Números 17:1-13

  • Arão nia ai-tonka neʼebé mosu tubun (1-13)

17  Jeová dehan ba Moisés:  “Hatete ba ema Izraél no foti ai-tonka ida husi sira-nia umakain ida-idak, husi xefe sira ba sira-nia suku ida-idak,*+ ai-tonka hamutuk 12. Ó tenke hakerek sira ida-idak nia suku nia naran iha sira-nia ai-tonka ida-idak.  Ó tenke hakerek Arão nia naran iha suku Levi nia ai-tonka, tanba suku ida-idak* iha ai-tonka ida deʼit.  Tau ai-tonka sira-neʼe iha tenda reuniaun nia laran iha Arka Aliansa* nia oin,+ iha fatin neʼebé haʼu sempre mosu ba ó.+  Mane neʼebé haʼu hili,+ ninia ai-tonka sei iha funan, ho ida-neʼe, haʼu sei hapara ema Izraél nia muramura hasoru haʼu+ no mós hasoru imi.”+  Entaun Moisés koʼalia ba ema Izraél, no xefe sira hotu fó sira-nia ai-tonka, katak ai-tonka ida husi sira-nia suku ida-idak,* hamutuk ai-tonka 12, no Arão nia ai-tonka mós iha sira-nia ai-tonka nia leet.  Tuirmai Moisés tau ai-tonka sira-neʼe iha Jeová nia oin iha tenda neʼebé iha Arka Aliansa nian.*  Iha loron tuirmai, bainhira Moisés tama ba tenda neʼebé iha Arka Aliansa nian,* nia haree Arão nia ai-tonka neʼebé reprezenta suku Levi mosu tubun no funan no iha ai-amendueira fuan neʼebé tasak.  Depois neʼe, Moisés lori ai-tonka hotu husi Jeová nia oin hodi sai ba liʼur ba povu Izraél tomak. Sira haree didiʼak ai-tonka sira-neʼe, no mane ida-idak foti sira-nia ai-tonka. 10  Tuirmai Jeová dehan ba Moisés: “Tau fali Arão nia ai-tonka+ iha Arka Aliansa* nia oin. Ó tenke rai ai-tonka neʼe nuʼudar sinál+ ba kontradór sira-neʼe,+ atu nuneʼe sira labele muramura tan hasoru haʼu no sira labele mate.” 11  Moisés halo tuir kedas mandamentu neʼebé Jeová fó sai ona ba nia. Nia halo nuneʼe duni. 12  Tuirmai ema Izraél dehan ba Moisés: “Agora ami sei mate, ami sei mate duni, ami hotu sei mate! 13  Ema naran deʼit neʼebé hakbesik ba Jeová nia tenda santu sei mate!+ Entaun, ami hotu sei mate iha dalan hanesan neʼe ka?”+

Nota-rodapé

Orj., “ba sira-nia aman nia umakain ida-idak”.
Orj., “tanba aman nia umakain ida-idak”.
Orj., “Testemuñu”.
Orj., “ai-tonka ida ba sira-nia aman nia umakain ida-idak”.
Orj., “tenda neʼebé iha Testemuñu”.
Orj., “tenda neʼebé iha Testemuñu”.
Orj., “Testemuñu”.