Juís 3:1-31

  • Jeová koko Izraél (1-6)

  • Otniel, juís primeiru (7-11)

  • Juís Ehud oho Liurai Eglon neʼebé bokur loos (12-30)

  • Juís Samgar (31)

3  Jeová husik nasaun balu atu nuneʼe sira bele koko ema Izraél hotu neʼebé seidauk halo funu ho ema Kanaan.+  Nia husik sira hodi nuneʼe ema Izraél nia jerasaun neʼebé seidauk halo funu bele hetan esperiénsia no sai matenek atu halo funu.  Nasaun sira-neʼe inklui ema Filístia nia naʼi-ulun naʼin-lima,+ ema Kanaan hotu, ema Sidon+ no mós ema Heveu+ neʼebé hela iha Foho Líbanu+ husi Foho Baal-Hermon toʼo Lebo-Hamat.*+  Nasaun sira-neʼe sai nuʼudar buat neʼebé koko ema Izraél se sira halo tuir ka lae Jeová nia mandamentu neʼebé nia fó ba sira-nia beiʼala liuhusi Moisés.+  Entaun ema Izraél hela hamutuk ho ema Kanaan,+ ema Hetes, ema Amoreu, ema Perizeu, ema Heveu no ema Jebus.  Ema Izraél hili feen husi nasaun sira-neʼe nia oan-feto sira, no sira mós fó sira-nia oan-feto ba nasaun sira-neʼe nia oan-mane sira, no ema Izraél komesa serbí nasaun sira-neʼe nia maromak sira.+  Nuneʼe ema Izraél halo buat neʼebé aat tuir Jeová nia haree, no sira haluha Jeová, sira-nia Maromak, no serbí fali Baal+ no ai-riin lulik sira.*+  Ho ida-neʼe, Jeová sai hirus tebes hasoru ema Izraél, no nia faʼan sira ba Liurai Kusan-Risataim husi Mezopotámia.* No ema Izraél serbí Kusan-Risataim ba tinan ualu.  Bainhira ema Izraél husu ajuda ba Jeová,+ Jeová hili salvadór ida atu salva ema Izraél.+ Nia mak Otniel,+ Kenaz nia oan-mane, Caleb nia alin. 10  Jeová nia espíritu tun ba Otniel,+ no nia sai nuʼudar juís ba rai-Izraél. Bainhira Otniel bá funu, Jeová entrega Liurai Kusan-Risataim husi Mezopotámia* ba ninia liman atu nuneʼe nia bele manán Kusan-Risataim. 11  Depois neʼe, rai neʼe hakmatek* ba tinan 40. Tuirmai Kenaz nia oan-mane Otniel mate. 12  No dala ida tan ema Izraél komesa halo fali buat neʼebé aat tuir Jeová nia haree.+ Tan neʼe, Jeová husik Liurai Eglon husi Moab+ manán ema Izraél, tanba ema Izraél halo buat neʼebé aat iha Jeová nia oin. 13  Liután neʼe, nia lori ema Ammon+ no ema Amalec hodi kontra sira.+ Sira ataka ema Izraél no manán sidade ai-palmeira nian.+ 14  No ba tinan 18 ema Izraél serbí Liurai Eglon husi Moab.+ 15  Tuirmai ema Izraél husu ajuda ba Jeová,+ entaun Jeová hili salvadór ida ba sira.+ Neʼe mak ema Benjamim+ ida naran Ehud,+ Gera nia oan-mane, no nia mak ema neʼebé uza liman-karuk.+ Liutiha tempu balu, ema Izraél haruka impostu* liuhusi nia hodi fó ba Liurai Eglon husi Moab. 16  Iha tempu neʼe, Ehud halo surik ida ho kroʼat rua, neʼebé naruk sentímetru 38,* no nia kesi ida-neʼe iha ninia kelen sorin loos iha ninia roupa okos. 17  Tuirmai nia lori impostu neʼe ba Liurai Eglon husi Moab. Eglon mak ema neʼebé bokur loos. 18  Bainhira Ehud entrega tiha impostu, nia fila hamutuk ho ema neʼebé lori impostu neʼe. 19  Maibé kuandu nia toʼo iha estátua sira* iha Gilgal,+ nia mesak fila fali no dehan: “Haʼu iha lia-menon segredu ida ba Ita-Boot, oh liurai.” Entaun liurai hatete: “Husik ami mesak!”* Ho ida-neʼe, ninia atan hotu husik nia. 20  Entaun Ehud hakbesik ba Eglon neʼebé tuur mesak hela iha kuartu malirin iha uma-leten. Tuirmai Ehud hatete: “Haʼu iha lia-menon husi Maromak ba Ita.” Nuneʼe nia hamriik husi ninia kadunan.* 21  Depois neʼe, Ehud losu surik husi ninia kelen sorin loos ho ninia liman-karuk no sona Eglon nia kabun. 22  Surik ulun mós tama tomak, no Eglon nia bokur taka tiha surik neʼe, tanba Ehud la dada sai surik neʼe husi Eglon nia kabun, no tee fakar sai. 23  Tuirmai Ehud sai liuhusi janela,* nia taka odamatan sira iha kuartu leten no xave tiha. 24  Bainhira nia bá tiha, atan sira fila fali no haree katak odamatan sira iha kuartu leten xave metin hela. Entaun sira dehan: “Karik liurai sentina hela* iha kuartu malirin nian.” 25  Sira kontinua hein toʼo sira sai moe, maibé kuandu sira haree katak nia seidauk loke odamatan iha kuartu leten, sira foti xave hodi loke odamatan no sira haree katak sira-nia naʼi monu hela iha rai no mate tiha ona! 26  Bainhira sira demora hela, Ehud halai tiha no nia laʼo liu estátua,*+ no toʼo iha Seira ho seguru. 27  Bainhira nia toʼo iha Efraim nia área foho nian,+ nia huu dikur,+ no ema Izraél tun hamutuk ho nia hodi sai husi área foho neʼe, nia mak laʼo iha sira-nia oin. 28  Tuirmai nia dehan ba sira: “Laʼo tuir haʼu, tanba Jeová entrega ona imi-nia inimigu, ema Moab, ba imi-nia liman.” Entaun sira laʼo tuir nia no sira manán dalan sira neʼebé uza atu hakur Mota Jordaun, hodi nuneʼe ema Moab labele hakur mota neʼe. 29  Iha tempu neʼebá, sira oho ema Moab maizumenus naʼin-10.000,+ no ema sira-neʼe hotu mak mane neʼebé forte no aten-brani, maibé sira ida mós labele halai.+ 30  Entaun iha loron neʼebá ema Izraél manán ema Moab, no rai neʼe hakmatek* ba tinan 80.+ 31  Depois Ehud, Anat nia oan-mane Samgar+ salva Izraél. Samgar mak ida neʼebé oho ema Filístia naʼin-600+ ho ai neʼebé meik.*+

Nota-rodapé

Ka “fatin atu tama ba Hamat”.
Orj., “Aram-Naaraim”.
Orj., “Aram”.
Ka “iha dame”.
Ka “prezente”.
Orj., “kóvado 1”. Karik neʼe mak kóvado badak. Haree Ap. B14.
Ka karik “iha fatin keʼe fatuk nian”.
Orj., “Nonook tiha!”
Ka “kadeira”.
Ka karik “kuak neʼebé anin tama”.
Orj., “taka ninia ain”.
Ka karik “fatin keʼe fatuk nian”.
Ka “iha dame”.