Levítico 20:1-27

  • Adorasaun ba Molec; koʼalia ho ema mate (1-6)

  • Sai santu no respeitu inan-aman (7-9)

  • Ema neʼebé halo sala seksuál tenke mate (10-21)

  • Tenke sai santu hodi bele hela iha rai neʼe (22-26)

  • Tenke oho ema neʼebé koko koʼalia ho ema mate ka siʼik futuru (27)

20  Jeová koʼalia tan ba Moisés, hodi dehan:  “Ó tenke koʼalia ba ema Izraél: ‘Se ema Izraél ida no ema estranjeiru ida neʼebé hela iha Izraél nia leet entrega ninia oan ruma ba Molec,* imi tenke oho tiha ema neʼe.+ Povu iha rai neʼe tenke tuda mate nia.  Haʼu rasik sei la simu ema neʼe, no haʼu sei oho nia hodi halakon nia husi povu nia leet, tanba nia entrega ona ninia oan balu ba Molec no hafoʼer haʼu-nia fatin santu+ no haʼu-nia naran santu.  Se povu iha rai neʼe ho neon taka matan ba buat neʼebé mane neʼe halo kuandu nia entrega ninia oan ba Molec no sira la oho nia,+  entaun haʼu rasik sei la simu mane neʼe no ninia família.+ Haʼu sei oho mane neʼe hodi halakon nia husi povu nia leet hamutuk ho ema hotu neʼebé mós adora Molec hodi la hatudu laran-metin ba haʼu.*  “‘Se ema* ruma husu konsellu ba ema neʼebé koko atu koʼalia ho ema mate+ no ema neʼebé siʼik futuru+ hodi la hatudu laran-metin ba haʼu,* haʼu sei kontra hasoru ema* neʼe no oho nia hodi halakon nia husi povu nia leet.+  “‘Imi tenke halo santu* imi-nia an no sai santu,+ tanba haʼu mak Jeová, imi-nia Maromak.  Imi tenke halo tuir haʼu-nia ukun-fuan no kumpre ida-neʼe.+ Haʼu mak Jeová, Maromak neʼebé halo imi santu.+  “‘Se ema ruma fó-malisan ba* ninia aman ka inan, imi tenke oho tiha ema neʼe.+ Tanba nia fó-malisan ba ninia aman ka inan, entaun nia rasik tenke lori todan ba ninia sala.* 10  “‘Kona-ba mane neʼebé halo sala seksuál ho mane seluk nia feen,* imi tenke oho tiha mane no feto neʼebé halo sala seksuál neʼe.*+ 11  Mane neʼebé toba* ho ninia aman nia feen mak halo moe ninia aman.*+ Entaun imi tenke oho tiha mane no feto neʼe. Sira tenke lori todan ba sira-nia sala rasik. 12  Se mane ida toba* ho ninia feto-foun, entaun imi tenke oho hotu sira naʼin-rua. Neʼe mak hahalok neʼebé laʼós baibain. Sira tenke lori todan ba sira-nia sala rasik.+ 13  “‘Se mane ida toba* ho mane seluk hanesan nia toba ho feto ida, entaun sira naʼin-rua halo ona buat neʼebé aat tebes.+ Imi tenke oho tiha sira. Sira tenke lori todan ba sira-nia sala rasik. 14  “‘Se mane ida hola feto ida no mós halo relasaun seksuál ho feto neʼe nia inan, neʼe mak hahalok neʼebé foʼer tebes.*+ Imi tenke sunu sira hotu,+ atu nuneʼe hahalok foʼer labele kontinua iha imi-nia leet. 15  “‘Se mane ida halo relasaun seksuál ho animál, imi tenke oho tiha nia, no imi mós tenke oho animál neʼe.+ 16  Se feto ida hakbesik ba animál atu halo relasaun seksuál ho animál neʼe,+ imi tenke oho feto neʼe no animál neʼe. Sira tenke mate. Sira tenke lori todan ba sira-nia sala rasik. 17  “‘Se mane ida halo relasaun seksuál ho ninia feton, katak ninia aman nia oan-feto ka ninia inan nia oan-feto, no se nia haree feto neʼe nia isin-tanan no feto neʼe haree ninia isin-tanan, neʼe mak hahalok foʼer.+ Sira tenke hetan kastigu-mate iha povu nia oin. Nia hamoe ona ninia feton.* Nia tenke hatán ba ninia sala. 18  “‘Se mane ida toba* ho feto neʼebé hetan menstruasaun no halo relasaun seksuál ho feto neʼe, entaun sira la hatudu respeitu ba feto neʼe nia raan.+ Sira naʼin-rua tenke hetan kastigu-mate hodi halakon husi povu nia leet. 19  “‘Ó labele halo relasaun seksuál ho ó-nia inan nia biin ka alin ka ó-nia aman nia biin ka alin, tanba ida-neʼe hamoe ó-nia família rasik.+ Ema sira neʼebé halo nuneʼe tenke hatán ba sira-nia sala. 20  Mane neʼebé toba* ho ninia tiu nia feen hamoe ona ninia tiu.*+ Entaun feto no mane neʼe tenke hatán ba sira-nia sala. Sira tenke mate hodi la iha oan. 21  Se mane ida hola ninia maun ka alin nia feen, neʼe mak hahalok neʼebé aat tebes.+ Nia hamoe ona ninia maun ka alin.* Sira tenke mate hodi la iha oan. 22  “‘Imi tenke halo tuir haʼu-nia ukun-fuan no desizaun hotu+ no moris tuir ida-neʼe,+ atu nuneʼe rai neʼebé haʼu lori imi bá atu hela sei la muta sai imi.+ 23  Imi labele halo tuir toman husi nasaun sira neʼebé haʼu sei duni sai husi imi-nia oin,+ tanba sira halo hahalok aat sira-neʼe hotu no haʼu hakribi sira.+ 24  Tan neʼe mak haʼu dehan ba imi: “Imi sei foti sira-nia rai, no haʼu sei fó rai neʼe ba imi nuʼudar liman-rohan, rai neʼebé iha susubeen no bani-been barak.+ Haʼu mak Jeová, imi-nia Maromak, neʼebé haketak ona imi husi povu sira seluk.”+ 25  Imi tenke haketak animál neʼebé moos no la moos, no haketak manu sira neʼebé moos no la moos;+ imi labele hafoʼer imi-nia an tanba animál ida ka manu ka animál neʼebé dolar iha rai neʼebé haʼu haketak ona nuʼudar buat neʼebé la moos ba imi.+ 26  Imi tenke sai santu ba haʼu tanba haʼu, Jeová, mak santu,+ no haʼu haketak ona imi husi povu sira seluk hodi sai haʼu-nian.+ 27  “‘Imi tenke oho tiha mane ka feto neʼebé koko atu koʼalia ho ema mate ka siʼik futuru.+ Povu neʼe tenke tuda mate sira. Sira tenke lori todan ba sira-nia sala.’”

Nota-rodapé

Ka “ema hotu neʼebé halo prostituisaun ho maromak Molec”.
Ka “no halo prostituisaun iha dalan espirituál”.
Ka “hotar”.
Orj., “nia lori ninia raan rasik”.
Ka “halo adultériu”. Haree “Adultériu” iha Glosáriu.
Ka “halo adultériu”. Haree “Adultériu” iha Glosáriu.
Ka “halo relasaun seksuál”.
Orj., “hatudu sai ona ninia aman nia isin-tanan”.
Ka “halo relasaun seksuál”.
Ka “halo relasaun seksuál”.
Ka “hahalok neʼebé lori moe; la hatudu respeitu”.
Orj., “Nia hatudu sai ona ninia feton nia isin-tanan”.
Ka “halo relasaun seksuál”.
Ka “halo relasaun seksuál”.
Orj., “hatudu sai ona ninia tiu nia isin-tanan”.
Orj., “Nia hatudu sai ona ninia maun ka alin nia isin-tanan”.