Skip to content

Karta husi Grupu Administradór—2017

Karta husi Grupu Administradór—2017

Irmaun-irmán doben sira:

Maizumenus tinan 600 molok Kristu, Maromak fó vizaun furak ida ba profeta Ezequiel. Nia haree kuda-karreta boot ida iha lalehan, neʼebé Ukun-Naʼin Boot Liu mak kontrola. Buat neʼebé kapás kona-ba kuda-karreta neʼe mak dalan neʼebé nia halai. Nia lalais tebes hanesan rai-lakan. Iha tempu neʼebé nia muda diresaun, kuda-karreta neʼe la presiza halai neineik.—Ezequiel (Yehezkiel) 1:4, 9, 12, 14, 16-27.

Vizaun neʼe fó-hanoin mai ita katak Jeová nia organizasaun parte lalehan nian sempre laʼo ba oin. Oinsá ho Jeová nia organizasaun parte rai nian? Tinan serbisu nian neʼebé foin ramata hatudu ho klaru katak Jeová mós dirije ninia povu atu laʼo ba oin ho lalais.

Foin daudauk neʼe, iha Estadus Unidus, família Betel sira preokupa tebes hodi sai husi Brooklyn no muda fali ba Warwick, Novaiorke. Balu muda ba Betel nia uma sira seluk no balu mós hetan knaar foun atu sai pioneiru. Ema Betel sira iha rai sira seluk mós preokupa tebes hodi harii, hadiʼa, ka muda ba fatin seluk. Balu tan serbisu makaʼas atu halo sira-nia Betel sai ida deʼit ho rai seluk nian. Oinsá ho imi irmaun-irmán sira? Maski imi la muda ba fatin seluk maibé ami fiar katak imi mós okupadu hodi halo buat seluk.

Ami nuʼudar Grupu Administradór sente laran-manas hodi haree katak Maromak nia povu iha mundu tomak badinas tebes hodi tuir Jeová nia organizasaun. Irmaun-irmán barak muda ba fatin neʼebé presiza liután haklaken-naʼin sira. Seluk fali koko dalan oioin atu haklaken, hanesan aprende língua foun. Barak koko ona dalan haklaken neʼebé foun ba sira. No barak tan aumenta sira-nia serbisu ba Jeová iha dalan seluk tan. Ema kristaun hotu neʼebé laran-metin ba Jeová, inklui mós ferik-katuas sira no irmaun-irmán sira neʼebé moras, kontinua hakaʼas an iha halai-taru nian atu manán moris. Sira badinas iha Jeová nia serbisu no hatudu katak Satanás mak bosok-teen!—1 Korinto 9:24.

Fiar metin bá katak Jeová la haluha imi-nia hahalok diʼak sira. (Ebreu 6:10) Tanba imi prontu atu fó imi-nia an, neʼe halo ami hanoin fali kona-ba Abraão no Sara. Bainhira Abraão tinan 70 liu, nia sai husi sidade Ur iha Kaldeia no lori ninia família ba Kanaán neʼebé dook. Durante tinan 100 tuirmai, nia la hela iha uma maibé moris iha tenda deʼit toʼo nia mate. Loos duni, Abraão ho ninia feen kontente no prontu atu halo tuir Jeová.—Gênesis (Kejadian) 11:31; Apóstolu 7:2, 3.

 Imi mós hanesan neʼe ka lae? Imi hotu neʼebé tahan ho laran-metin iha moris neʼebé susar neʼe, halo tuir duni buat neʼebé Jesus haruka ita atu halo. Nia dehan: “Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira hodi Aman, Oan no espíritu santu nia naran.”—Mateus 28:19.

Jesus uza liafuan “laʼo bá”, neʼe mós hatudu katak ita tenke badinas. Furak tebes atu haree buat hotu neʼebé ita kumpre iha tinan ida nia laran. Ita hatene katak Jeová nia liman forte mak fó bensaun ba serbisu kona-ba haklaken liafuan diʼak iha nasaun hotu.—Marcos 13:10.

Ema barak tebes hakarak rona ba ita-nia mensajen. Tinan kotuk, haklaken-naʼin aumenta toʼo 8.340.847, no fulan-fulan ita sura estudu Bíblia maizumenus 10.115.264. Ita haree ho klaru katak Jeová nia kuda-karreta laʼo ba oin lalais. No imi mós hanesan. Badinas nafatin iha loron ikus sira-neʼe toʼo tempu neʼebé Jeová sei taka odamatan ba ema atu hetan salvasaun.

Eskritura ba tinan 2017 nian mak “Tau fiar ba Jeová no halo buat neʼebé diʼak”! (Salmo [Mazmur] 37:3) Ita hatudu ita-nia fiar ba Jeová hodi halo buat neʼebé diʼak, neʼe mak liuhusi ita-nia serbisu santu ba nia. La haluha katak Ita nunka mesak iha serbisu neʼe. Jesus hatete: “Haree! Haʼu sei hamutuk nafatin ho imi toʼo mundu nia rohan.”—Mateus 28:20.

Jeová sei kontinua atu fó bensaun ba serbisu neʼebé imi halo ho laran-metin. Maski Ita bele halo buat barak ka uitoan deʼit, importante mak Ita halo ho laran tomak. Prezente sira hanesan neʼe halo Jeová kontente no book ninia laran. (2 Korinto 9:6, 7) Nuneʼe, mai ita kontinua atu hakbesik liután ba ita-nia aman iha lalehan liuhusi halo orasaun beibeik, estuda Maromak nia Liafuan, tuir reuniaun sira no hola parte beibeik iha serbisu haklaken.

Satanás hatene katak ninia tempu “hela uitoan deʼit”. No nia hakaʼas an atu uza dalan oioin atu halakon ita-nia laran-metin ba Jeová. (Apokalipse 12:12) Maibé se Ita hakbesik nafatin ba Jeová, Satanás sei la hetan susesu. (Salmo [Mazmur] 16:8) Ami hakarak imi atu hatene katak ami hadomi tebes imi no hafolin tebes imi-nia serbisu atu apoia Maromak nia Ukun iha loron ikus sira-neʼe.

Imi-nia irmaun sira,

Grupu Administradór husi Testemuña ba Jeová