Skip to content

Skip to table of contents

 APÉNDISE

Daniel fó-hatene nanis bainhira mak Mesias sei mosu

Daniel fó-hatene nanis bainhira mak Mesias sei mosu

PROFETA Daniel moris liutiha tinan 500 resin antes Jesus moris. Maibé, Maromak Jeová fó informasaun ba Daniel no informasaun neʼe sei ajuda ema atu hatene bainhira mak Maromak haraik espíritu santu ba Jesus atu sai nuʼudar Mesias, ka Kristu. Maromak hatete ba Daniel: “Ó tenke hatene no komprende katak husi tempu neʼebé fó sai liafuan atu hadiʼa no harii fali Jeruzalein toʼo Mesias, Ulun-Naʼin, sei iha semana 7, no mós semana 62.”—Daniel 9:25.

 Atu hatene tempu neʼebé Mesias mosu mai, ulukliu, ita presiza hatene bainhira loos mak Daniel nia liafuan neʼe komesa atu sai loos. Tuir profesia neʼe, Daniel nia liafuan komesa atu sai loos “husi tempu neʼebé fó sai liafuan atu hadiʼa no harii fali Jeruzalein”. Bainhira loos mak liafuan neʼe fó sai? Tuir livru Neemias iha Bíblia, liafuan atu harii fali moru neʼebé haleʼu Jeruzalein fó sai “iha Liurai Artaxerxes nia ukun ba tinan 20”. (Neemias [Nehemia] 2:1, 5-8) Matenek-naʼin kona-ba istória apoia katak Liurai Artaxerxes komesa nia ukun iha tinan 475 molok Kristu. Tan neʼe, ninia ukun ba tinan 20 mak iha tinan 455 molok Kristu. Agora, ita hatene ona katak tinan 455 molok Kristu mak tinan neʼebé Daniel nia profesia kona-ba Mesias komesa atu sai loos.

Daniel fó sai kona-ba tempu hira mak tenke liu toʼo tempu neʼebé “Mesias, Ulun-Naʼin” sei mosu. Profesia neʼe hatete “semana 7, no mós semana 62”, katak hamutuk semana 69. Neʼe katak tempu hira? Tradusaun Bíblia balu hatudu katak tempu neʼe laʼós semana neʼebé iha loron hitu, maibé semana tinan nian. Katak, semana ida mak tinan hitu. Ema judeu sira iha tempu uluk sura semana ida nuʼudar tinan hitu. Porezemplu, kada tinan hitu sira selebra tinan Sábadu, hanesan kada loron hitu sira selebra loron Sábadu. (Êxodo [Keluaran] 23:10, 11) Tan neʼe, semana 69 iha profesia neʼe mak tinan 7 dala 69 (7 × 69), hamutuk tinan 483.

Agora, mai ita sura. Se ita sura tinan 483 husi tinan 455 molok Kristu, ida-neʼe sei lori ita ba tinan 29 liutiha Kristu. Iha tinan neʼe mak Jesus hetan batizmu no sai Mesias! * (Lucas 3:1, 2, 21, 22) Hodi hatene katak profesia neʼe sai loos, ida-neʼe hametin liután ita-nia fiar, loos ka lae?

^ par. 3 Husi tinan 455 molok Kristu toʼo tinan 1 molok Kristu mak hamutuk tinan 454. Husi tinan 1 molok Kristu toʼo tinan 1 liutiha Kristu mak tinan 1 (tanba la iha tinan zero). No husi tinan 1 toʼo tinan 29 mak hamutuk tinan 28. Kuandu ita sura hamutuk (454 + 1 + 28) ida-neʼe sai tinan 483. Iha tinan 33, katak durante semana tinan 70 nian, ema “halakon” ka oho Jesus. (Daniel 9:24, 26) Atu hetan informasaun liután, lee livru Perhatikanlah Nubuat Daniel! iha kapítulu 11, no mós Pemahaman Alkitab, Jilid 2, pájina 1085-88. Livru rua neʼe husi Testemuña ba Jeová, no iha mós iha lia-portugés.