Skip to content

Skip to table of contents

 KAPÍTULU 15

Dalan neʼebé loos atu adora Maromak

Dalan neʼebé loos atu adora Maromak

1. Sé mak bele fó-hatene ita kona-ba dalan neʼebé loos atu adora Maromak?

RELIJIAUN barak fó sai katak sira hanorin lia-loos kona-ba Maromak. Maibé neʼe la loos, tanba relijiaun ida-idak hanorin buat neʼebé la hanesan kona-ba sé mak Maromak no oinsá atu adora nia. Se nuneʼe, oinsá mak ita bele hatene dalan neʼebé loos atu adora Maromak? Só Jeová deʼit mak bele fó-hatene ita oinsá atu adora nia.

2. Oinsá mak ita bele aprende dalan neʼebé loos atu adora Maromak?

2 Maromak Jeová fó Bíblia mai ita hodi ita bele aprende dalan neʼebé loos atu adora nia. Tan neʼe, importante ba ita atu estuda Bíblia, no Jeová sei ajuda ita atu hetan benefísiu husi ninia hanorin tanba nia hanoin tebes ita.​—Isaias 48:17.

3. Maromak hakarak ita atu halo saida?

3 Ema balu hatete katak Maromak simu relijiaun hotu, maibé Jesus la hanorin hanesan neʼe. Nia hatete: “Laʼós ema hotu neʼebé dehan mai haʼu: ‘Naʼi, Naʼi’, sei tama ba Ukun lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama ba Ukun neʼe.” Tan neʼe, ita presiza aprende Maromak nia hakarak no halo tuir. Neʼe importante tebes tanba Jesus hatete katak ema neʼebé la halo tuir Maromak mak “ema neʼebé halo hahalok aat”, hanesan kriminozu ida.​—Mateus 7:21-23.

4. Saida mak Jesus hatete kona-ba halo tuir Maromak?

 4 Jesus fó-hatene ona katak se ita hakarak halo tuir Maromak, ita sei hasoru susar oioin. Nia hatete: “Laʼo liuhusi odamatan kloot bá, tanba odamatan boot no dalan luan mak lori ema ba mate, no ema barak laʼo liuhusi dalan neʼe. Maibé odamatan kloot no dalan kiʼik tebes mak lori ema ba moris, no ema uitoan deʼit mak hetan dalan neʼe.” (Mateus 7:13, 14) Dalan kiʼik, ka dalan neʼebé loos atu adora Maromak, sei lori ita ba moris rohan-laek. Dalan luan, ka dalan neʼebé sala atu adora Maromak, sei lori ita ba mate. Jeová lakohi ema ida mate. Tan neʼe, nia fó oportunidade ba ema hotu atu aprende kona-ba nia.​—2 Pedro 3:9.

DALAN NEʼEBÉ LOOS ATU ADORA MAROMAK

5. Oinsá mak ita bele hatene ema neʼebé adora Maromak iha dalan neʼebé loos?

5 Jesus hatete katak ita bele hatene ema neʼebé adora Maromak iha dalan neʼebé loos hodi buka-hatene sira-nia fiar no sira-nia hahalok. Nia dehan: “Imi bele hatene sira liuhusi sira-nia hahalok. . . . Ai-hun hotu neʼebé diʼak sei fó fuan diʼak.” (Mateus 7:16, 17) Neʼe la dehan katak ema neʼebé adora Maromak nunka halo sala. Maibé Maromak nia atan sira hakaʼas an nafatin atu halo buat neʼebé loos. Agora, mai ita koʼalia kona-ba pontu balu neʼebé bele ajuda ita atu hatene ema neʼebé adora Maromak iha dalan neʼebé loos.

6, 7. Tanbasá mak adorasaun loos tenkesér bazeia ba Bíblia? Jesus nia ezemplu hanorin saida mai ita?

6 Ita-nia hanorin tenkesér bazeia ba Bíblia. Bíblia dehan: “Eskritura hotu mai husi Maromak no neʼe diʼak atu hanorin, atu fó konsellu, atu halo loos buat hotu, no atu fó dixiplina tuir hahalok loos, atu nuneʼe  Maromak nia atan bele iha kbiit, no sai prontu hodi halo serbisu diʼak hotu.” (2 Timóteo 3:16, 17) Apóstolu Paulo hakerek ba ema Kristaun sira: “Bainhira imi rona Maromak nia liafuan husi ami, imi simu ida-neʼe laʼós nuʼudar ema nia liafuan maibé nuʼudar Maromak nia liafuan.” (1 Tesalónika 2:13) Adorasaun neʼebé loos bazeia deʼit ba Maromak nia Liafuan Bíblia, laʼós ba ema nia hanoin, tradisaun ka buat seluk tan.

7 Jesus nia hanorin hotu bazeia ba Maromak nia Liafuan. (Lee João 17:17.) Nia temi beibeik Eskritura sira. (Mateus 4:4, 7, 10) Maromak nia atan neʼebé loos halo tuir Jesus nia ezemplu, no sira hanorin buat hotu husi Bíblia.

8. Jesus hanorin saida kona-ba adora Jeová?

8 Ita tenke adora Jeová mesak deʼit. Salmo 83:18 hatete: “Ita neʼebé naran Jeová, Ita mesak deʼit mak Maromak neʼebé Aas Liu Hotu iha mundu tomak.” Jesus hakarak ema atu hatene ho loloos sé mak Maromak, no nia mós hanorin Maromak nia naran ba ema. (Lee João 17:6.) Jesus hatete: “Imi tenke adora Jeová, imi-nia Maromak, no ba nia deʼit mak imi tenke halo serbisu sagradu.” (Mateus 4:10) Nuʼudar Maromak nia atan, ita hakarak halo tuir Jesus nia ezemplu. Ita adora Jeová mesak deʼit, uza ninia naran, no hanorin ema seluk kona-ba ninia naran no ninia hakarak ba ema.

9, 10. Iha dalan saida deʼit mak ita hatudu domin ba malu?

9 Ita presiza hatudu domin neʼebé loos ba malu. Jesus hanorin ninia dixípulu sira atu hadomi malu. (Lee João 13:35.) Ita hadomi malu maski ita mai husi nasaun no kultura neʼebé la hanesan, balu riku no balu kiak. Ita-nia domin ba malu book ita atu iha unidade hanesan maun-alin. (Koloso 3:14) Tan neʼe, ita la bá  funu no la oho ema. Bíblia dehan: “Ita bele hatene Maromak nia oan no Diabu nia oan liuhusi dalan tuirmai neʼe: Ema neʼebé la kontinua halo hahalok loos la mai husi Maromak, nuneʼe mós ho ema neʼebé la hadomi ninia maluk. . . . Ita tenke hadomi malu. Ita labele sai hanesan Caim, neʼebé mai husi aat-naʼin no oho ninia alin.”​—1 João 3:10-12; 4:20, 21.

10 Ita uza ita-nia tempu, forsa no osan atu ajuda malu no anima malu. (Ebreu 10:24, 25) “Mai ita halo buat neʼebé diʼak ba ema hotu.”​—Galásia 6:10.

11. Tanbasá mak ita presiza halo tuir Jesus?

11 Ita presiza simu Jesus nuʼudar dalan atu hetan salvasaun. Bíblia hatete: “La iha salvasaun liuhusi ema seluk, tanba la iha naran seluk iha lalehan nia okos neʼebé Maromak hili tiha ona atu salva ita.” (Apóstolu 4:12) Iha Kapítulu 5, ita aprende ona katak Jeová haruka Jesus atu fó ninia moris nuʼudar sakrifísiu hodi salva ema neʼebé halo tuir. (Mateus 20:28) Jeová hili ona Jesus nuʼudar Liurai neʼebé ukun mundu tomak. Tan neʼe mak Bíblia haruka ita atu halo tuir Jesus se ita hakarak moris ba nafatin.​—Lee João 3:36.

12. Tanbasá mak ita la envolve an iha polítiku?

12 Ita la envolve an iha polítiku. Jesus la envolve an iha polítiku. Bainhira ulun-naʼin sira tesi-lia ba Jesus, nia hatete ba ukun-naʼin Roma nian naran Pilatos: “Haʼu-nia ukun laʼós parte husi mundu neʼe.” (Lee João 18:36.) Hanesan ho Jesus, ita laran-metin ba Maromak nia Ukun iha lalehan. Tan neʼe, ita la envolve an iha buat polítiku nian iha mundu neʼe. Maski nuneʼe, Bíblia haruka ita atu halo tuir “autoridade sira”, katak governu sira. (Roma 13:1) Ita halo tuir lei sira iha rai neʼebé ita hela. Maibé se governu nia lei ida mak kontra  Maromak nia ukun-fuan, ita sei halo tuir ezemplu husi apóstolu sira neʼebé hatete: “Ami tenke halo tuir Maromak nuʼudar ukun-naʼin duké halo tuir ema.”​—Apóstolu 5:29; Marcos 12:17.

13. Ita haklaken saida kona-ba Maromak nia Ukun?

13 Ita fiar katak Maromak nia Ukun deʼit mak bele rezolve problema hotu iha mundu neʼe. Jesus hatete katak ema sei haklaken “liafuan diʼak kona-ba Maromak nia Ukun” iha mundu tomak. (Lee Mateus 24:14.) La iha nasaun ka governu ida mak bele halakon susar hotu no lori dame mai ita, só Maromak nia Ukun deʼit mak bele. (Salmo 146:3) Tan neʼe mak Jesus hanorin ita atu husu Maromak nia Ukun, hodi dehan: “Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan.” (Mateus 6:10) Bíblia hanorin katak Maromak nia Ukun sei halakon ema nia governu hotu no “ukun neʼe mesak mak sei hamriik ba nafatin”.​—Daniel 2:44.

14. Tuir Ita-nia hanoin, sé mak adora Maromak iha dalan neʼebé loos?

14 Agora husu toʼok ba Ita-nia an: ‘Sé mak fiar metin ba hanorin husi Bíblia? Sé mak fó-hatene ba ema seluk kona-ba Maromak nia naran? Sé mak hatudu domin neʼebé loos ba malu? Sé mak fiar katak Maromak haruka Jesus atu salva ita? Sé mak la envolve an iha polítiku? Sé mak haklaken katak Maromak nia Ukun deʼit mak rezolve ita-nia problema?’ Só Testemuña ba Jeová deʼit.​—Isaias 43:10-12.

SAIDA MAK ITA SEI HALO?

15. Ita tenke halo saida atu Maromak simu ita-nia adorasaun?

15 Latoʼo atu fiar deʼit katak Maromak iha. Anju aat sira mós fiar katak Maromak iha, maibé sira la halo tuir  nia. (Tiago 2:19) Se ita hakarak Maromak simu ita-nia adorasaun, la toʼo atu fiar deʼit katak Maromak iha, maibé ita mós tenke halo tuir buat neʼebé nia hatete.

16. Tanbasá mak ita presiza hadook an husi relijiaun falsu?

16 Atu Maromak bele simu ita-nia adorasaun, ita tenke hadook an husi relijiaun falsu. Profeta Isaias hakerek: “Sai husi neʼebá, halo imi-nia an moos nafatin.” (Isaias 52:11; 2 Korinto 6:17) Tan neʼe, ita presiza hadook an husi buat hotu neʼebé iha relasaun ho adorasaun falsu.

17, 18. Saida mak “Babilónia Boot”? Tanbasá mak urjente atu sai husi ida-neʼe?

17 Relijiaun falsu mak saida? Neʼe mak relijiaun neʼebé hanorin ema atu adora Maromak iha dalan neʼebé la tuir ninia Liafuan Bíblia. Bíblia bolu relijiaun falsu hotu nuʼudar “Babilónia Boot”. (Apokalipse 17:5) Tanbasá? Tanba depois Rai-Nabeen iha Noé nia tempu, hanorin falsu barak hahú iha sidade Babilónia, no husi neʼebá mak hanorin falsu sira habelar iha mundu tomak. Porezemplu, ema Babilónia adora maromak naʼin-tolu. Ohin loron mós relijiaun barak hanorin doutrina Trindade, maibé Bíblia hanorin katak iha Maromak loos mesak ida deʼit, naran Jeová, no Jesus mak ninia Oan. (João 17:3) Ema Babilónia mós fiar katak parte ruma husi ema nia isin sei kontinua moris maski ema neʼe mate, no ninia klamar bele hetan terus iha infernu. Maibé hanorin neʼe la loos.​—Haree Apéndise 14, 17, no 18.

18 Maromak fó-hatene nanis katak lakleur tan nia sei halakon relijiaun falsu hotu. (Apokalipse 18:8) Tan neʼe, Maromak Jeová hakarak Ita atu sai husi relijiaun falsu agora kedas. Se Ita tarde, Ita bele lakon ita-nia moris.​—Apokalipse 18:4.

Hodi serbí Jeová hamutuk ho ninia povu, Ita sei sai parte ba família boot iha mundu tomak

19. Kuandu Ita deside atu serbí Jeová, oinsá mak nia sei tau matan Ita?

 19 Kuandu Ita deside atu husik relijiaun falsu no serbí Jeová, karik Ita-nia família ka kolega balu sei la komprende Ita no fó susar ba Ita. Maibé Jeová sei la husik Ita mesak. Ita sei sai parte ba família boot ida husi ema rihun ba rihun neʼebé hadomi malu ho laran. Ita mós sei iha esperansa atu moris ba nafatin iha Maromak nia mundu foun. (Marcos 10:28-30) Karik Ita-nia família ka kolega balu neʼebé kontra Ita-nia desizaun atu serbí Jeová, ikusmai sei deside atu estuda Bíblia.

20. Tanbasá mak importante atu adora Maromak iha dalan neʼebé loos?

20 Lakleur tan, Maromak sei halakon buat aat hotu, no ninia governu mak sei ukun mundu tomak. (2 Pedro 3:9, 13) Neʼe mak tempu neʼebé furak tebes! Ema hotu sei adora Jeová iha dalan neʼebé loos tuir ninia hakarak. Tan neʼe, importante ba Ita atu foti desizaun agora kedas no adora Maromak iha dalan neʼebé loos.