Provérbios 10:1-32

  • Oan-mane neʼebé matenek halo nia aman kontente (1)

  • Ema neʼebé badinas sei sai riku (4)

  • Liafuan barak lori sala (19)

  • Bensaun husi Jeová mak halo ema sai riku (22)

  • Hamtaʼuk Jeová sei hanaruk moris (27)

10  Salomão nia lia-dadolin* sira.+ Oan* neʼebé matenek halo ninia aman kontente,+Maibé oan neʼebé beik halo ninia inan triste.   Rikusoin neʼebé hetan ho hahalok aat sei la lori buat diʼak ida,Maibé hahalok loos mak sei salva ema husi mate.+   Jeová sei la halo ema laran-loos sai hamlaha,+Maibé nia sei la fó buat neʼebé ema laran-aat hakarak.   Ema neʼebé baruk-teen sei sai kiak,+Maibé ema neʼebé badinas sei sai riku.+   Oan neʼebé halibur rezultadu durante tempu koʼa nian mak hatudu katak nia iha matenek,*Maibé oan neʼebé toba-dukur durante tempu koʼa nian hamoe nia an rasik.+   Bensaun sei tun ba ema laran-loos nia ulun,+Maibé ema laran-aat nia ibun subar sira-nia hakarak atu halo violénsia.   Ema laran-loos nia naran diʼak* sei lori bensaun ba nia,+Maibé ema laran-aat nia naran sei lakon.*+   Ema neʼebé matenek prontu atu simu hanorin,*+Maibé ema neʼebé koʼalia liafuan beik sei lakon tiha.+   Ema neʼebé laʼo ho laran-metin* sei laʼo ho seguru,+Maibé ikusmai ema sei hatene sira neʼebé halo kleʼuk sira-nia dalan rasik.+ 10  Ema neʼebé piska matan ho laran-makerek sei hamosu laran-susar,+No ema neʼebé koʼalia liafuan beik sei lakon tiha.+ 11  Ema laran-loos nia ibun mak lori moris,+Maibé ema laran-aat nia ibun subar sira-nia hakarak atu halo violénsia.+ 12  Odi mak hamosu istori malu,Maibé domin fó perdua ba sala hotu.+ 13  Ema neʼebé hatene tetu didiʼak sei koʼalia liafuan matenek husi nia ibun,+Maibé ema uza rota hodi baku ema beik* nia kotuk.+ 14  Ema neʼebé matenek hafolin* koñesimentu,+Maibé ema beik nia ibun lori nia ba susar boot.+ 15  Ema riku nia rikusoin mak hanesan sidade neʼebé iha moru aas. Ema kiak nia susar mak ninia moris kiak.+ 16  Ema laran-loos nia hahalok lori sira ba moris;Maibé ema aat nia hahalok lori sira ba sala.+ 17  Ema neʼebé kaer metin ba dixiplina* mak sai nuʼudar dalan moris nian ba ema seluk,*Maibé ema neʼebé lakohi simu korrije sei lori ema seluk laʼo sala dalan. 18  Ema neʼebé rai odi iha ninia laran sei koʼalia bosok,+No ema beik habelar lia-bosok* hodi konta aat ema seluk. 19  Kuandu ema hasai liafuan barak, nia labele hasees an husi sala,+Maibé ema neʼebé matenek kontrola ninia ibun.+ 20  Ema neʼebé iha hahalok loos, ninia nanál mak hanesan osan-mutin neʼebé diʼak liu,+Maibé ema aat nia laran, neʼe folin kiʼik deʼit. 21  Ema laran-loos nia liafuan hatudu dalan* ba ema barak,+Maibé ema beik mate tanba la hatene tetu didiʼak.+ 22  Bensaun husi Jeová mak halo ema sai riku,+No Nia la fó susar* hamutuk ho ida-neʼe. 23  Halo hahalok neʼebé la iha moe mak hanesan buat halimar nian ba ema beik,Maibé ema neʼebé hatene atu tetu didiʼak mak ema matenek.+ 24  Buat neʼebé halo taʼuk ema laran-aat sei kona duni nia;Maibé ema laran-loos sei simu buat neʼebé nia hakarak.+ 25  Hanesan anin-fuik halakon buat hotu, nuneʼe mós ema laran-aat sei lakon mohu,+Maibé ema laran-loos mak hanesan uma nia fundasaun neʼebé metin ba nafatin.+ 26  Hanesan tua-siin kona ema nia nehan no ahi-suar kona ema nia matan,Nuneʼe mós ho ema baruk-teen iha ninia naʼi* nia oin. 27  Hamtaʼuk Jeová sei hanaruk moris,+Maibé ema aat nia tinan sira sei habadak tiha.+ 28  Ema laran-loos nia esperansa sei lori ksolok,+Maibé ema laran-aat nia esperansa sei lakon mohu.+ 29  Jeová nia hahalok* sira fó protesaun ba ema neʼebé moris ho hahalok loos,+Maibé ida-neʼe sei halakon ema aat.+ 30  La iha buat ida mak sei halo ema laran-loos monu,+Maibé ema laran-aat sei la hela tan iha rai.+ 31  Ema laran-loos nia ibun fó sai matenek,*Maibé ibun neʼebé koʼalia bosok sei nonook ba nafatin. 32  Ema laran-loos hatene koʼalia buat neʼebé diʼak,Maibé ema laran-aat nia ibun koʼalia deʼit buat neʼebé aat.

Nota-rodapé

Ka “provérbios”.
Orj., “Oan-mane”.
Ka “komprende didiʼak”.
Ka “reputasaun”.
Orj., “sai dodok”.
Orj., “mandamentu”.
Ka “integridade”.
Orj., “ema neʼebé la iha laran”.
Ka “rai didiʼak”.
Ka “hanorin; treinu”.
Ka karik “mak laʼo iha dalan ba moris”.
Ka “habelar lia-anin”.
Ka “fó-han”.
Ka “laran-triste; terus”.
Ka “patraun”.
Orj., “dalan”.
Ka “fó sai matenek hanesan ai-fuan”.