Juís 8:1-35

  • Mane Efraim sira sai hirus ba Gideão (1-3)

  • Duni tuir no oho ema Midian nia liurai sira (4-21)

  • Gideão lakohi sai ukun-naʼin (22-27)

  • Rezumu kona-ba Gideão nia moris (28-35)

8  Tuirmai mane Efraim sira hatete ba Gideão: “Tanbasá mak ó halo nuneʼe ba ami? Tanbasá mak ó la bolu ami bainhira ó bá funu hasoru ema Midian?”+ No sira diskute malu makaʼas ho nia.+  Maibé nia hatete ba sira: “Haʼu halo buat kiʼik deʼit se kompara ho imi, loos ka lae? Uvas-fuan restu husi Efraim+ mak diʼak liu fali uvas-fuan hotu neʼebé koʼa husi Abi-Ezer,+ loos ka lae?  Tuir loloos, Maromak entrega ema Midian nia ulun-naʼin naʼin-rua, Oreb no Zeeb,+ ba imi-nia liman, entaun buat neʼebé haʼu halo labele kompara ho imi, loos ka lae?” Bainhira nia koʼalia tiha liafuan sira-neʼe, sira sai kalma.  Depois neʼe, Gideão toʼo iha Mota Jordaun no hakur mota neʼe. Maski nia no mane naʼin-300 hamutuk ho nia sente kole ona, maibé sira kontinua duni tuir sira-nia inimigu.  Entaun nia hatete ba mane sira iha Sukot: “Favór ida, fó paun balu ba haʼu-nia ema sira neʼebé laʼo tuir haʼu, tanba sira kole no haʼu duni tuir daudaun Zeba no Zalmuna, ema Midian nia liurai sira.”  Maibé ulun-naʼin sira husi Sukot hatete: “Ó kaer ona Zeba no Zalmuna hodi nuneʼe ami tenke fó paun ba ó-nia tropa ka?”  Ho ida-neʼe, Gideão dehan: “Tanba imi koʼalia hanesan neʼe, entaun haʼu sei baku imi ho ai-tarak husi rai-fuik bainhira Jeová entrega Zeba no Zalmuna ba haʼu-nia liman.”+  Tuirmai, nia sai husi fatin neʼe no saʼe ba Penuel no husu buat neʼebé hanesan ba ema Penuel, maibé sira hatán ba nia hanesan ho mane Sukot sira.  Entaun nia mós hatete ba ema Penuel: “Bainhira haʼu fila fali ho dame, haʼu sei harahun imi-nia uma aas* neʼe.”+ 10  Iha tempu neʼe, Zeba no Zalmuna iha Karkor hamutuk ho sira-nia tropa, maizumenus mane naʼin-15.000. Sira mak restu husi tropa sira hotu husi área Leste,+ tanba tropa naʼin-120.000 neʼebé kaer surik mate ona. 11  Gideão kontinua laʼo saʼe liuhusi dalan ema laʼo-rai nian iha parte leste husi Noba no Jogbea+ no ataka inimigu sira neʼebé seidauk prepara an. 12  Bainhira ema Midian nia liurai naʼin-rua, Zeba no Zalmuna halai tiha, Gideão duni tuir no kaer sira, no nia halo inimigu hotu sai taʼuk. 13  Depois neʼe, Joas nia oan-mane Gideão fila fali husi funu no nia laʼo liuhusi dalan neʼebé saʼe ba Heres. 14  Iha dalan neʼe, nia kaer no litik mane joven ida husi Sukot. Entaun mane joven neʼe hakerek naran husi ulun-naʼin no katuas sira iha Sukot, no sira hamutuk mane naʼin-77. 15  Ho ida-neʼe, nia bá hasoru ema Sukot no dehan: “Neʼe mak Zeba no Zalmuna neʼebé imi goza haʼu hodi dehan: ‘Ó kaer ona Zeba no Zalmuna hodi nuneʼe ami tenke fó paun ba ó-nia ema sira neʼebé kole ka?’”+ 16  Tuirmai, Gideão lori katuas sira husi sidade neʼe no nia uza ai-tarak husi rai-fuik hodi fó kastigu ba katuas sira husi Sukot.+ 17  Nia mós sobu rahun uma aas* iha Penuel+ no oho mane sira iha sidade neʼe. 18  Gideão husu ba Zeba no Zalmuna: “Ema hanesan saida mak imi oho iha Tabor?” Sira hatán: “Ema sira-neʼe mak hanesan ó, sira ida-idak haree hanesan liurai nia oan-mane.” 19  Ho ida-neʼe, nia hatete: “Sira mak haʼu-nia maun-alin sira, haʼu-nia inan nia oan-mane sira. Haʼu jura hodi Jeová, Maromak neʼebé moris, se imi la oho sira karik, haʼu mós sei la oho imi.” 20  Tuirmai nia dehan ba ninia oan-mane primeiru Jeter: “Hamriik bá, oho sira.” Maibé mane joven neʼe lakohi losu ninia surik. Nia taʼuk tanba nia sei joven hela. 21  Entaun Zeba no Zalmuna hatete: “Se ó mak mane forte, ó rasik mak mai oho ami.” Entaun Gideão hamriik no oho Zeba no Zalmuna,+ no nia foti buat murak neʼebé modelu hanesan fulan-lotuk neʼebé tara iha sira-nia kuda-kamelu nia kakorok. 22  Liutiha tempu balu, ema Izraél hatete ba Gideão: “Ukun ami bá, ó no ó-nia oan-mane sira no ó-nia bei-oan sira, tanba ó salva ona ami husi ema Midian nia liman.”+ 23  Maibé Gideão hatete ba sira: “Haʼu sei la ukun imi, no haʼu-nia oan-mane sira mós sei la ukun imi. Jeová mak sei ukun imi.”+ 24  Gideão dehan tan ba sira: “Haʼu hakarak husu imi buat ida: Imi ida-idak fó ba haʼu brinkus inus nian ida husi sasán neʼebé imi foti.” Tuir loloos ema neʼebé sira manán mak ema Ismael, no ema Ismael sira baibain tau brinkus osan-mean iha sira-nia inus.+ 25  Sira hatán: “Ami sei fó duni buat sira-neʼe.” Ho ida-neʼe, sira nahe unuk ida no ema ida-idak soe brinkus inus nian ida ba laran. 26  Brinkus osan-mean sira-neʼe nia todan hamutuk kilograma 19 ho balu,* neʼe la sura ho buat murak neʼebé modelu hanesan fulan-lotuk, brinkus seluk, hena kór-violeta neʼebé liurai Midian sira hatais, no korrente sira neʼebé foti husi kuda-kamelu.+ 27  Gideão halo efod* ida husi buat sira-neʼe+ no tau iha ninia sidade Ofra.+ No ema Izraél hotu komesa adora* efod neʼe iha neʼebá,+ no ida-neʼe sai nuʼudar lasu ba Gideão no ninia umakain.+ 28  Nuneʼe ema Izraél manán ema Midian,+ no sira la sadik* tan ema Izraél; no rai neʼe hakmatek* ba tinan 40 durante Gideão nia moris.+ 29  Entaun, Joas nia oan-mane Jerubaal+ fila fali ba ninia uma no hela iha neʼebá. 30  Gideão sai aman ba oan-mane naʼin-70 tanba nia iha feen barak. 31  Ninia feen-kiʼik iha Siquém mós tuur-ahi oan-mane ida, no Gideão hanaran oan neʼe Abimelec.+ 32  Ikusmai, Joas nia oan-mane Gideão mate ho tinan boot no ema hakoi nia iha ninia aman Joas nia rate iha Ofra, ema Abi-Ezer nia rai.+ 33  Bainhira Gideão mate tiha, ema Izraél komesa kedas adora fali* Baal sira,+ no sira hili Baal-Berit nuʼudar sira-nia maromak.+ 34  Ema Izraél la hanoin-hetan Jeová, sira-nia Maromak,+ neʼebé salva sira husi sira-nia inimigu hotu nia liman, katak inimigu neʼebé haleʼu sira.+ 35  Sira mós la hatudu domin neʼebé laran-metin ba Jerubaal nia umakain, katak Gideão nia umakain, maski Gideão halo ona buat diʼak barak ba Izraél.+

Nota-rodapé

Ka “torre”. Haree Glosáriu.
Ka “torre”. Haree Glosáriu.
Orj., “siklo 1.700”. Haree Ap. B14.
Ka “komesa halo prostituisaun iha dalan espirituál ho”.
Orj., “la hiʼit saʼe sira-nia ulun”.
Ka “iha dame”.
Ka “komesa halo prostituisaun iha dalan espirituál ho”.