Skip to content

Skip to table of contents

Adora ba Maromak Jeová, laʼós Satanás

Adora ba Maromak Jeová, laʼós Satanás

Ita hotu tenke hili atu adora Maromak Jeová ka Satanás ho ninia anju aat sira. Ita la bele adora rua-rua neʼe. Maibé desizaun neʼebé matenek liu mak atu adora Maromak Jeová deʼit!

Maromak Jeová mak laran-diʼak

Hanesan ita aprende ona, anju aat sira gosta halo aat no lohi ema. Maibé Maromak Jeová la hanesan neʼe. Nia hadomi tebes ema hanesan aman ida hadomi nia oan. Nia mak Ida neʼebé fó “prezente diʼak ida-idak no prezente hotu neʼebé kompletu”. (Tiago 1:17) Maromak la subar buat diʼak husi ema toʼo fó ninia Oan-Mane rasik neʼebé folin-boot ba nia.—Éfeso 2:4-7.

Ho domin, Maromak nia Oan-Mane Jesus kura ema nia moras

Hanoin toʼok kona-ba buat neʼebé Maromak nia Oan-Mane Jesus halo wainhira nia sei iha rai. Nia halo monok sira koʼalia fali, matan-delek haree fali no ain-kudeʼik laʼo fali. Nia mós kura ema moras-lepra no moras oioin, duni sai anju aat sira husi ema nia laran. Ho Maromak Jeová nia kbiit, maski ema neʼebé mate ona mós Jesus bele halo moris fali.—Mateus 9:32-35; 15:30, 31; Lucas 7:11-15.

Maromak sempre fó sai buat neʼebé loos, laʼós bosok-teen. Nia nunka lohi ita.—Números (Bilangan) 23:19; Tito 1:2.

 Hadook an husi hahalok sira neʼebé foʼer

Hanesan labadain nia knuuk neʼebé kaer metin lalar ida, Satanás uza fiar neʼebé sala no lia-bosok oioin atu kaer metin ema rihun ba rihun. Sira taʼuk ba ema mate nia klamar, taʼuk ba diabu, fiar ba sinál sira, no hanoin barak kona-ba ema buan halo sira, fekit sira, fó-malisan, no maninga. Diabu Satanás nia lasu oioin neʼe halo ema la bele moris livre. Maibé ema neʼebé adora Maromak Jeová sei la monu ba lasu hirak-neʼe.

Maromak Jeová iha forsa boot liu fali Satanás. Se Ita adora Maromak Jeová, nia sei proteje Ita. (Tiago 4:7) Maninga ka fekit sei la kona Ita. Porezemplu, iha rai-Nijéria, matan-dook naʼin-tolu neʼebé iha forsa makaʼas halo maninga atu fekit Testemuña ba Jeová ida hodi oho nia tanba sira lakohi nia hela iha sira-nia rai. Maibé tanba ida-neʼe la kona nia, matan-dook ida sai taʼuk no bá hasoru nia hodi husu deskulpa.

Ema Éfeso sira sunu tiha sira-nia livru kona-ba masonik

Se anju aat sira fó susar ba Ita-Boot, bolu Maromak nia naran Jeová hodi nuneʼe nia sei proteje Ita. (Provérbios [Amsal] 18:10) Maibé atubele hetan protesaun, Ita-Boot rasik mós tenke hasees an husi adora lulik sira no husik tiha buat hotu neʼebé iha ligasaun ho anju aat sira. Iha tempu uluk bainhira ema Éfeso sira komesa adora Maromak Jeová, sira halibur hamutuk sira-nia livru hotu kona-ba masonik no sunu tiha. (Apóstolu 19:19, 20) Nuneʼe mós ohin loron, ema neʼebé adora Maromak Jeová  tenke soe tiha maninga, biru, ai-kulit ka ai-abut neʼebé ema fiar bele fó sorte ka proteje sira, livru sira kona-ba matan-dook no buat hotu neʼebé iha ligasaun ho anju aat sira.

Halaʼo adorasaun neʼebé loos

Se Ita-Boot hakarak halo Maromak Jeová kontente, tenke husik fiar oioin neʼebé laloos, maibé neʼe deʼit latoʼo. Ita-Boot mós tenke halaʼo adorasaun neʼebé loos no moos. Bíblia fó-hatene saida mak Maromak hakarak ita atu halo:

Tuir reuniaun husi Testemuña ba Jeová.—Ebreu 10:24, 25

Estuda Bíblia.—João 17:3

Haklaken ba ema seluk.—Mateus 24:14

Halo orasaun ba Maromak Jeová.—Filipe 4:6, 7

Hetan batizmu.—Apóstolu 2:41

 Halibur hamutuk ho Testemuña ba Jeová

Maski Satanás ho ninia anju aat sira uza ninia ema atu habelar lia-bosok no buat neʼebé laloos, maibé Maromak Jeová mós uza ninia povu Testemuña ba Jeová atu hanorin lia-loos. (Isaías [Yesaya] 43:10) Iha mundu tomak, Testemuña sira hamutuk maizumenus naʼin-8.000.000. Sira hotu hakaʼas an atu halo buat diʼak no hanorin lia-loos husi Bíblia ba ema. Ita-Boot bele hasoru sira iha sira-nia reuniaun-fatin no iha neʼebá sira hotu sei simu Ita ho laran-haksolok.

Sira-nia knaar mak ajuda ema seluk atu adora Maromak Jeová no halo tuir nia. Sira sei ajuda Ita estuda Bíblia hodi aprende oinsá atu halaʼo adorasaun neʼebé loos. La presiza selu. Testemuña sira kontente atu hanorin lia-loos tanba sira hadomi ema no hadomi Maromak Jeová.

Testemuña ba Jeová sei ajuda Ita-Boot atu adora Maromak neʼebé loos