebé Maromak promete ona.​—Haree Apéndise 13.

Bainhira Jesus hetan batizmu, nia sai Mesias, ka Kristu

8, 9. Iha tempu neʼebé Jesus hetan batizmu, saida deʼit mak hatudu katak nia mak Mesias?

8 Jeová hatudu ho klaru katak Jesus mak Mesias. Maromak promete atu fó sinál ida ba João Batista hodi nuneʼe nia bele hatene sé mak Mesias. João haree sinál neʼe kuandu nia fó batizmu ba Jesus iha Mota Jordaun iha tinan 29 EC. Bíblia konta: “Depois Jesus hetan tiha batizmu, nia sai kedas husi bee laran. Iha momentu neʼebá, lalehan nakloke, no nia haree Maromak nia espíritu hanesan manu-pombu ida tun ba Jesus. No mós lian ida sai husi lalehan dehan: ‘Neʼe mak haʼu-nia Oan-Mane neʼebé haʼu hadomi, neʼebé halo haʼu-nia laran kontente.’” (Mateus 3:16, 17) Bainhira João haree sinál neʼe no rona Maromak nia liafuan, nia hatene katak Jesus mak Mesias. (João 1:32-34) Loos duni, bainhira Jeová haraik ninia espíritu  santu ba Jesus iha tempu neʼebá, Jesus sai Mesias neʼebé Maromak hili ona atu sai Liurai.​—Isaias 55:4.

9 Bíblia nia profesia sira, Jeová rasik nia liafuan no sinál neʼebé mosu bainhira Jesus hetan batizmu, hatudu ho klaru katak Jesus mak Mesias. Maibé Jesus mai husi neʼebé? Nia mak ema hanesan saida? Mai ita buka-hatene resposta husi Bíblia.

 JESUS MAI HUSI NEʼEBÉ?

10. Bíblia hanorin saida kona-ba Jesus antes nia mai mundu?

10 Bíblia hanorin katak Jesus hela iha lalehan ba tempu kleur tebes antes nia mai toʼo mundu. Profeta Miqueias hatete katak Mesias moris ona “husi tempu antigu”. (Miqueias 5:2) Jesus rasik mós hatete beibeik katak antes nia moris nuʼudar ema, nia hela iha lalehan. (Lee João 3:13; 6:38, 62; 17:4, 5.) Jesus iha ona relasaun espesiál ho Maromak Jeová antes nia mai iha mundu.

11. Tanbasá Jesus mak espesiál tebes ba Jeová?

11 Jesus mak espesiál tebes ba Jeová. Tanbasá? Tanba Maromak kria ulukliu Jesus antes nia kria buat seluk hotu, nuneʼe Bíblia bolu Jesus nuʼudar “oan primeiru husi kriasaun hotu”. * (Koloso 1:15) Jeová hadomi tebes Jesus tanba só Jesus deʼit mak Jeová kria rasik. Tan neʼe Bíblia bolu Jesus nuʼudar “Oan-Mane mesak”. (João 3:16) Jeová mós uza Jesus mesak deʼit atu kria buat seluk hotu. (Koloso 1:16) Liután neʼe, Jesus deʼit mak Bíblia bolu nuʼudar “Liafuan” tanba Jeová uza nia atu hatoʼo Ninia lia-menon no matadalan ba ema no anju sira.​—João 1:14.

12. Oinsá mak ita bele hatene katak Jesus laʼós Maromak?

12 Ema balu fiar katak Jesus mak Maromak. Maibé Bíblia la hanorin hanesan neʼe. Bíblia hatete katak Maromak mak kria Jesus, neʼe katak Jesus iha hun. Maibé Jeová, neʼebé kria buat hotu-hotu, nia la iha hun no la  iha rohan. (Salmo 90:2) Nuʼudar Maromak nia Oan, Jesus nunka hanoin atu sai Maromak. Bíblia hanorin ho klaru katak Aman mak boot liu Oan. (Lee João 14:28; 1 Korinto 11:3) Jeová mesak deʼit mak “Maromak neʼebé Kbiit Boot Liu Hotu”. (Génesis 17:1) Jeová mak boot liu no forsa liu hotu iha lalehan no rai.​—Haree “Trindade” iha Apéndise 14.

13. Tanbasá Bíblia hatete Jesus mak “ilas husi Maromak neʼebé matan labele haree”?

13 Antes kria lalehan no rai, Jeová no ninia Oan-Mane Jesus serbisu hamutuk ba tinan rihun ba rihun, no sira hadomi malu tebes. (João 3:35; 14:31) Jesus halo tuir ninia aman nia hahalok furak sira, tan neʼe Bíblia hatete katak Jesus mak “ilas husi Maromak neʼebé matan labele haree”.​—Koloso 1:15.

14. Oinsá mak Jeová nia Oan doben moris nuʼudar ema?

14 Jeová nia Oan doben Jesus prontu atu husik lalehan no mai toʼo mundu hodi moris nuʼudar ema. Oinsá mak ida-neʼe bele akontese? Jeová halo milagre ida hodi muda ninia Oan nia moris husi lalehan ba feto virjen ida nia knotak. Feto neʼe mak Maria. Tan neʼe, Jesus la iha aman iha mundu. Ikusmai, Maria tuur ahi oan-mane perfeitu ida no hanaran nia Jesus.​—Lucas 1:30-35.

JESUS MAK EMA HANESAN SAIDA?

15. Saida mak ita presiza halo atu hatene didiʼak Maromak Jeová?

15 Kuandu Ita lee livru Evanjellu Mateus, Marcos, Lucas no João, Ita bele aprende buat barak kona-ba Jesus nia moris no hahalok sira. Husi livru sira-neʼe, Ita mós bele hatene didiʼak Maromak Jeová tanba  Jesus haleno duni ninia Aman nia hahalok. Jesus rasik hatete: “Ema neʼebé haree ona haʼu, haree ona mós Aman.”​—João 14:9.

16. Jesus hanorin kona-ba saida? Ninia hanorin mai husi neʼebé?

16 Ema barak bolu Jesus nuʼudar “Mestre”. (João 1:38; 13:13) Buat importante liu neʼebé Jesus hanorin mak “liafuan diʼak kona-ba Maromak nia Ukun”. Maromak nia Ukun mak saida? Neʼe mak Maromak nia governu iha lalehan neʼebé sei ukun mundu tomak no lori bensaun ba ema neʼebé halo tuir nia. (Mateus 4:23) Jesus nia hanorin hotu mai husi Jeová. Jesus hatete: “Buat neʼebé haʼu hanorin ba imi laʼós haʼu-nian, maibé husi Ida neʼebé haruka haʼu mai.” (João 7:16) Jesus hatene katak Jeová hakarak ema rona liafuan diʼak kona-ba Ninia governu neʼebé sei ukun mundu tomak.

17. Jesus hanorin ema iha neʼebé? Tanbasá mak nia hakaʼas an atu hanorin ema?

17 Jesus hanorin ema iha neʼebé? Iha fatin naran deʼit neʼebé ema iha. Nia hanorin iha sidade, foho, merkadu, fatin adorasaun, no mós iha ema nia uma. Nia la hein atu ema seluk mak vizita nia, maibé nia rasik mak bá buka ema. (Marcos 6:56; Lucas 19:5, 6) Jesus hakaʼas an hodi uza ninia tempu no forsa atu hanorin ema. Tanbasá? Tanba nia hatene katak neʼe mak Maromak nia hakarak no nia sempre halo tuir ninia Aman. (João 8:28, 29) Jesus mós haklaken ho badinas tanba nia hanoin ema. (Lee Mateus 9:35, 36.) Nia haree katak ulun-naʼin relijiaun sira la hanorin lia-loos kona-ba Maromak no Ninia Ukun. Tan neʼe, Jesus hakarak ajuda ema barak liután atu rona liafuan diʼak.

18. Jesus nia hahalok saida deʼit mak Ita gosta?

 18 Jesus hadomi no hanoin ema seluk. Nia mak ema neʼebé laran-diʼak no fasil atu hakbesik. Labarik sira mós gosta atu hakbesik ba nia. (Marcos 10:13-16) Jesus la fihir ema. Nia odi korrupsaun no buat neʼebé la justisa. (Mateus 21:12, 13) Maski Jesus moris iha tempu neʼebé ema la respeitu no la hafolin feto sira, maibé nia sempre hatudu respeitu no laran-diʼak ba feto sira. (João 4:9, 27) Jesus mós hatudu hahalok haraik an. Porezemplu, iha kalan ida, nia fase ninia apóstolu sira-nia ain maski baibain neʼe mak atan sira-nia serbisu.​—João 13:2-5, 12-17.

Jesus haklaken iha fatin hotu ne’ebé ema iha

19. Ezemplu saida mak hatudu katak Jesus hatene ema seluk nia presiza no nia mós hakarak ajuda sira?

19 Jesus hatene ema seluk nia presiza, no nia mós hakarak ajuda sira. Tan neʼe, nia uza Maromak nia forsa atu halo milagre oioin hodi kura ema. (Mateus 14:14) Porezemplu, mane moras-lepra ida hakbesik ba Jesus no hatete: “Se Ita-Boot hakarak, Ita bele halo haʼu sai moos.” Jesus komprende mane neʼe nia situasaun susar. Jesus mós hanoin tebes mane neʼe no hakarak ajuda nia. Tan neʼe, Jesus lolo liman hodi kaer mane neʼe, no dehan: “Haʼu hakarak! Sai moos bá.” No mane neʼe sai isin-diʼak fali! (Marcos 1:40-42) Ita bele fiar katak mane neʼe sente haksolok tebes!

SEMPRE HALO TUIR NINIA AMAN

20, 21. Oinsá mak Jesus hatudu ezemplu neʼebé diʼak liu hotu kona-ba halo tuir Maromak?

20 Jesus hatudu ezemplu neʼebé diʼak liu hotu kona-ba halo tuir Maromak. Nia sempre halo tuir ninia Aman nia hakarak maski nia hasoru situasaun susar  ka inimigu sira halo aat ba nia. Porezemplu, Jesus la monu ba Satanás nia tentasaun. (Mateus 4:1-11) Maski Jesus nia família rasik la fiar katak nia mak Mesias no hatete katak nia “bulak ona”, maibé Jesus kontinua halaʼo Maromak nia serbisu. (Marcos 3:21) Jesus halo tuir Maromak nia hakarak no nunka selu aat ba ema neʼebé odi no fó susar ba nia.​—1 Pedro 2:21-23.

21 Maski Jesus hetan terus boot toʼo ikusmai mate, nia nafatin halo tuir Jeová. (Lee Filipe 2:8.) Imajina toʼok kona-ba terus oioin neʼebé Jesus tenke tahan iha ninia loron ikus. Ema kaer nia, fó sasin falsu katak nia koʼalia aat hasoru Maromak, juís sira la tesi-lia tuir justisa, ema-lubun hamnasa nia, soldadu sira haterus nia no prega nia iha ai-riin. Ikusmai, bainhira  Jesus besik mate, nia dehan: “Buat hotu kumpre ona!” (João 19:30) Liutiha loron tolu, Jeová halo Jesus moris filafali nuʼudar kriatura espíritu ida. (1 Pedro 3:18) Semana balu liutiha, Jesus fila fali ba lalehan no “tuur ona iha Maromak nia liman sorin loos”, hodi hein ba tempu neʼebé Maromak foti nia nuʼudar Liurai.​—Ebreu 10:12, 13.

22. Tanba Jesus halo tuir ninia Aman, neʼe fó oportunidade saida mai ita?

22 Tanba Jesus halo tuir ninia Aman, ita iha oportunidade atu moris ba nafatin iha mundu paraízu, hanesan Jeová nia hakarak horiuluk kedas. Iha kapítulu tuirmai, ita sei koʼalia kona-ba oinsá mak Jesus nia mate loke dalan ba ita atu moris ba nafatin.

^ par. 11 Bíblia bolu Jeová nuʼudar Aman tanba nia mak Kriadór. (Isaias 64:8) Bíblia bolu Jesus nuʼudar Maromak nia Oan-Mane tanba Jeová mak kria nia. Nuneʼe mós ho anju no ema primeiru Adão, Bíblia bolu sira nuʼudar Maromak nia oan-mane.​​—Job 1:6, nota-rodapé; Lucas 3:38.