Ebreu 2:1-18

  • Tau atensaun ba buat neʼebé ita rona (1-4)

  • Buat hotu tau ona iha Jesus nia ain okos (5-9)

  • Jesus no ninia maun-alin sira (10-18)

    • Naʼi-Ulun ba sira-nia salvasaun (10)

    • Amlulik boot neʼebé laran-sadiʼa (17)

2  Tan neʼe mak ita presiza tau atensaun liután ba buat neʼebé ita rona ona,+ atu nuneʼe ita labele laʼo sees husi fiar.+  Tanba se liafuan* neʼebé koʼalia liuhusi anju sira+ mak loos, no hahalok sala hotu no hahalok kontra ukun-fuan simu ona kastigu tuir justisa,+  entaun oinsá mak ita bele halai sees husi kastigu se ita husik ona mensajen kona-ba salvasaun neʼebé boot liu?+ Tanba ita-nia Naʼi hahú koʼalia+ kona-ba salvasaun neʼe no ema sira neʼebé rona nia fó sai ba ita katak ninia liafuan neʼe mak loos duni,  no Maromak mós fó sasin hamutuk ho sira kona-ba neʼe liuhusi sinál, milagre no buat kmanek oioin+ no mós espíritu santu neʼebé nia fahe ba ninia atan sira tuir ninia hakarak.+  Tanba nia la hili anju sira atu ukun mundu neʼebé atu mai,+ no ita koʼalia daudaun kona-ba mundu neʼe.  Maibé sasin ida hakerek ona dehan: “Ema iha folin saida hodi Ita nafatin hanoin nia, ka ema nia oan-mane iha folin saida hodi Ita tau matan ba nia?+  Ita kria nia kiʼik liu fali anju sira; Ita tau koroa glória no hahiʼi nian ba nia, no hili nia atu domina buat sira neʼebé Ita halo ho Ita-nia liman.  Ita tau ona buat hotu iha ninia ain okos.”+ Hodi halo buat hotu hakruʼuk ba nia,+ Maromak la husik hela buat ida neʼebé la hakruʼuk ba nia.+ Maski nuneʼe, agora ita seidauk haree buat hotu hakruʼuk ba nia.+  Maibé ita haree duni katak Jesus neʼebé uluk kiʼik liu fali anju sira,+ agora hetan ona koroa glória no hahiʼi nian tanba nia hetan terus toʼo mate,+ atu nuneʼe liuhusi Maromak nia laran-diʼak neʼebé boot, nia bele koko mate ba ema hotu.+ 10  Buat hotu mosu ba Maromak nia glória no mosu liuhusi nia. Maromak lori glória ba oan barak,+ tan neʼe nia halo Naʼi-Ulun ba sira-nia salvasaun+ sai perfeitu liuhusi terus oioin.+ 11  Tanba ida neʼebé halo sira santu* no sira neʼebé sai santu ona,+ sira hotu iha aman ida deʼit,+ tan neʼe mak nia la moe atu bolu sira nuʼudar ninia “maun-alin sira”,+ 12  hanesan nia dehan: “Haʼu sei fó sai Ita-nia naran ba haʼu-nia maun-alin sira; iha kongregasaun* nia leet haʼu sei hahiʼi Ita ho knananuk.”+ 13  Dala ida tan: “Haʼu sei tau fiar ba nia.”+ Dala ida tan: “Haree bá! Haʼu iha neʼe hamutuk ho labarik kiʼik sira neʼebé Jeová* fó ona ba haʼu.”+ 14  Neʼe duni, tanba “labarik kiʼik” sira-neʼe mak parte ba raan no isin, nia mós sai ema ho raan no isin,+ atu nuneʼe liuhusi ninia mate nia bele halakon ida neʼebé iha kbiit atu halo mate,+ neʼe katak Diabu,+ 15  no nia bele halo livre ema hotu neʼebé sai atan durante sira-nia moris tomak tanba sira taʼuk mate.+ 16  Tanba nia mai laʼós atu ajuda anju sira, maibé atu ajuda Abraão nia bei-oan sira.+ 17  Tan neʼe mak nia tenke sai hanesan ninia “maun-alin sira” iha buat hotu,+ atu nuneʼe nia bele sai nuʼudar amlulik boot neʼebé laran-sadiʼa no laran-metin atu halo Maromak nia serbisu, hodi nuneʼe nia bele hasaʼe sakrifísiu ba ema nia sala+ atu bele hadame malu ho Maromak.*+ 18  Nia rasik hetan ona terus bainhira nia hetan koko,+ tan neʼe nia bele ajuda sira neʼebé hetan koko.+

Nota-rodapé

Neʼe katak Moisés nia Ukun-Fuan.
Haree Ap. A5.
Ka “hasaʼe sakrifísiu atu bele hamoos ema nia sala”.