Skip to content

Skip to table of contents

 KAPÍTULU 14

Ita bele moris kontente nuʼudar família

Ita bele moris kontente nuʼudar família

1, 2. Saida mak Jeová nia hakarak ba família sira?

MAROMAK JEOVÁ mak arranja kazamentu primeiru. Bíblia fó sai katak Maromak kria feto primeiru no “lori feto neʼe” ba Adão. Adão sente kontente tebes, hodi dehan: “Ikusmai, neʼe mak ruin husi haʼu-nia ruin no isin husi haʼu-nia isin.” (Génesis 2:22, 23) Neʼe hatudu katak Jeová hakarak kaben-naʼin sira atu moris kontente.

2 Maibé realidade mak ohin loron ema barak la iha moris família nian neʼebé kontente. Maski nuneʼe, Bíblia fó sai matadalan sira neʼebé bele ajuda ema ida-idak iha família laran atu bele moris kontente nuʼudar família.​—Lucas 11:28.

MAROMAK NIA HAKARAK BA LAʼEN SIRA

3, 4. (a) Hahalok saida mak laʼen presiza hatudu ba ninia feen? (b) Tanbasá mak importante ba feen-laʼen atu fó perdua ba malu?

3 Bíblia hatete katak laʼen neʼebé diʼak sei hadomi no respeitu ninia feen. Favór lee Éfeso 5:25-29. Laʼen presiza hatudu laran-diʼak ba ninia feen. Nia mós sei proteje no tau matan ba ninia feen. Nia sei la baku ninia feen no la hakanek ninia feen nia laran.

4 Maibé saida mak laʼen sira presiza halo kuandu ninia feen halo sala ruma? Bíblia hatete ba laʼen sira: “Kontinua hadomi imi-nia feen no keta sai hirus makaʼas ba sira.” (Koloso 3:19) Laʼen sira, keta haluha katak dala ruma Ita rasik mós halo sala. Se Ita hakarak Maromak perdua Ita, Ita mós presiza fó perdua ba Ita-nia  feen. (Mateus 6:12, 14, 15) Kuandu feen-laʼen fó perdua ba malu, neʼe sei ajuda sira atu iha moris família nian neʼebé kontente.

5. Tanbasá mak laʼen presiza hafolin ninia feen?

5 Jeová hakarak laʼen sira atu hatudu respeitu no hafolin sira-nia feen. Laʼen sira presiza hanoin didiʼak kona-ba feen nia presiza isin nian no mós emosaun. Neʼe importante tebes. Se laʼen ida la hatudu laran-diʼak ba ninia feen, karik Jeová sei la rona ninia orasaun. (1 Pedro 3:7) Jeová hafolin mane no feto hotu neʼebé hadomi nia. Nia la todan ba sorin.

6. Feen-laʼen mak “isin ida deʼit”, neʼe katak sá?

6 Jesus esplika katak laʼen no feen “laʼós tan naʼin-rua maibé isin ida deʼit”. (Mateus 19:6) Sira presiza laran-metin ba malu. (Provérbios 5:15-21; Ebreu 13:4) Laʼen no feen labele hanoin an deʼit, maibé hanoin uluk ninia kaben nia presiza seksuál nian. (1 Korinto 7:3-5) Laʼen labele haluha katak “la iha mane ida neʼebé odi ninia isin rasik, maibé nia fó-han no hafolin ninia isin”. Tan neʼe, laʼen tenke hadomi no tau matan ba ninia feen. Feen sira hakarak sira-nia laʼen hatudu laran-diʼak no hadomi sira.​—Éfeso 5:29.

MAROMAK NIA HAKARAK BA FEEN SIRA

7. Tanbasá mak família presiza iha ulun?

7 Família hotu presiza iha ulun ida neʼebé dirije umakain atu nuneʼe ema hotu bele apoia malu. Eskritura iha 1 Korinto 11:3 dehan: “Mane ida-idak nia ulun mak Kristu, no feto nia ulun mak mane, no Kristu nia ulun mak Maromak.”

8. Oinsá mak feen bele hatudu respeitu kleʼan ba ninia laʼen?

8 Laʼen sira mós dala ruma halo sala. Maski nuneʼe,  se feen mak apoia laʼen nia desizaun no prontu atu ajuda nia, ida-neʼe sei lori benefísiu ba família tomak. (1 Pedro 3:1-6) Bíblia dehan: ‘Feen tenke hatudu respeitu kleʼan ba ninia laʼen.’ (Éfeso 5:33) Maibé oinsá se feen nia fiar la hanesan ho ninia laʼen? Nia presiza hatudu nafatin respeitu kleʼan ba ninia laʼen. Bíblia hatete: “Imi feen sira, hakruʼuk ba imi-nia laʼen, atu nuneʼe, se sira la halo tuir Maromak nia liafuan, imi bele ajuda sira atu iha fiar, laʼós liuhusi imi-nia liafuan, maibé liuhusi imi-nia hahalok, tanba ho sira-nia matan rasik sira haree ona imi-nia hahalok moos neʼebé imi hatudu hamutuk ho respeitu kleʼan.” (1 Pedro 3:1, 2) Feen nia hahalok diʼak bele ajuda ninia laʼen atu komprende no respeitu ninia fiar.

9. (a) Saida mak feen bele halo kuandu nia iha hanoin neʼebé la hanesan ho ninia laʼen? (b) Tito 2:4, 5 fó sai konsellu saida ba feen sira?

9 Kuandu feen iha hanoin neʼebé la hanesan ho ninia laʼen, saida mak nia bele halo? Nia presiza fó sai  ninia hanoin ho respeitu. Porezemplu, bainhira Sara fó sai ninia hanoin ba ninia laʼen Abraão, Abraão la kontente, maibé Jeová hatete ba Abraão: “Rona nia bá.” (Génesis 21:9-12) Kuandu laʼen nia desizaun la kontra Bíblia, feen presiza apoia ninia laʼen. (Apóstolu 5:29; Éfeso 5:24) Feen neʼebé diʼak sei hakaʼas an atu tau matan ba família. (Lee Tito 2:4, 5.) Kuandu ninia laʼen no oan sira haree katak nia serbisu ho badinas, sira sei hadomi no respeitu liután nia.​—Provérbios 31:10, 28.

Oinsá mak Sara hatudu ezemplu diʼak ba feen sira?

10. Bíblia hanorin saida kona-ba haketak malu no soe malu?

10 Feen-laʼen balu deside lalais atu haketak malu ka soe malu. Maibé Bíblia hatete “feen labele haketak an husi ninia laʼen” no “laʼen ida labele husik ninia feen”. (1 Korinto 7:10, 11) Iha duni situasaun balu neʼebé halo feen-laʼen deside atu haketak malu, maibé ida-neʼe mak desizaun neʼebé sériu. * Oinsá ho soe malu, ka divórsiu? Tuir Bíblia, iha razaun ida deʼit neʼebé loos atu soe malu. Neʼe mak kuandu laʼen ka feen ida halo relasaun seksuál ho ema seluk.​—Mateus 19:9.

MAROMAK NIA HAKARAK BA INAN-AMAN

Jesus mak ezemplu diʼak ba ema ida-idak iha família laran

11. Oan sira presiza liu saida?

11 Inan-aman, hakaʼas an atu uza tempu barak hamutuk ho imi-nia oan. Imi-nia oan presiza imi, no buat neʼebé sira presiza liu mak aprende kona-ba Jeová husi imi.​—Deuteronómio 6:4-9.

12. Inan-aman presiza halo saida atu proteje sira-nia oan?

12 Satanás nia mundu neʼe sai aat ba beibeik. Ema balu hakarak halo aat ba labarik sira, inklui mós abuza  sira iha dalan seksuál. Inan-aman balu sente susar atu koʼalia kona-ba neʼe ho sira-nia oan. Maibé sira presiza fó avizu ba sira-nia oan no hanorin oinsá atu hasees an husi perigu sira-neʼe. Inan-aman, imi tenke proteje imi-nia oan. *​—1 Pedro 5:8.

13. Inan-aman presiza hanorin sira-nia oan iha dalan saida?

13 Inan-aman iha responsabilidade atu hanorin sira-nia oan atu iha hahalok diʼak. Oinsá mak Ita bele hanorin Ita-nia oan? Oan sira presiza simu treinu,  maibé Ita labele siʼak sira no labele fó dixiplina iha dalan neʼebé makaʼas demais. (Jeremias 30:11) Keta fó dixiplina ba Ita-nia oan bainhira Ita hirus. Ita labele uza liafuan neʼebé hakanek sira-nia laran hanesan “sona ho surik”. (Provérbios 12:18) Hanorin Ita-nia oan atu komprende tanbasá importante atu halo tuir.​—Éfeso 6:4; Ebreu 12:9-11; haree Apéndise 30.

MAROMAK NIA HAKARAK BA OAN SIRA

14, 15. Tanbasá mak oan sira presiza halo tuir inan-aman?

14 Jesus halo tuir ninia Aman iha tempu hotu maski dala ruma la fasil ba nia atu halo nuneʼe. (Lucas 22:42; João 8:28, 29) Jeová mós hakarak oan sira atu halo tuir sira-nia inan-aman.​—Éfeso 6:1-3.

15 Oan sira, maski dala ruma susar atu halo tuir imi-nia inan-aman, maibé hanoin-hetan bá katak Jeová no imi-nia inan-aman sei sente kontente bainhira imi halo tuir. *​—Provérbios 1:8; 6:20; 23:22-25.

Saida mak ajuda joven sira atu laran-metin ba Maromak kuandu hasoru tentasaun?

16. (a) Satanás uza saida atu book joven sira halo buat neʼebé sala? (b) Tanbasá mak importante atu hili kolega neʼebé hadomi Jeová?

16 Diabu bele uza kolega sira ka joven seluk atu book imi halo buat neʼebé sala. Nia hatene katak susar tebes ba imi atu tahan hasoru tentasaun hanesan neʼe. Porezemplu, Jacob nia oan-feto Dina habelun ho ema neʼebé la hadomi Jeová, no ida-neʼe lori susar boot ba nia no ninia família. (Génesis 34:1, 2) Se imi-nia kolega la hadomi Jeová, karik sira sei book imi atu halo buat neʼebé Jeová odi, no ida-neʼe sei halo imi, imi-nia família no Maromak sente laran-susar. (Provérbios  17:21, 25) Tan neʼe importante tebes ba imi atu hili kolega neʼebé hadomi Jeová.​—1 Korinto 15:33.

ITA-NIA MORIS FAMÍLIA BELE SAI KONTENTE

17. Ema ida-idak iha responsabilidade saida iha família laran?

17 Bainhira ema ida-idak iha família laran halo tuir Maromak nia matadalan, família tomak bele sees husi problema no susar oioin. Tan neʼe, se Ita mak laʼen, hadomi Ita-nia feen no hatudu laran-diʼak ba nia. Se Ita mak feen, hatudu respeitu no hakruʼuk an ba Ita-nia laʼen hodi halo tuir ezemplu husi feen neʼebé hakerek iha Provérbios 31:10-31. Se Ita mak inan ka aman, hanorin Ita-nia oan atu hadomi Maromak. (Provérbios 22:6) Se Ita mak aman, dirije Ita-nia família “iha dalan neʼebé diʼak”. (1 Timóteo 3:4, 5; 5:8) No oan sira, halo tuir imi-nia inan-aman bá. (Koloso 3:20) Hanoin-hetan, ita hotu sala-naʼin, tan neʼe ita hotu presiza haraik an no husu perdua ba malu. Sin, Bíblia fó sai Jeová nia matadalan ba ema hotu iha família laran.

^ par. 10 Atu hetan informasaun liután, haree Apéndise husi livru “Hela Nafatin iha Maromak nia Domin”. Livru neʼe husi Testemuña ba Jeová.

^ par. 12 Ita bele hetan informasaun liután kona-ba oinsá atu proteje Ita-nia oan iha lisaun 17 husi vídeo Sai Jeová nia Belun, husi Testemuña ba Jeová.

^ par. 15 Oan sira la presiza halo tuir inan-aman bainhira inan-aman haruka sira atu halo buat neʼebé kontra Maromak nia ukun-fuan.​—Apóstolu 5:29.