Skip to content

Skip to table of contents

Liafuan atu loke

Liafuan atu loke

Mane ida naran Dauda dehan: “Haʼu boot iha knua kiʼik ida iha rai-Serra Leoa. Wainhira haʼu sei kiʼik, haʼu-nia família ho ema seluk nia família iha problema kona-ba hadau malu rai. Atu hakotu lia, loron ida ami bolu matan-dook ida mai. Matan-dook neʼe fó lalenok ba mane ida, depois taka nia ho hena mutin. Lakleur, mane neʼebé iha hena mutin okos komesa nakdedar toʼo kosar suli. Bainhira nia haree lalenok neʼe, nia hakilar dehan: ‘Haʼu haree katuas ida laʼo daudauk mai, hatais hena mutin! Nia fuuk mutin, ain-aas, maibé laʼo bonko.’

“Katuas neʼebé mane neʼe haree mak haʼu-nia avó-mane! Derrepente, mane neʼe hakilar hanesan matebian tama nia laran. Nia dehan: ‘Se imi la fiar haʼu, mai haree ho imi-nia matan rasik!’ La iha ema ida mak brani atu bá haree! Ikusmai, matan-dook halo mane neʼe hakmatek fali hodi hisik bee lulik iha sanan-rai neʼebé kahur ho ai-tahan.

“Haʼu-nia ‘avó-mane’ neʼebé tama iha mane neʼe nia laran koʼalia katak rai neʼe ami-nian, depois ‘avó-mane’ mós hatete ba avó-feto katak nia labele laran-susar atu halo natar iha rai neʼe. Ema neʼebé hakarak hadau ami-nia rai mós simu liafuan neʼe. Ikusmai, problema neʼe rezolve ona.”

 Esperiénsia hanesan neʼe baibain akontese duni iha rai oioin. Ema rihun ba rihun iha mundu tomak fiar katak ema mate nia klamar sei moris hela iha fatin ruma, sira bele haree no book ema nia moris. Fiar hanesan neʼe mak loos duni ka lae? Tuir loloos, ema neʼebé mate ona sei moris hela ka lae? Sé mak hasara an hanesan ema mate nia klamar? Importante duni atu hatene ho loloos resposta ba pergunta hirak-neʼe liuliu tanba hatene lia-loos kona-ba ida-neʼe sei kona Ita-Boot nia moris.