Rute 1:1-22

  • Elimelec nia família muda ba rai-Moab (1, 2)

  • Noemi, Orpa no Rute sai faluk (3-6)

  • Rute laran-metin ba Noemi no ba ninia Maromak (7-17)

  • Noemi fila ba Belein hamutuk ho Rute (18-22)

1  Iha tempu neʼebé juís sira+ tesi-lia,* hamlaha boot mosu iha rai-Izraél. Tan neʼe, mane ida sai husi Belein+ iha rai-Judá hodi bá hela iha área* Moab+ nuʼudar ema estranjeiru. Nia bá hamutuk ho ninia feen no ninia oan-mane naʼin-rua.  Mane neʼe nia naran mak Elimelec,* ninia feen naran Noemi,* no ninia oan-mane naʼin-rua naran Malon* no Kilion.* Sira mak ema Efrata husi Belein iha rai-Judá. Bainhira sira toʼo iha área Moab, sira hela iha neʼebá.  Liutiha tempu balu, Noemi nia laʼen Elimelec mate, hela deʼit Noemi ho ninia oan-mane naʼin-rua.  Tuirmai mane sira-neʼe kaben ho feto Moab: feto ida naran Orpa no feto ida seluk naran Rute.+ Sira hela iha área Moab maizumenus tinan sanulu.  Depois neʼe, Noemi nia oan-mane naʼin-rua, Malon no Kilion, mós mate. Noemi nia oan no laʼen la iha tan, hela nia mesak deʼit.  Tan neʼe, Noemi ho ninia feto-foun sira sai husi área Moab atu fila ba ninia rai, tanba iha área Moab Noemi rona katak Jeová haraik fali ona bensaun ba Ninia povu hodi fó ai-han* ba sira.  Noemi ho ninia feto-foun sira husik hela sira-nia hela-fatin. Bainhira sira laʼo daudaun iha dalan atu fila ba rai-Judá,  Noemi hatete ba ninia feto-foun naʼin-rua: “Imi ida-idak fila ba imi-nia inan nia uma. Haʼu harohan katak Jeová sei hatudu domin neʼebé laran-metin ba imi,+ hanesan imi mós hatudu ona domin neʼebé laran-metin ba imi-nia laʼen neʼebé mate ona no mós ba haʼu.  Haʼu hein katak Jeová sei haraik bensaun ba imi ida-idak hodi imi bele iha laʼen no moris hakmatek* iha imi-nia laʼen nia uma.”+ Tuirmai Noemi reʼi sira, no sira tanis ho lian makaʼas. 10  Sira koʼalia beibeik dehan: “Lae, ami lakohi fila. Ami sei bá hamutuk ho Ita no hela ho Ita-nia povu.” 11  Maibé Noemi hatete: “Haʼu-nia oan-feto sira, fila fali bá. Tanbasá mak imi hakarak bá hamutuk ho haʼu? Haʼu bele koʼus tan oan-mane sira atu sai imi-nia laʼen ka?+ 12  Haʼu-nia oan-feto sira, fila fali bá. Fila ona, tanba haʼu ferik liu ona no labele kaben fali. Se karik haʼu iha esperansa atu kaben ho mane ida ohin kalan no koʼus tan oan-mane sira, 13  imi sei hein toʼo sira sai boot ka? Imi sei la kaben fali tan deʼit hein sira ka? Lae, haʼu-nia oan-feto sira. Haʼu sente triste* tebes kona-ba imi, tanba Jeová lolo ona liman hodi kontra haʼu.”+ 14  Sira tanis tan ho lian makaʼas, depois neʼe, Orpa reʼi ninia banin-feto no fila. Maibé Rute la husik nia. 15  Tan neʼe, Noemi hatete: “Haree bá! Ó-nia kuñada faluk neʼe fila ona ba ninia nasaun no ninia maromak sira. Ó mós fila fali bá hamutuk ho ó-nia kuñada.” 16  Maibé Rute hatete: “Keta obriga haʼu atu husik hela Ita hodi fila no la laʼo hamutuk tan ho Ita. Iha fatin neʼebé Ita bá, haʼu mós sei bá, no fatin neʼebé Ita toba kalan, haʼu mós sei toba. Ita-nia povu sei sai haʼu-nia povu, no Ita-nia Maromak sei sai haʼu-nia Maromak.+ 17  Iha fatin neʼebé Ita mate, haʼu mós sei mate, no iha neʼebá mak ema sei hakoi haʼu. Só mate deʼit mak bele haketak Ita ho haʼu. Se lae, husik Jeová fó kastigu ba haʼu no aumenta tan kastigu neʼe.” 18  Bainhira Noemi haree katak Rute hakarak tebes atu bá hamutuk ho nia, nia la obriga tan Rute. 19  Entaun sira naʼin-rua kontinua laʼo toʼo Belein.+ Bainhira sira foin toʼo iha Belein, sidade tomak sai rame, no feto sira koʼalia ba malu: “Neʼe mak Noemi ka?” 20  Noemi hatete ba feto sira-neʼe: “Keta bolu haʼu Noemi.* Bolu haʼu Mara,* tanba Maromak neʼebé Kbiit Boot Liu Hotu halo haʼu-nia moris susar tebes.*+ 21  Haʼu iha buat hotu bainhira haʼu bá, maibé Jeová halo haʼu fila ho liman-mamuk. Tanbasá imi bolu haʼu Noemi? Jeová kontra ona haʼu no Maromak neʼebé Kbiit Boot Liu Hotu lori ona susar mai haʼu.”+ 22  Neʼe mak istória kona-ba oinsá Noemi husik área Moab+ hamutuk ho ninia feto-foun Rute, ema Moab, no fila fali ba ninia rai. Sira toʼo iha Belein iha tempu neʼebé ema komesa koʼa sevada.+

Nota-rodapé

Ka “juís sira mak hametin justisa”.
Orj., “toʼos”.
Naran neʼe katak “Haʼu-nia Maromak mak liurai”.
Naran neʼe katak “Haʼu-nia haksolok”.
Karik husi liafuan Ebraiku neʼebé signifika “sai fraku; sai moras”.
Naran neʼe katak “Ida neʼebé sai fraku daudaun; Ida neʼebé besik mate ona”.
Orj., “paun”.
Ka “seguru”.
Orj., “moruk”.
Naran neʼe katak “Haʼu-nia haksolok”.
Naran neʼe katak “Moruk”.
Ka “halo haʼu-nia moris moruk tebes”.