Juís 9:1-57

  • Abimelec sai liurai iha Siquém (1-6)

  • Jotão konta ai-knanoik (7-21)

  • Abimelec ukun povu hodi uza violénsia (22-33)

  • Abimelec ataka Siquém (34-49)

  • Feto ida hakanek Abimelec; Abimelec mate (50-57)

9  Liutiha tempu balu, Jerubaal nia oan-mane Abimelec+ bá hasoru ninia inan nia maun-alin sira iha Siquém, no nia hatete ba sira no ba ninia avó-mane nia família tomak,* hodi dehan:  “Favór ida, husu ulun-naʼin sira* hotu husi Siquém: ‘Ida-neʼebé mak diʼak liu, Jerubaal nia oan-mane naʼin-70 hotu+ mak ukun imi ka mane ida deʼit mak ukun imi? No hanoin-hetan bá katak haʼu mak imi-nia família rasik no ita raan ida deʼit.’”*  Entaun Abimelec nia inan nia maun-alin sira koʼalia ba ulun-naʼin sira hotu husi Siquém hodi reprezenta nia, no ulun-naʼin sira hakarak atu halo tuir Abimelec, tanba sira hatete: “Nia mak ita-nia maun-alin rasik.”  Tuirmai sira fó osan-mutin 70 husi Baal-Berit nia templu+ ba Abimelec, no nia uza ida-neʼe hodi selu ema baruk-teen no ema aat sira atu laʼo tuir nia.  Depois neʼe, nia laʼo ba ninia aman nia uma iha Ofra+ no oho ninia maun-alin sira,+ katak Jerubaal nia oan-mane sira, hamutuk naʼin-70 iha fatuk ida nia leten. Jotão deʼit mak moris tanba nia subar an, no nia mak Jerubaal nia oan-mane ikun.  Tuirmai ulun-naʼin hotu husi Siquém no ema hotu husi Bet-Milo halibur hamutuk iha ai-riin neʼebé besik ai-hun boot ida iha Siquém. No sira foti Abimelec nuʼudar liurai.+  Bainhira sira fó-hatene ida-neʼe ba Jotão, nia bá kedas no hamriik iha Foho Gerizim nia tutun+ no hakilar ho lian makaʼas ba sira, dehan: “Rona mai haʼu, imi ulun-naʼin sira husi Siquém, no depois neʼe mak Maromak sei rona ba imi.  “Loron ida, ai-hun sira bá atu foti* liurai ida hodi ukun sira. Entaun sira hatete ba ai-oliveira: ‘Ukun ami bá.’+  Maibé ai-oliveira hatete ba sira: ‘Haʼu tenke para atu halo haʼu-nia mina hodi bá ukun fali ai-hun sira seluk* ka? Ema uza haʼu-nia mina atu fó glória ba Maromak no ema.’ 10  Tuirmai ai-hun sira hatete ba ai-figeira: ‘Mai ukun ami.’ 11  Maibé ai-figeira hatete ba sira: ‘Haʼu tenke para atu fó haʼu-nia fuan midar hodi bá ukun fali ai-hun sira seluk ka?’ 12  Depois neʼe, sira hatete ba uvas-hun: ‘Mai ukun ami.’ 13  Uvas-hun hatete ba sira: ‘Haʼu tenke para atu fó haʼu-nia tua-uvas foun hodi bá ukun fali ai-hun sira seluk ka? Haʼu-nia tua-uvas foun halo Maromak no ema kontente.’ 14  Ikusmai ai-hun sira seluk hotu hatete ba ai-tarak: ‘Mai ukun ami.’+ 15  Ho ida-neʼe, ai-tarak hatete ba ai-hun sira-neʼe: ‘Se imi hili* haʼu nuʼudar imi-nia liurai, entaun mai no simu protesaun iha haʼu-nia mahon. Maibé se lae, ahi sei sai mai husi ai-tarak no han tiha ai-sedru sira husi Líbanu.’ 16  “Bainhira imi halo Abimelec nuʼudar liurai,+ imi halo neʼe ho laran-moos no laran-loos ka lae? Imi hatudu ona hahalok diʼak ba Jerubaal no ninia umakain ka lae? No imi halo ona ba nia tuir buat neʼebé nia merese atu simu ka lae? 17  Bainhira haʼu-nia aman halo funu ba imi,+ nia tau ninia moris* rasik iha perigu laran hodi salva imi husi ema Midian nia liman.+ 18  Maibé ohin imi hamriik ona hodi kontra haʼu-nia aman nia umakain no oho ninia oan-mane naʼin-70 iha fatuk ida nia leten.+ Tuirmai imi foti ninia atan-feto nia oan Abimelec+ nuʼudar liurai ba ulun-naʼin sira iha Siquém tan deʼit nia ho imi mak maun-alin. 19  Sin, se ohin imi hatudu ona laran-moos no laran-loos ba Jerubaal no ninia umakain, entaun haksolok bá tanba Abimelec, no husik nia mós haksolok tanba imi. 20  Maibé se lae, ahi sei sai husi Abimelec no han hotu ulun-naʼin sira husi Siquém no Bet-Milo,+ no ahi sei sai husi ulun-naʼin sira husi Siquém no Bet-Milo hodi han Abimelec.”+ 21  Tuirmai Jotão+ halai no bá Beer. Nia hela iha neʼebá tanba taʼuk ninia maun Abimelec. 22  Abimelec ukun* Izraél ba tinan tolu. 23  Tuirmai Maromak husik Abimelec no ulun-naʼin sira husi Siquém odi malu, no sira halo aat ba Abimelec. 24  Ida-neʼe akontese atu selu fali violénsia neʼebé Abimelec no ulun-naʼin sira husi Siquém halo ba Jerubaal nia oan-mane naʼin-70, tanba Abimelec fakar ninia maun-alin sira-nia raan, no mós ulun-naʼin sira husi Siquém ajuda nia atu oho sira.+ 25  Entaun ulun-naʼin sira husi Siquém haruka mane sira atu subar iha foho leten hodi prontu atu ataka nia, no sira hadau sasán husi ema hotu neʼebé laʼo liu dalan neʼe. Liutiha tempu balu, ema fó-hatene neʼe ba Abimelec. 26  Tuirmai Ebed nia oan-mane Gaal no ninia maun-alin sira toʼo iha Siquém,+ no ulun-naʼin sira husi Siquém tau fiar ba nia. 27  Sira laʼo ba sira-nia toʼos-uvas hodi halibur uvas-fuan, no sira sama uvas-fuan sira-neʼe no halo festa ida. Depois neʼe, sira tama ba sira-nia maromak nia uma,+ no sira han, hemu no fó-malisan ba Abimelec. 28  Tuirmai Ebed nia oan-mane Gaal hatete: “Sé mak Abimelec, no sé mak Siquém?* Tanbasá mak ita tenke serbí sira? Abimelec mak Jerubaal nia oan-mane+ no Zebul mak ninia ema-boot, loos ka lae? Diʼak liu atu serbí Siquém nia aman Hamor nia oan-mane sira duké serbí Abimelec, loos ka lae? 29  Se povu sira-neʼe laʼo tuir haʼu, entaun haʼu sei hasai Abimelec.” Tuirmai nia dehan ba Abimelec: “Aumenta ó-nia tropa no sai mai hasoru haʼu.” 30  Bainhira Zebul, ulun-naʼin husi sidade neʼe, rona liafuan husi Ebed nia oan-mane Gaal, nia sai hirus tebes. 31  Entaun nia haruka ema lori lia-menon subasubar* ba Abimelec, hodi dehan: “Ebed nia oan-mane Gaal no ninia maun-alin sira agora iha Siquém no sira soran povu iha sidade neʼe hodi kontra Ita. 32  Entaun Ita no Ita-nia ema sira, saʼe mai iha kalan, no hein iha rai-luan. 33  No Ita tenke hadeer sedu iha dadeer-saan no ataka sidade neʼe; no kuandu nia no ninia ema sira sai mai hasoru Ita, halo buat naran deʼit neʼebé Ita bele hodi manán nia.” 34  Nuneʼe Abimelec no ema hotu neʼebé hamutuk ho nia sai iha kalan, no sira fahe ba grupu haat hodi hein atu ataka Siquém. 35  Bainhira Ebed nia oan-mane Gaal sai ba liʼur no hamriik iha sidade nia portaun, Abimelec no ema hotu neʼebé hamutuk ho nia hamriik husi sira-nia subar-fatin. 36  Kuandu Gaal haree ema sira-neʼe, nia hatete ba Zebul: “Haree! Iha ema balu neʼebé tun daudaun husi foho-tutun sira.” Maibé Zebul hatete ba nia: “Buat neʼebé ó haree mak foho sira-nia lalatak deʼit neʼebé hanesan ema.” 37  Depois neʼe, Gaal dehan: “Haree! Ema balu neʼebé tun daudaun mai husi rai neʼe nia klaran, no grupu ida mai daudaun liuhusi dalan neʼebé liu ai-hun boot iha Meonenim.” 38  Zebul hatán ba nia: “Agora ó-nia liafuan gaba nian iha neʼebé? Uluk ó dehan: ‘Sé mak Abimelec hodi ita tenke serbí nia?’+ Sira-neʼe mak povu neʼebé ó nega ona, loos ka lae? Agora sai bá no funu hasoru sira.” 39  Entaun Gaal bá hodi laʼo uluk iha ulun-naʼin sira husi Siquém nia oin no funu hasoru Abimelec. 40  Abimelec duni tuir nia, no Gaal halai husi Abimelec, no ema barak mate husi fatin neʼe toʼo sidade nia portaun. 41  Abimelec fila hodi hela iha Aruma; no Zebul+ duni sai Gaal no ninia maun-alin sira husi Siquém. 42  Loron tuirmai povu husi sidade neʼe sai ba rai-luan, no ema fó-hatene ida-neʼe ba Abimelec. 43  Entaun nia lori ninia tropa no fahe sira ba grupu tolu no subar iha rai-luan hodi prontu atu ataka. Bainhira nia haree povu sai husi sidade neʼe, nia ataka no oho sira. 44  Abimelec no tropa sira neʼebé hamutuk ho nia halai ba oin no hamriik iha sidade neʼe nia portaun, maibé tropa grupu rua ataka ema hotu iha rai-luan no oho ema sira-neʼe. 45  Abimelec funu hasoru sidade neʼe iha loron tomak no manán ida-neʼe. Nia oho povu sira iha laran, no tuirmai nia harahun sidade neʼe+ no kari masin ba sidade neʼe. 46  Bainhira ulun-naʼin sira hotu iha uma aas* Siquém nian rona kona-ba neʼe, sira bá kedas hodi subar iha kuartu boot laran neʼebé seguru iha El-Berit nia templu.+ 47  Bainhira ema fó-hatene ba Abimelec katak ulun-naʼin hotu iha uma aas Siquém nian halibur hamutuk ona, 48  Abimelec no mane hotu neʼebé hamutuk ho nia saʼe ba Foho Zalmon. Abimelec foti baliu ida no tesi ai-sanak ida no lori ai-sanak neʼe iha ninia kabaas no nia hatete ba ema neʼebé hamutuk ho nia, hodi dehan: “Buat neʼebé imi haree haʼu halo, halo tuir lalais bá!” 49  Entaun ema sira-neʼe hotu mós tesi ai-sanak no laʼo tuir Abimelec. Tuirmai sira sadere ai-sanak sira-neʼe haleʼu kuartu boot neʼebé ema subar bá no sunu tiha kuartu neʼe. Ho ida-neʼe, ema hotu iha uma aas Siquém nian mate, mane no feto maizumenus naʼin-1.000. 50  Depois neʼe, Abimelec laʼo ba Tebez. Nia halo serku ba Tebez no manán sidade neʼe. 51  Iha sidade neʼe nia klaran iha uma aas neʼebé metin, entaun mane, feto no ulun-naʼin sidade nian hotu halai bá neʼebá. Sira xave sira-nia an iha laran no saʼe ba uma aas neʼe nia kakuluk. 52  No Abimelec laʼo ba uma aas neʼe no ataka uma neʼe. Nia hakbesik ba uma aas neʼe nia portaun hodi sunu ida-neʼe. 53  Tuirmai feto ida soe tun fatuk dulas trigu nian ba Abimelec nia ulun no harahun ninia ulun-ruin.+ 54  Abimelec bolu lalais ninia atan neʼebé lori ninia armas no hatete ba nia: “Losu ó-nia surik no oho haʼu, atu nuneʼe ema labele koʼalia kona-ba haʼu, hodi dehan: ‘Feto ida mak oho nia.’” Entaun ninia atan sona borus nia, no nia mate. 55  Bainhira ema Izraél haree katak Abimelec mate ona, sira hotu fila fali ba sira-nia uma. 56  Ho ida-neʼe mak Maromak selu fali ba Abimelec hodi tuir buat aat neʼebé nia halo ona ba ninia aman tanba nia oho ninia maun-alin naʼin-70.+ 57  Maromak mós selu fali ba mane sira husi Siquém tanba buat aat hotu neʼebé sira halo. Nuneʼe, Jerubaal+ nia oan-mane Jotão+ nia malisan kona sira.

Nota-rodapé

Orj., “família husi ninia inan nia aman nia umakain”.
Ka karik “ema rai-naʼin sira”.
Orj., “haʼu mak imi-nia ruin no isin”.
Orj., “fui mina ba”. Haree “Fui mina” iha Glosáriu.
Ka “hodi doko haʼu-nia sanak sira iha ai-hun seluk nia leten”.
Orj., “fui mina ba”. Haree “Fui mina” iha Glosáriu.
Ka “halo nia an nuʼudar ulun-naʼin”.
Karik neʼe refere ba Siquém nia ema-boot naran Zebul.
Ka “ho laran-aat”.
Ka “torre”.