Skip to content

Skip to table of contents

 KAPÍTULU 8

Saida mak Maromak nia Ukun?

Saida mak Maromak nia Ukun?

1. Ita sei koʼalia kona-ba orasaun saida?

EMA rihun ba rihun hatene orasaun Ami Aman. Neʼe mak orasaun neʼebé Jesus hatoʼo atu hanorin ninia dixípulu sira kona-ba oinsá atu halo orasaun. Saida deʼit mak nia temi iha orasaun neʼe? Tanbasá mak orasaun neʼe importante ba ita ohin loron?

2. Jesus hanorin ita atu husu buat tolu saida?

2 Jesus hatete: “Imi tenke halo orasaun hanesan neʼe: ‘Ami Aman iha lalehan, halo Ita-nia naran sai santu. Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan.’” (Lee Mateus 6:9-13.) Tanbasá mak Jesus hanorin ita atu husu buat tolu neʼe?​—Haree Apéndise 20.

3. Saida deʼit mak ita presiza hatene kona-ba Maromak nia Ukun?

3 Ita hatene ona katak Maromak nia naran mak Jeová. Ita mós aprende ona kona-ba Maromak nia hakarak ba ema no mundu neʼe. Maibé Jesus nia liafuan “halo Ita-nia Ukun toʼo mai rai” katak sá? Mai ita aprende kona-ba saida mak Maromak nia Ukun, saida deʼit mak Ukun neʼe sei halo, no oinsá mak Ukun neʼe sei halo Maromak nia naran sai santu.

SAIDA MAK MAROMAK NIA UKUN?

4. Saida mak Maromak nia Ukun? Sé mak Liurai ba Ukun neʼe?

4 Jeová harii ona governu ida iha lalehan no hili Jesus nuʼudar Liurai. Tuir Bíblia, governu neʼe mak  Maromak nia Ukun. Jesus mak “Liurai ba sira neʼebé ukun nuʼudar liurai no Naʼi ba sira neʼebé ukun nuʼudar naʼi”. (1 Timóteo 6:15) Jesus bele halo buat neʼebé diʼak liu fali ukun-naʼin sira iha mundu, no nia iha forsa boot liu fali sira hotu.

5. Maromak nia governu iha neʼebé? Ida-neʼe sei ukun saida?

5 Liutiha loron 40 depois Jesus moris hiʼas, nia fila fali ba lalehan. Ikusmai, Jeová fó knaar ba Jesus atu sai Liurai ba Maromak nia Ukun. (Apóstolu 2:33) Maromak nia governu neʼe sei ukun mundu tomak husi lalehan. (Apokalipse 11:15) Tan neʼe mak Bíblia bolu Maromak nia Ukun nuʼudar “Ukun iha lalehan”.​—2 Timóteo 4:18.

6, 7. Tanbasá Jesus mak liurai neʼebé diʼak liu hotu?

6 Bíblia hanorin katak Jesus mak liurai neʼebé diʼak liu tanba “nia deʼit mak sei nunka mate”. (1 Timóteo 6:16) Ema hotu neʼebé sai ukun-naʼin, ikusmai sei mate. Maibé Jesus sei nunka mate, no buat diʼak hotu neʼebé nia halo sei nunka lakon.

7 Nuʼudar Liurai, Jesus sei ukun ho justisa no hanoin ema. Bíblia fó-hatene nanis mai ita: “Jeová nia espíritu sei tun ba nia, tan neʼe mak nia sei hatudu matenek no komprende ho didiʼak, nia sei fó konsellu diʼak no nia forte loos, nia sei iha koñesimentu barak no hamtaʼuk Jeová. No nia sei haksolok hodi hamtaʼuk Jeová. Nia sei la tesi-lia tuir deʼit buat neʼebé ninia matan haree, no nia sei la fó dixiplina [ka, konsellu] tuir deʼit buat neʼebé ninia tilun rona. Nia sei tesi-lia ba ema kiʼik [ka, kiak] sira ho loloos.” (Isaias 11:2-4) Ita hakarak liurai hanesan neʼe, loos ka lae?

8. Tanbasá mak ita bele fiar katak Jesus sei la ukun mesak?

 8 Maromak mós hili ema balu atu ukun hamutuk ho Jesus iha lalehan. Apóstolu Paulo hatete ba Timóteo: “Se ita kontinua atu tahan, ita mós sei ukun hamutuk ho nia nuʼudar liurai.” (2 Timóteo 2:12) Ema naʼin-hira mak sei ukun nuʼudar liurai hamutuk ho Jesus?

9. Ema naʼin-hira mak sei ukun hamutuk ho Jesus? Horibainhira mak Maromak komesa hili sira?

9 Hanesan ita aprende ona iha Kapítulu 7, apóstolu João haree vizaun ida kona-ba Liurai Jesus iha lalehan hamutuk ho liurai naʼin-144.000. Sira neʼebé hamutuk ho Jesus mak sé? Apóstolu João esplika katak “iha sira-nia reen-toos hakerek tiha Bibi-Oan nia naran no ninia Aman nia naran”. Tuirmai, João hatutan tan: “Sira kontinua laʼo tuir Bibi-Oan [katak, Jesus] ba fatin naran deʼit neʼebé nia bá. Sira mak ema neʼebé sosa ona husi ema nia leet.” (Lee Apokalipse 14:1, 4.) Ema naʼin-144.000 mak ema Kristaun neʼebé Maromak hili ona atu “ukun nuʼudar liurai ba mundu tomak”. Bainhira sira mate, sira hetan moris-hiʼas ba lalehan. (Apokalipse 5:10) Hahú husi apóstolu sira-nia tempu, Jeová hili ema Kristaun sira neʼebé fiar metin atu sai parte ba grupu liurai neʼe.

10. Tanbasá mak Jeová nia arranju atu ukun ema hatudu ninia domin?

10 Jeová hanoin tebes ita, tan neʼe nia halo arranju atu ema balu ukun hamutuk ho Jesus. Jesus sei ukun mundu ho didiʼak tanba nia komprende ita. Nia hatene ho loloos ema nia sentimentu no susar. Apóstolu Paulo hatete katak Jesus “hanoin no komprende ita-nia fraku sira” no “hetan ona koko iha buat hotu  hanesan ita”. (Ebreu 4:15; 5:8) Sira naʼin-144.000 mós hatene ema nia situasaun, no sira rasik mós uluk luta hasoru sira-nia fraku no moras. Tan neʼe, ita bele fiar katak Jesus no ema naʼin-144.000 sei komprende ita-nia sentimentu no problema neʼebé ita hasoru.

MAROMAK NIA UKUN SEI HALO SAIDA?

11. Tanbasá mak Jesus hanorin ninia dixípulu atu husu Maromak halo Ninia hakarak sai loos iha lalehan?

11 Tanbasá mak Jesus hanorin ninia dixípulu sira atu husu Maromak halo Ninia hakarak sai loos iha rai no mós iha lalehan? Iha Kapítulu 3, ita aprende ona katak Diabu Satanás kontra hasoru Jeová. Maibé Jeová husik Satanás no anju aat sira atu hela iha lalehan ba tempu balu. Neʼe katak durante tempu neʼe, anju balu iha lalehan la halo tuir Maromak nia hakarak. Iha Kapítulu 10, ita sei aprende liután kona-ba Satanás no anju aat sira.

12. Apokalipse 12:10 fó sai akontesimentu rua saida?

12 Bíblia esplika katak lakleur depois Jesus sai Liurai ba Maromak nia Ukun, nia halo funu hasoru Satanás. (Lee Apokalipse 12:7-10.) Versíkulu 10 esplika kona-ba akontesimentu rua neʼebé importante tebes. Primeiru, Maromak nia Ukun hahú ona no Jesus Kristu mak sai Liurai. Segundu, Jesus soe tun tiha Satanás ba rai. Lakleur, ita sei aprende katak buat rua neʼe akontese ona.

13. Bainhira soe tun tiha Satanás, saida mak akontese iha lalehan?

13 Tuir Bíblia, bainhira Jesus soe tun tiha Satanás husi lalehan, neʼe halo anju diʼak sira kontente tebes. Bíblia hatete: “Lalehan no imi neʼebé hela iha lalehan, haksolok bá!” (Apokalipse 12:12) Agora, kriatura hotu  iha lalehan halo tuir Maromak nia hakarak ho dame no unidade.

Jesus soe tun Satanás no anju aat sira husi lalehan, tan neʼe iha susar barak liután iha rai. Maibé lakleur susar sira-neʼe sei lakon ba nafatin

14. Tanba soe tun tiha Satanás, saida mak akontese iha mundu?

14 Maibé situasaun iha mundu neʼe sai susar. Buat aat oioin akontese tanba “Diabu tun tiha ona” no nia “hirus makaʼas, tanba nia hatene katak ninia tempu hela uitoan deʼit ona”. (Apokalipse 12:12) Satanás laran-nakali tanba Jesus soe tun tiha nia husi lalehan. Nia hatene katak lakleur tan Maromak sei halakon nia. Tan neʼe, nia koko makaʼas atu hamosu problema, susar no terus iha mundu tomak.

15. Saida mak Maromak nia hakarak ba mundu?

15 Maibé Maromak nia hakarak ba mundu neʼe la troka. Nia hakarak nafatin ema perfeitu atu moris ba nafatin iha mundu paraízu. (Salmo 37:29) Oinsá mak Maromak nia Ukun bele kumpre ida-neʼe?

16, 17. Daniel 2:44 hanorin saida kona-ba Maromak nia Ukun?

16 Daniel 2:44 fó-hatene nanis: “Iha liurai sira-neʼe nia tempu, Maromak iha lalehan sei harii ukun ida neʼebé sei nunka lakon. No ukun neʼe sei la entrega ba povu sira seluk. Ukun neʼe sei harahun no halakon liurai sira-neʼe hotu nia ukun, no ukun neʼe mesak mak sei hamriik ba nafatin.” Eskritura neʼe hanorin saida kona-ba Maromak nia Ukun?

17 Primeiru, Maromak nia Ukun sei hahú “iha liurai sira-neʼe nia tempu”. Neʼe katak Maromak nia Ukun hahú iha tempu neʼebé ema nia governu sira ukun hela mundu. Segundu, Maromak nia Ukun sei nunka lakon, no la iha governu ida mak sei troka ninia fatin. Terseiru, sei akontese funu ida entre Maromak nia Ukun no governu sira iha mundu neʼe.  Maromak nia Ukun mak sei manán, no Ukun neʼe mesak deʼit mak sei tau matan ba mundu tomak. Ikusmai, ema sei haksolok tanba governu neʼe mak diʼak liu hotu.

18. Funu ikus entre Maromak nia governu ho ema nia governu sira mak naran saida?

18 Saida deʼit mak sei akontese antes Maromak nia Ukun troka ema nia ukun? Antes funu ikus naran Armagedon hahú, anju aat sira sei lohi “liurai sira iha mundu tomak, atu bá funu iha Maromak neʼebé Kbiit Boot Liu Hotu nia loron boot”. Loos duni, ema nia governu sira sei halo funu hasoru Maromak nia Ukun.​—Apokalipse 16:14, 16; haree Apéndise 10.

19, 20. Tanbasá mak ita presiza Maromak nia Ukun?

19 Tanbasá mak ita presiza Maromak nia Ukun? Mai ita hanoin kona-ba razaun tolu. Primeiru, ita mak sala-naʼin, tan neʼe ita sai moras no mate. Maibé Bíblia hatete katak iha Maromak nia Ukun okos, ema sei moris ba nafatin. João 3:16 hatete: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.”

20 Razaun segundu mak ema aat sira haleʼu ita. Ema barak mak bosok-teen, lohidór no la iha morál. Ita labele hapara sira ka halakon sira-nia hahalok aat, maibé Maromak bele. Iha funu Armagedon, Maromak sei halakon ema aat neʼebé lakohi troka sira-nia hahalok. (Lee Salmo 37:10.) Razaun terseiru mak ema nia governu la iha kbiit atu rezolve problema iha mundu neʼe, sira hanehan povu no halo korrupsaun. Sira la ajuda ema atu halo tuir Maromak. Bíblia hatete katak  “ema mak domina ema seluk, no neʼe lori deʼit susar”.​—Eclesiastes 8:9.

21. Oinsá mak Maromak nia Ukun sei kumpre ninia hakarak ba mundu neʼe?

21 Liutiha funu Armagedon, Maromak nia Ukun sei kumpre Ninia hakarak ba mundu neʼe. Porezemplu, Ukun neʼe sei halakon Satanás no anju aat sira. (Apokalipse 20:1-3) Tuirmai, moras no mate sei la iha tan. Ema neʼebé halo tuir Maromak sei hetan benefísiu husi Jesus nia sakrifísiu no bele moris ba nafatin iha Paraízu. (Apokalipse 22:1-3) Ukun neʼe mós sei halo Maromak nia naran sai santu. Neʼe katak sá? Bainhira Maromak nia governu mak ukun mundu tomak, ema hotu sei fó hahiʼi ba Jeová nia naran.​—Haree Apéndise 21.

BAINHIRA MAK JESUS SAI LIURAI?

22. Oinsá mak ita bele hatene katak Jesus la sai kedas Liurai depois nia fila fali ba lalehan?

22 Jesus mós hanorin ninia dixípulu sira atu halo orasaun: “Halo Ita-nia Ukun toʼo mai rai.” Tan neʼe, ita bele fiar katak Maromak nia governu sei toʼo mai rai. Maibé antes neʼe, Jeová sei harii ninia governu no fó knaar ba Jesus atu sai Liurai. Maibé bainhira Jesus saʼe  ba lalehan, nia sai kedas Liurai ka lae? Lae, Jesus presiza hein ba tempu balu. Depois Jesus moris hiʼas, apóstolu Pedro no Paulo esplika katak profesia husi Salmo 110:1 sai loos ba Jesus. Iha eskritura neʼe, Jeová hatete: “Tuur iha haʼu-nia liman-loos toʼo haʼu tau ó-nia inimigu sira iha ó-nia ain okos.” (Apóstolu 2:32-35; Ebreu 10:12, 13) Bainhira loos mak Jesus sai Liurai?

Maromak nia Ukun sei kumpre ninia hakarak iha mundu

23. (a) Bainhira mak Jesus hahú ninia ukun nuʼudar Liurai? (b) Ita sei aprende saida iha kapítulu tuirmai?

23 Tinan 1914 mak tinan importante tuir Bíblia nia profesia. Tinan barak antes tempu neʼe, ema Kristaun balu estuda didiʼak Bíblia no komprende kona-ba tinan neʼe. Buat oioin neʼebé akontese husi tinan 1914 hatudu ho klaru katak sira mak loos. Jesus komesa ninia ukun nuʼudar Liurai iha tinan 1914. (Salmo 110:2) Tuirmai, Satanás tun mai mundu, no agora ninia tempu “hela uitoan deʼit ona”. (Apokalipse 12:12) Iha kapítulu tuirmai, ita sei aprende evidénsia barak liután neʼebé hatudu katak ita moris daudaun iha tempu neʼe. Ita mós sei aprende katak lakleur tan, Maromak sei kumpre ninia hakarak iha mundu neʼe liuhusi ninia Ukun.​—Haree Apéndise 22.