Ezequiel 33:1-33

  • Guarda nia knaar (1-20)

  • Ema lori mensajen katak Jeruzalein monu (21, 22)

  • Lia-menon ba ema iha sidade neʼebé rahun ona (23-29)

  • Ema la halo tuir lia-menon neʼe (30-33)

    • Ezequiel “hanesan ema neʼebé kanta knananuk domin nian” (32)

    • “Profeta ida iha sira-nia leet” (33)

33  Jeová koʼalia mai haʼu, hodi dehan:  “Oan-mane husi ema, koʼalia ba ó-nia povu nia oan-mane sira,+ hodi dehan:“‘Se karik haʼu lori surik kontra rai ida,+ no povu hotu iha rai neʼe hili mane ida nuʼudar guarda,*  no nia haree surik mai daudaun atu kontra rai neʼe, no nia huu dikur hodi fó avizu ba povu,+  entaun se ema ida rona dikur lian maibé la halo tuir avizu+ no surik mai hodi oho nia, nia rasik tenke lori todan ba ninia sala.*+  Nia rona dikur lian, maibé nia la halo tuir avizu. Nia rasik tenke lori todan ba ninia sala. Se nia halo tuir avizu, nia sei salva ninia moris.  “‘Maibé se guarda neʼe haree surik mai daudaun maibé nia la huu dikur+ no povu la hetan avizu, no surik mai hodi oho ema* ida husi povu, entaun ema neʼe sei mate tanba ninia sala rasik, maibé haʼu sei kastigu guarda neʼe tanba ema neʼe nia raan.’*+  “Oan-mane husi ema, haʼu hili ona ó nuʼudar guarda ba umakain Izraél. Kuandu ó rona liafuan husi haʼu-nia ibun, ó tenke fó sai haʼu-nia avizu ba sira.+  Bainhira haʼu dehan ba ema aat: ‘Oh ema aat, ó sei mate duni!’+ no ó la koʼalia hodi fó avizu ba ema aat neʼe atu nia troka ninia hahalok, ema aat neʼe sei mate tanba ninia sala rasik,+ maibé haʼu sei kastigu ó tanba ninia raan.*  Maibé se ó fó avizu ba ema aat atu husik ninia hahalok aat no nia lakohi troka ninia hahalok neʼe, nia sei mate tanba ninia sala,+ maibé ó sei salva duni ó-nia moris rasik.+ 10  “Oan-mane husi ema, hatete ba umakain Izraél: ‘Imi dehan ona: “Ami-nia hahalok kontra no ami-nia sala sira todan loos ba ami, no halo ami lakon.+ Entaun oinsá mak ami bele kontinua moris?”’+ 11  Hatete ba sira: ‘Jeová, Naʼi Ukun-Naʼin Boot Liu, dehan: “Haʼu jura hodi haʼu-nia moris rasik katak haʼu la kontente bainhira ema aat ida mate,+ maibé haʼu kontente bainhira ema aat ida troka ninia hahalok+ no kontinua moris.+ Oh umakain Izraél, tanbasá mak imi tenke mate?+ Fila fali, fila fali mai, husik tiha imi-nia hahalok aat.”’+ 12  “Oan-mane husi ema, hatete ba ó-nia povu nia oan-mane sira: ‘Ema laran-loos nia hahalok loos sei la salva nia bainhira nia komesa kontra.+ No mós ema aat nia hahalok aat sei la halo nia sidi bainhira nia husik ona ninia hahalok aat.+ No ema laran-loos labele kontinua moris tanba ninia hahalok loos iha loron neʼebé nia komesa halo sala.+ 13  Bainhira haʼu hatete ba ema laran-loos: “Ó sei kontinua moris duni”, depois neʼe, nia sadere ba ninia hahalok loos rasik hodi halo fali buat neʼebé aat,*+ se nuneʼe haʼu sei la hanoin-hetan ninia hahalok loos hotu, no nia sei mate tanba sala neʼebé nia halo ona.+ 14  “‘Bainhira haʼu hatete ba ema aat: “Ó sei mate duni”, depois neʼe, nia husik tiha ninia sala no halo fali hahalok loos no tuir justisa,+ 15  no ema aat neʼe fó fali buat neʼebé ema fó nuʼudar garantia* bainhira debe osan+ no selu fali buat neʼebé nia naʼok,+ no nia halo tuir ukun-fuan neʼebé lori ba moris no la halo hahalok aat, nia sei kontinua moris duni.+ Nia sei la mate. 16  Haʼu sei la hanoin tan sala hotu neʼebé nia halo ona.+ Nia sei kontinua moris duni tanba nia halo fali hahalok loos no tuir justisa.’+ 17  “Maski nuneʼe, ó-nia povu dehan: ‘Jeová nia hahalok mak la tuir justisa’, maibé loloos sira-nia hahalok mak la tuir justisa. 18  “Kuandu ema laran-loos ida husik tiha ninia hahalok loos no halo fali buat neʼebé sala, nia tenke mate tanba sala neʼe.+ 19  Maibé se ema aat ida husik tiha ninia hahalok aat hodi halo fali buat neʼebé loos no tuir justisa, nia sei kontinua moris tanba halo nuneʼe.+ 20  “Maski nuneʼe, imi dehan: ‘Jeová nia hahalok mak la tuir justisa.’+ Oh umakain Izraél, haʼu sei tesi-lia ba imi tuir imi ida-idak nia hahalok rasik.” 21  Liutiha tempu balu, iha loron lima fulan-sanulu tinan 12 husi tempu neʼebé ami sai dadur,* mane ida halai sai husi Jeruzalein no mai fó-hatene haʼu,+ hodi dehan: “Ema manán ona sidade neʼe!”+ 22  Iha kalan antes mane neʼe mai, Jeová fó forsa mai haʼu,* no nia loke haʼu-nia ibun antes mane neʼe mai iha dadeer. Entaun haʼu-nia ibun loke ona, no haʼu la sai monok tan.+ 23  Tuirmai Jeová koʼalia mai haʼu, hodi dehan: 24  “Oan-mane husi ema, ema iha sidade sira neʼebé rahun ona+ koʼalia kona-ba rai-Izraél, hodi dehan: ‘Abraão mesak deʼit, maibé nia foti rai neʼe nuʼudar liman-rohan.+ Agora ita barak loos, entaun rai neʼe entrega ona ba ita nuʼudar ita-nia liman-rohan.’ 25  “Tan neʼe, hatete ba sira: ‘Jeová, Naʼi Ukun-Naʼin Boot Liu, dehan nuneʼe: “Imi han naʼan hamutuk ho raan,+ no imi foti matan hodi hateke ba imi-nia estátua sira neʼebé haʼu hakribi,* no imi kontinua oho ema.+ Nuneʼe imi merese atu simu rai neʼe nuʼudar liman-rohan ka? 26  Imi sadere ba imi-nia surik,+ halo hahalok aat sira, no imi ida-idak hafoʼer imi-nia maluk nia feen.+ Nuneʼe imi merese atu simu rai neʼe nuʼudar liman-rohan ka?”’+ 27  “Ó tenke hatete ba sira: ‘Jeová, Naʼi Ukun-Naʼin Boot Liu, dehan nuneʼe: “Haʼu jura hodi haʼu-nia moris rasik katak ema iha sidade sira neʼebé rahun ona sei mate ho surik, sira neʼebé iha rai-luan, haʼu sei entrega ba animál fuik atu han, no sira neʼebé iha fatin seguru no iha fatuk-kuak sei mate tanba moras.+ 28  Haʼu sei halo rai neʼe rahun no mamuk,+ no haʼu sei hapara ninia hahalok foti an, no foho sira iha Izraél sei sai fuik,+ la iha ema ida mak laʼo liu. 29  Bainhira haʼu halo rai neʼe rahun no mamuk+ tanba buat aat hotu neʼebé sira halo ona,+ sira sei hatene duni katak haʼu mak Jeová.”’ 30  “Oan-mane husi ema, ó-nia povu sira koʼalia ba malu kona-ba ó iha moru sorin no iha uma nia odamatan sira.+ Maun-alin sira koʼalia ba malu, hodi dehan: ‘Mai, mai ita rona Jeová nia liafuan.’ 31  Sira barak sei tama mai nuʼudar haʼu-nia povu hodi tuur iha ó-nia oin; no sira sei rona ó-nia liafuan. Maibé sira la halo tuir liafuan sira-neʼe.+ Ho sira-nia ibun sira koʼalia liafuan midar* ba ó, maibé sira hakarak tebes atu manán buat ruma ho laran-makerek. 32  Ba sira, ó mak hanesan ema neʼebé kanta knananuk domin nian ho lian furak, no toka instrumentu neʼebé iha talin ho matenek. Sira sei rona ó-nia liafuan, maibé la iha ema ida mak halo tuir liafuan sira-neʼe. 33  Liafuan sira-neʼe sei sai loos duni. Bainhira neʼe sai loos, sira sei hatene duni katak profeta ida iha sira-nia leet.”+

Nota-rodapé

Orj., “ninia raan sei iha ninia ulun leten”.
Ka “haʼu sei husu fali ninia raan husi guarda neʼe”.
Ka “haʼu sei husu fali ninia raan husi ó”.
Ka “la tuir justisa”.
Ka “peñór”. Haree Glosáriu.
Orj., “Jeová tau liman ba haʼu”.
Ka “imi-nia ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
Ka “sira koʼalia ho kaan”.