Rute 2:1-23
2 Noemi iha família ida husi ninia laʼen Elimelec. Ninia naran mak Boaz.+ Nia riku tebes.
2 Rute, ema Moab, hatete ba Noemi: “Favór ida, husik haʼu bá ema nia toʼos hodi haʼu bele hili*+ sevada restu tuir serbisu-naʼin sira neʼebé hatudu laran-diʼak mai haʼu.” Entaun Noemi hatete ba nia: “Laʼo bá, haʼu-nia oan-feto.”
3 Nuneʼe nia bá no komesa hili sevada restu tuir serbisu-naʼin sira. La ho neon, nia tama ba Boaz nia toʼos.+ Boaz mak Elimelec nia família.+
4 Iha tempu neʼe, Boaz foin mai husi Belein no nia dehan ba serbisu-naʼin sira: “Jeová hamutuk ho imi.” Sira hatán: “Jeová sei fó bensaun ba Ita-Boot.”
5 Tuirmai Boaz husu ba mane joven neʼebé tau matan ba serbisu-naʼin sira, hodi dehan: “Feto joven neʼe sé-nia família?”
6 Mane joven neʼebé tau matan ba serbisu-naʼin sira hatán: “Feto joven neʼe mak ema Moab.+ Nia mai husi área Moab hamutuk ho Noemi.+
7 Ohin nia husu: ‘Favór ida, fó lisensa mai haʼu atu bele hili+ sevada restu* neʼebé serbisu-naʼin sira husik hela iha sira-nia kotuk.’ Husi dadeer toʼo agora nia serbisu la para, nia foin mak tuur iha barraka atu deskansa uitoan.”
8 Entaun Boaz hatete ba Rute: “Haʼu-nia oan, rona mai haʼu. Keta bá hili sevada restu iha toʼos seluk, no keta bá fatin seluk. Diʼak liu laʼo besik nafatin haʼu-nia atan-feto sira.+
9 Haree ba toʼos neʼebé sira sei koʼa, no laʼo tuir sira. Haʼu hatete ona ba mane joven sira atu labele book* ó. Bainhira ó hamrook, ó bele bá hemu bee neʼebé mane joven sira kuru ona iha sanan-rai laran.”
10 Rona tiha neʼe, Rute hakneʼak no hakruʼuk ho oin ba rai no dehan ba Boaz: “Tanbasá Ita hakarak hatudu laran-diʼak mai haʼu? Tanbasá Ita hanoin haʼu maski haʼu mak ema estranjeiru?”+
11 Boaz hatán: “Haʼu rona ona kona-ba buat diʼak hotu neʼebé ó halo ba ó-nia banin-feto bainhira ó-nia laʼen mate. Haʼu mós rona ona kona-ba oinsá ó husik hela ó-nia inan-aman no ó-nia família nia rai hodi mai hela ho povu neʼebé ó la koñese.+
12 Haʼu hein katak Jeová sei haraik bensaun ba ó tanba buat neʼebé ó halo ona,+ no ó sei simu kolen neʼebé perfeitu husi Jeová, Izraél nia Maromak, tanba ó mai buka protesaun iha ninia liras okos.”+
13 Rona tiha neʼe, Rute dehan: “Haʼu-nia naʼi, haʼu hein katak Ita sei hatudu nafatin laran-diʼak mai haʼu, tanba Ita fó ona kmaan ba haʼu no koʼalia hodi hametin haʼu,* maski haʼu laʼós Ita-nia atan ida.”
14 Durante tempu han, Boaz hatete ba Rute: “Mai iha neʼe, han paun balu, no hoban ó-nia paun rohan iha tua-siin laran.” Entaun nia bá tuur besik serbisu-naʼin sira. Tuirmai Boaz fó sevada neʼebé sona ona ba Rute, no nia han toʼo bosu, maibé sei iha resin.
15 Bainhira nia hamriik atu bá hili sevada restu,+ Boaz hatete ba mane joven sira: “Husik nia hili sevada restu,* no keta halo aat ba nia.+
16 Imi mós tenke hasai sevada-fulin balu neʼebé imi futu hamutuk ona no husik hela iha kotuk atu nia bele hili, keta hanetik nia.”
17 Entaun Rute kontinua hili sevada iha toʼos toʼo kalan.+ Bainhira nia baku sevada neʼebé nia halibur ona atu hasai sevada-musan, sevada neʼe maizumenus efa isin ida.*
18 Tuirmai nia foti sevada neʼe no fila ba sidade, no ninia banin-feto haree buat neʼebé nia halibur ona. Rute mós hasai hahán resin neʼebé nia rai hela+ bainhira nia han toʼo bosu no nia fó ba ninia banin-feto.
19 Ninia banin-feto hatete ba nia: “Ohin ó hili sevada iha neʼebé? Ó halo serbisu iha neʼebé? Haʼu harohan katak ema neʼebé hatudu laran-sadiʼa ba ó sei hetan bensaun.”+ Entaun Rute fó-hatene ninia banin-feto kona-ba toʼos neʼebé nia serbisu bá, hodi dehan: “Ohin haʼu serbisu iha mane ida naran Boaz nia toʼos.”
20 Entaun, Noemi hatete ba ninia feto-foun: “Haʼu hein katak Boaz sei hetan bensaun husi Jeová, Maromak neʼebé sempre hatudu domin neʼebé laran-metin ba ema moris no ema mate.”+ Noemi hatutan tan: “Nia mak ita-nia família.+ Nia mós iha direitu atu sosa fali ita hodi hasai ita husi susar.”+
21 Tuirmai Rute, ema Moab, hatete: “Nia mós dehan mai haʼu: ‘Serbisu besik haʼu-nia serbisu-naʼin sira toʼo sira koʼa hotu haʼu-nia toʼos.’”+
22 Noemi hatete ba ninia feto-foun Rute: “Haʼu-nia oan, diʼak liu ó serbisu hamutuk ho ninia atan-feto sira duké ema halo aat ba ó iha toʼos seluk.”
23 Entaun Rute kontinua serbisu hamutuk ho Boaz nia atan-feto sira hodi halibur sevada+ no trigu restu toʼo tempu koʼa nian remata. No nia nafatin hela hamutuk ho ninia banin-feto.+
Nota-rodapé
^ Haree “Hili restu” iha Glosáriu.
^ Ka karik “sevada-fulin sira neʼebé futu hamutuk ona”.
^ Ka “kaer”.
^ Ka “koʼalia atu book haʼu-nia laran”.
^ Ka karik “sevada-fulin sira neʼebé futu hamutuk ona”.
