Malaquias 3:1-18

  • Naʼi neʼebé loos mai atu hamoos ninia templu (1-5)

    • Reprezentante kona-ba aliansa (1)

  • Konvida povu atu fila fali ba Jeová (6-12)

    • Jeová la troka (6)

    • “Fila fali mai haʼu, no haʼu sei fila fali ba imi” (7)

    • ‘Lori porsentu sanulu hotu, no Jeová sei fakar tun bensaun’ (10)

  • Ema laran-loos no ema aat (13-18)

    • Maromak haruka atu hakerek ema nia naran iha livru ida (16)

    • Ema laran-loos la hanesan ho ema aat (18)

3  “Haʼu haruka haʼu-nia atan,* no nia sei hamoos* dalan iha haʼu-nia oin.+ No derrepente deʼit Naʼi neʼebé loos, neʼebé imi buka, sei mai iha ninia templu.+ No reprezentante* kona-ba aliansa mós sei mai, ida neʼebé imi hein hela ho haksolok. Nia sei mai duni”, Jeová neʼebé ukun tropa lalehan nian mak dehan.  “Maibé sé mak bele tahan iha loron neʼebé nia mai? Sé mak bele hamriik nafatin bainhira nia mosu mai? Tanba nia sei sai hanesan ahi atu hamoos besi no hanesan sabaun+ atu fase roupa.  Nia sei tuur hanesan badaen neʼebé halo nabeen no hamoos osan-mutin.+ Nia sei hamoos Levi nia oan-mane sira; nia sei hamoos sira hanesan osan-mean no osan-mutin. Ba Jeová, sira sei sai duni povu neʼebé hasaʼe sakrifísiu ho laran-loos.  No sakrifísiu neʼebé Judá no Jeruzalein hasaʼe sei halo Jeová kontente duni, hanesan iha tempu uluk no hanesan horiuluk kedas.+  Jeová neʼebé ukun tropa lalehan nian dehan: “Haʼu sei hakbesik imi atu tesi-lia, no haʼu sei prontu atu fó sasin hasoru matan-dook sira,+ ema neʼebé halo adultériu,* ema neʼebé jura falsu,+ ema neʼebé lohi hodi hamatak serbisu-naʼin sira,+ feto-faluk no oan-kiak sira,*+ no ema neʼebé lakohi ajuda ema estranjeiru.+ Ema sira-neʼe la hamtaʼuk haʼu.”  “Tanba haʼu mak Jeová; haʼu la troka.*+ No imi mak Jacob nia oan-mane sira; imi seidauk lakon mohu.  Husi imi-nia beiʼala sira-nia tempu, imi sees ona husi haʼu-nia lei no la kumpre lei sira-neʼe.+ Fila fali mai haʼu, no haʼu sei fila fali ba imi”,+ Jeová neʼebé ukun tropa lalehan nian mak dehan. Maibé imi husu: “Oinsá mak ami bele fila fali?”  “Ema bele naʼok husi Maromak ka? Maibé imi naʼok husi haʼu.” No imi husu: “Oinsá mak ami naʼok husi Ita?” “Imi naʼok husi haʼu tanba imi la fó porsentu sanulu no kontribuisaun sira.  Imi hetan duni malisan,* tanba imi naʼok husi haʼu, sin, nasaun tomak neʼe naʼok husi haʼu. 10  Lori porsentu sanulu hotu ba armazén,*+ atu nuneʼe haʼu-nia uma bele iha ai-han.+ Favór ida, koko haʼu, no haree se haʼu bele loke ba imi odamatan sira iha lalehan+ no fakar tun ba imi bensaun toʼo imi la falta tan buat ida”, Jeová neʼebé ukun tropa lalehan nian mak dehan.+ 11  Jeová neʼebé ukun tropa lalehan nian dehan: “No haʼu sei hapara gafañotu sira,* no sira sei la estraga ai-han sira iha imi-nia toʼos, no imi-nia toʼos-uvas sei fó fuan.”+ 12  Jeová neʼebé ukun tropa lalehan nian dehan: “Nasaun hotu sei fó sai katak imi kontente,+ tanba imi sei sai hanesan rai ksolok nian.” 13  Jeová dehan: “Imi koʼalia liafuan makaʼas hasoru haʼu.” No imi husu: “Oinsá mak ami koʼalia kontra Ita iha ami-nia leet?”+ 14  “Imi hatete: ‘Saugati deʼit atu serbí Maromak Jeová+ neʼebé ukun tropa lalehan nian. Ita hetan buat diʼak saida hodi kumpre ita-nia obrigasaun ba Maromak no laʼo ho oin triste iha ninia oin? 15  Agora ita haree ema foti an* nuʼudar ema neʼebé kontente, no sira neʼebé halo hahalok aat mak hetan susesu.+ Sira mós brani atu koko Maromak maibé la hetan buat aat ida.’” 16  Iha tempu neʼebá, ema neʼebé hamtaʼuk Jeová koʼalia ba malu, sira ida-idak koʼalia ba sira-nia maluk, no Jeová kontinua see tilun didiʼak no rona. Kona-ba sira neʼebé hamtaʼuk Jeová no hanoin kleʼan* kona-ba ninia naran,+ nia haruka atu hakerek sira-nia naran iha livru ida hodi hanoin-hetan sira.+ 17  Jeová neʼebé ukun tropa lalehan nian dehan: “Iha loron neʼebá, sira sei sai haʼu-nian,+ no haʼu sei halo sira sai haʼu-nia povu neʼebé espesiál.*+ Haʼu sei hatudu laran-sadiʼa ba sira, hanesan aman ida hatudu laran-sadiʼa ba ninia oan neʼebé serbí nia.+ 18  No dala ida tan, imi sei haree duni oinsá ema laran-loos la hanesan ho ema aat,+ ema neʼebé serbí Maromak la hanesan ho ema neʼebé la serbí nia.”

Nota-rodapé

Ka “ema neʼebé lori lia-menon”.
Ka “prepara”.
Ka “ema neʼebé lori lia-menon”.
Ka “labarik sira neʼebé la iha aman”.
Ka “haʼu seidauk troka”.
Ka karik “Imi fó-malisan ba haʼu”.
Ka “templu”.
Orj., “ida neʼebé tolan”. Karik neʼe refere ba insetu oioin neʼebé estraga toʼos.
Haree nota iha Núm 14:44.
Ka “medita”. Ka karik “hafolin”.
Ka “sai rikusoin neʼebé haʼu hafolin tebes”.