Skip to content

Skip to table of contents

 APÉNDISE

Jesus moris iha fulan-Dezembru ka lae?

Jesus moris iha fulan-Dezembru ka lae?

BÍBLIA la fó-hatene kona-ba bainhira loos mak Jesus moris. Maibé, Bíblia fó informasaun neʼebé klaru atu ita bele hatene katak nia la moris iha fulan-Dezembru.

 Hanoin toʼok kona-ba tempu, ka klima iha fulan-Dezembru iha Belein, fatin neʼebé Jesus moris. Fulan-Kislev (fulan-Novembru/Dezembru) tuir ema judeu sira-nia kalendáriu mak tempu malirin no udan. Fulan tuirmai mak fulan-Tebet (fulan-Dezembru/Janeiru). Tempu neʼe malirin liu no dala ruma jelu-rahun mós tun iha fatin neʼebé aas. Mai ita haree saida mak Bíblia hatete kona-ba klima iha área Belein.

Iha Bíblia, livru Esdras hatudu katak fulan-Kislev mak tempu udan no malirin. Esdras hakerek katak ema-lubun halibur iha Jeruzalein “iha fulan-Sia [Kislev], iha loron 20 iha fulan neʼe”, no nia hatete katak ema sira “nakdedar . . . tanba udan tau”. Kona-ba tempu iha neʼebá, ema-lubun neʼe rasik mós hatete: “Agora tempu-udan, no ami la bele hamriik iha liʼur.” (Esdras [Ezra] 10:9, 13; Jeremias [Yeremia] 36:22) Se hanesan neʼe, iha fulan-Dezembru, bibi-atan sira la bele duni atu hein bibi iha rai-luan besik Belein!

 Maibé, Bíblia hatete katak iha kalan neʼebé Jesus moris bibi-atan sira sei hein bibi iha rai-luan. Ema ida neʼebé hakerek Evanjellu naran Lucas konta katak iha fatin besik Belein, “iha bibi-atan balu neʼebé hein sira-nia bibi iha rai-luan durante kalan tomak”. (Lucas 2:8-12) Loos duni, bibi-atan sira hein bibi iha rai-luan kalan-kalan. Sira bele halo hanesan neʼe ka lae, kuandu rai-malirin no udan iha fulan-Dezembru iha Belein? Lae, la bele. Liuhusi informasaun iha Evanjellu Lucas, ita bele hatene ho klaru katak Jesus la moris iha fulan-Dezembru. *

Maromak nia Liafuan fó-hatene ita kona-ba bainhira loos mak Jesus mate, maibé ladún fó informasaun atu hatudu bainhira loos mak nia moris. Ida-neʼe halo ita hanoin-hetan Liurai Salomão nia liafuan, neʼebé dehan: “Naran ida diʼak liu fali mina neʼebé diʼak, no loron mate diʼak liu fali loron moris.” (Eclesiastes [Pengkhotbah] 7:1) Tan neʼe mak Bíblia hakerek buat barak kona-ba knaar neʼebé Jesus halaʼo no mós kona-ba nia mate, maibé la hakerek buat barak kona-ba ninia loron moris.

Kuandu Jesus moris, bibi-atan no sira-nia bibi iha rai-luan iha kalan tomak

^ par. 1 Atu hetan informasaun liután, haree livru Bertukar Pikiran mengenai Ayat-Ayat Alkitab, pájina 129-32. Livru neʼe husi Testemuña ba Jeová, no iha mós iha lia-portugés.