Skip to content

Skip to table of contents

 KAPÍTULU 13

Hatudu respeitu ba moris

Hatudu respeitu ba moris

1. Sé mak fó moris mai ita?

JEOVÁ mak “Maromak neʼebé moris”. (Jeremias 10:10) Nia mak ita-nia Kriadór, no nia mak fó moris mai ita. Bíblia hatete: “Ita kria ona buat hotu, no tanba Ita-nia hakarak mak buat hotu iha no kria tiha.” (Apokalipse 4:11) Sin, Jeová hakarak ita atu moris. Moris mak prezente furak husi Maromak.​—Lee Salmo 36:9.

2. Saida mak ita presiza halo atu bele moris kontente?

2 Jeová fó buat hotu neʼebé ita presiza atu bele moris, hanesan hahán no bee. (Apóstolu 17:28) Nia mós hakarak ita atu moris kontente. (Apóstolu 14:15-17) Maibé atu bele moris kontente, ita presiza halo tuir Maromak nia ukun-fuan sira.​—Isaias 48:17, 18.

MAROMAK NIA HANOIN KONA-BA MORIS

3. Bainhira Caim oho tiha Abel, Jeová halo saida?

3 Bíblia hanorin katak ita no ema seluk nia moris mak folin-boot ba Jeová. Porezemplu, bainhira Adão no Eva nia oan-mane Caim sai hirus ba ninia alin Abel, Jeová fó avizu ba Caim atu kontrola ninia hirus. Maibé Caim lakohi rona, no sai hirus liután toʼo “ataka ninia alin Abel no oho nia”. (Génesis 4:3-8) Jeová fó kastigu ba Caim tanba nia oho Abel. (Génesis 4:9-13) Hirus no odi mak perigu tebes, tanba sentimentu neʼe bele book ita atu sai siʼak-teen no halo violénsia. Ema hanesan neʼe sei la hetan moris rohan-laek. (Lee 1 João 3:15.) Atu halo Jeová kontente, ita tenke aprende atu hadomi ema hotu.​—1 João 3:11, 12.

4. Ita bele aprende saida husi ukun-fuan neʼebé Maromak fó ba ema Izraél?

 4 Liutiha tinan rihun ba rihun, Jeová hatudu katak nia hafolin tebes moris bainhira nia fó Ukun-Fuan Sanulu ba ema Izraél liuhusi Moisés. Ukun-fuan ida mak: “Imi labele oho ema.” (Deuteronómio 5:17) Se ema ida oho ema seluk ho neon, nia tenke hetan kastigu-mate.

5. Maromak sente oinsá kona-ba halo abortu?

5 Maromak sente oinsá kona-ba halo abortu? Ba Maromak Jeová, bebé neʼebé sei iha inan nia knotak mós folin-boot. Iha Ukun-Fuan neʼebé Jeová fó ba ema Izraél, Jeová dehan katak se ema ruma hakanek feto neʼebé isin-rua no bebé iha ninia kabun laran mate, ema neʼe tenke hetan kastigu-mate. (Lee Éxodo 21:22, 23; Salmo 127:3.) Neʼe hanorin ita katak halo abortu mak sala.​—Haree Apéndise 28.

6, 7. Oinsá mak ita bele hatudu ba Jeová katak ita hafolin moris?

6 Oinsá mak ita bele hatudu ba Jeová katak ita hafolin ita-nia moris no ema seluk nia moris? Ita labele halo buat neʼebé lori perigu ba ita no ema seluk nia moris. Entaun, ita sei la fuma, la uza droga no la mama malus, tanba buat sira-neʼe estraga ita-nia saúde no bele oho ita.

7 Maromak mak fó moris no isin-lolon mai ita, tan neʼe ita tenke uza ida-neʼe tuir ninia hakarak. Ita presiza tau matan didiʼak ba ita-nia isin. Se lae, ita la moos tuir Maromak nia haree. (Roma 6:19; 12:1; 2 Korinto 7:1) Se ita la hafolin moris, ita labele adora Jeová neʼebé fó moris mai ita. Maski dala ruma susar tebes, maibé se ita hakaʼas an atu husik toman aat sira tanba hafolin moris, Jeová sei ajuda ita.

8. Saida mak ita sei halo atu la tau ita-nia moris no ema seluk nia moris iha perigu laran?

 8 Ita-nia moris mak prezente neʼebé folin-boot. Tan neʼe, Jeová fiar katak ita sei hakaʼas an atu nunka tau ita-nia moris no ema seluk nia moris iha perigu laran. Atu halo nuneʼe, ita presiza kuidadu bainhira lori karreta, motór ka transporte seluk. Ita mós la halo desportu neʼebé perigu ka uza violénsia. (Salmo 11:5) Ita mós tau matan didiʼak ba ita-nia uma atu labele hamosu asidente ruma. Jeová hatete ba ema Izraél: “Se imi harii uma foun, imi mós tenke halo moru badak iha ninia kakuluk, atu nuneʼe ema la monu husi uma-leten no imi-nia umakain la hetan sala kona-ba ema nia raan.”​—Deuteronómio 22:8.

9. Oinsá mak ita tenke trata animál?

9 Ita-nia dalan atu trata animál sira mós importante ba Jeová. Nia fó lisensa ba ita atu oho animál hodi han no uza ninia kulit hodi halo roupa, no nia mós husik ita atu oho animál sira neʼebé bele lori perigu ba ita-nia moris. (Génesis 3:21; 9:3; Éxodo 21:28) Maibé ita labele haterus animál ka oho arbiru tanba halimar ka joga.​—Provérbios 12:10.

HATUDU RESPEITU BA MORIS NEʼEBÉ SANTU

10. Oinsá mak ita bele hatene katak raan reprezenta moris?

10 Raan mak buat neʼebé santu ba Jeová tanba raan reprezenta moris. Tan neʼe mak Jeová fó kastigu ba Caim neʼebé fakar ninia alin Abel nia raan. (Génesis 4:10) Depois Rai-Nabeen iha Noé nia tempu, Jeová mós hatudu katak raan reprezenta moris. Jeová fó lisensa ba Noé no ninia família atu han naʼan. Nia dehan: “Kriatura hotu neʼebé book an bele sai nuʼudar ai-han  ba imi. Hanesan haʼu fó ona modo-tahan ba imi, haʼu mós fó buat sira-neʼe hotu ba imi.” Maibé iha buat ida neʼebé mak sira labele han. Jeová hatutan tan: “Maibé naʼan hamutuk ho ninia raan, katak ninia moris, imi keta han ida-neʼe.”​—Génesis 1:29; 9:3, 4.

11. Mandamentu saida mak Maromak fó ba nasaun Izraél kona-ba raan?

11 Maizumenus tinan 800 liutiha husi tempu neʼebé Jeová bandu Noé atu labele han raan, Jeová fó mandamentu neʼebé hanesan ba ninia povu, hodi dehan: “Se ema Izraél ida ka ema estranjeiru ida neʼebé hela iha imi-nia leet kasa no kaer animál fuik ida ka manu ida neʼebé bele han, nia tenke fakar animál neʼe nia raan no taka ho rai-rahun.” Tuirmai, nia dehan: “Imi labele han raan.” (Levítico 17:13, 14) Jeová hakarak ninia povu atu haree raan nuʼudar buat neʼebé santu. Sira bele han naʼan maibé labele han raan. Kuandu sira oho animál atu han, sira presiza fakar animál nia raan ba rai.

12. Oinsá ema Kristaun sira-nia hanoin kona-ba raan?

12 Tinan balu depois Jesus mate, apóstolu no katuas Kristaun sira iha Jeruzalein halibur hamutuk atu koʼalia kona-ba Ukun-Fuan ida-neʼebé mak ema Kristaun presiza halo tuir. (Lee Apóstolu 15:28, 29; 21:25.) Jeová ajuda sira atu komprende katak raan mak buat neʼebé santu ba Maromak. Ema Kristaun iha tempu neʼebá la han no la hemu raan, no sira mós la han naʼan neʼebé sei iha raan. Se sira han raan, neʼe aat tebes hanesan adora maromak falsu ka halo sala seksuál. Husi tempu neʼebá kedas, ema Kristaun neʼebé loos lakohi han ka hemu raan. Oinsá ho ohin loron? Jeová hakarak ita hafolin nafatin raan nuʼudar buat neʼebé santu.

13. Tanbasá mak ema Kristaun la simu transfuzaun raan?

 13 Neʼe katak ema Kristaun la simu transfuzaun raan? Sin. Jeová bandu ita atu labele han ka hemu raan. Hanoin toʼok, se doutór bandu Ita labele hemu tua, Ita sei hatama tua ba Ita-nia isin liuhusi soru ka lae? Lae duni! Nuneʼe mós ho raan, halo tuir mandamentu atu la han no la hemu raan, neʼe katak ita mós sei la simu transfuzaun raan.​—Haree Apéndise 29.

14, 15. Maski ema Kristaun hafolin moris, tanbasá mak sira lakohi kontra Maromak nia ukun-fuan kona-ba raan?

14 Maibé oinsá se doutór dehan katak ita sei mate se ita la simu transfuzaun raan? Ema ida-idak tenke deside rasik se nia hakarak halo tuir Maromak nia ukun-fuan, ka la halo tuir. Ema Kristaun hafolin duni moris nuʼudar prezente husi Maromak. Tan neʼe ita sei buka tratamentu seluk atu bele kontinua moris, maibé ita lakohi simu transfuzaun raan.

15 Ita hakaʼas an atu iha saúde diʼak, maibé tanba raan mak reprezenta moris no neʼe folin-boot ba Maromak, ita la simu transfuzaun raan. Importante liu atu halo tuir Maromak Jeová duké kontra nia hodi bele hanaruk ita-nia moris. Jesus hatete: “Ema neʼebé hakarak salva ninia moris sei lakon ninia moris, maibé ema neʼebé lakon ninia moris tanba haʼu sei hetan fali ninia moris.” (Mateus 16:25) Ita hakarak halo tuir Jeová tanba ita hadomi nia. Nia hatene buat neʼebé diʼak liu ba ita, no ita mós hafolin no haree moris nuʼudar buat santu hanesan Jeová hafolin moris.​—Ebreu 11:6.

16. Tanbasá mak Maromak nia atan sira halo tuir nia?

16 Maromak nia atan sira neʼebé laran-metin hakaʼas  an atu halo tuir Jeová nia ukun-fuan kona-ba raan. Sira la han ka hemu raan, no sira mós lakohi simu raan nuʼudar tratamentu médiku. * Maibé sira prontu atu simu tratamentu seluk atu bele salva sira-nia moris. Sira tau fiar katak Kriadór ba moris no raan mak hatene liu buat neʼebé diʼak ba sira. Ita rasik mós fiar hanesan neʼe ka lae?

DALAN IDA DEʼIT ATU UZA RAAN

17. Jeová fó lisensa ba ema Izraél atu uza raan iha dalan oinsá?

17 Iha Ukun-Fuan neʼebé Maromak Jeová fó ba ema Izraél liuhusi Moisés, nia dehan: “Kriatura hotu nia moris mak iha ninia raan, no haʼu fó ona raan ba altár leten atu imi bele hamoos imi-nia sala rasik, tanba raan mak sei hamoos sala.” (Levítico 17:11) Bainhira ema Izraél sira halo sala, sira bele husu perdua ba Jeová hodi hasaʼe animál nuʼudar sakrifísiu no husu amlulik atu fakar animál nia raan ba altár iha templu. Neʼe mak dalan ida deʼit neʼebé Jeová fó lisensa ba ema Izraél atu uza raan.

18. Jesus nia sakrifísiu fó oportunidade saida mai ita?

18 Bainhira Jesus mai toʼo mundu, nia fó ninia moris, ka raan, atu perdua ita-nia sala, hodi troka ukun-fuan kona-ba sakrifísiu animál nian. (Mateus 20:28; Ebreu 10:1) Jesus nia moris mak folin-boot tebes, tan neʼe liuhusi Jesus nia sakrifísiu, Jeová bele fó oportunidade ba ema hotu atu moris ba nafatin.​—João 3:16; Ebreu 9:11, 12; 1 Pedro 1:18, 19.

Oinsá mak Ita bele hatudu katak Ita hafolin moris no raan?

19. Saida mak ita tenke halo atu bele ‘moos husi ema hotu nia raan’?

 19 Ita agradese ba Jeová tanba prezente furak neʼebé nia fó mai ita! Ita hakarak fó-hatene ema seluk katak se sira fiar ba Jesus, sira bele moris ba nafatin. Ita hadomi ema, tan neʼe ita hakaʼas an atu hanorin sira oinsá atu hetan moris. (Ezequiel 3:17-21) Se ita halo nuneʼe, hanesan ho apóstolu Paulo, ita mós bele hatete: “Haʼu moos ona husi ema hotu nia raan tanba haʼu la dada an atu fó-hatene ba imi Maromak nia hakarak hotu.” (Apóstolu 20:26, 27) Sin, ita hatudu katak ita respeitu tebes moris no raan se ita haklaken kona-ba Jeová no hanorin katak Jeová hafolin tebes moris.

^ par. 16 Atu hetan informasaun liután kona-ba transfuzaun raan, haree livru “Hela Nafatin iha Maromak nia Domin”, kapítulu 7, parágrafu 10-12. Livru neʼe husi Testemuña ba Jeová.