Juís 2:1-23

  • Jeová nia anju fó avizu (1-5)

  • Josué mate (6-10)

  • Maromak foti juís sira atu salva Izraél (11-23)

2  Tuirmai, Jeová nia anju+ sai husi Gilgal+ hodi saʼe ba Bokim no dehan ba ema Izraél: “Haʼu lori imi sai husi rai-Ejitu hodi tama ba rai neʼebé haʼu jura ona ba imi-nia beiʼala sira.+ Liután neʼe, haʼu dehan: ‘Haʼu sei nunka kontra haʼu-nia aliansa ho imi.+  Kona-ba imi, imi labele halo aliansa ida ho ema neʼebé hela iha rai neʼe,+ no imi tenke harahun tiha sira-nia altár sira.’+ Maibé imi la halo tuir haʼu-nia liafuan.+ Tanbasá mak imi halo nuneʼe?  Tan neʼe mak haʼu mós dehan: ‘Haʼu sei la duni sai sira husi imi-nia oin,+ no sira sei sai nuʼudar lasu ida ba imi,+ no sira-nia maromak sira sei dada imi atu la adora tan haʼu.’”+  Bainhira Jeová nia anju koʼalia tiha liafuan sira-neʼe ba ema Izraél hotu, povu neʼe hahú tanis ho lian makaʼas.  Nuneʼe, sira hanaran fatin neʼe Bokim,* no sira hasaʼe sakrifísiu ba Jeová iha neʼebá.  Bainhira Josué haruka povu Izraél bá, sira ida-idak bá atu foti rai nuʼudar sira-nia liman-rohan.+  Povu neʼe kontinua serbí Jeová durante Josué nia moris tomak no durante katuas sira-nia tempu. Katuas sira-neʼe moris naruk liu Josué no haree ona hahalok boot hotu neʼebé Jeová halo ba ema Izraél.+  Tuirmai Jeová nia atan Josué, Nun nia oan-mane, mate kuandu nia tinan 110.+  Sira hakoi nia iha ninia rai iha Timnat-Heres,+ neʼebé iha área foho nian iha Efraim, iha Foho Gaas nia sorin parte norte.+ 10  Ikusmai jerasaun hotu neʼe mate,* no jerasaun seluk mosu mai, no jerasaun neʼe la hatene Jeová no la hatene buat neʼebé nia halo ona ba ema Izraél. 11  Nuneʼe ema Izraél halo buat neʼebé aat tuir Jeová nia haree no serbí* Baal sira.+ 12  Ho ida-neʼe, sira husik Jeová, sira-nia beiʼala nia Maromak, ida neʼebé lori sira sai husi rai-Ejitu.+ No sira halo tuir fali maromak sira seluk, maromak sira husi povu neʼebé hela haleʼu sira,+ no sira hahú hakruʼuk ba maromak sira-neʼe no halo Jeová laran-kanek.+ 13  Sira husik tiha Jeová no serbí Baal no Astoret nia estátua sira.+ 14  Ho ida-neʼe, Jeová sai hirus tebes hasoru ema Izraél, entaun nia entrega sira ba inimigu neʼebé hadau no foti sira-nia sasán.+ Nia faʼan sira ba sira-nia inimigu neʼebé haleʼu sira,+ no sira la iha ona kbiit atu kontra hasoru sira-nia inimigu.+ 15  Iha fatin hotu neʼebé sira bá, Jeová nia liman sempre kontra sira hodi lori susar ba sira,+ hanesan Jeová hatete ona no hanesan Jeová jura ona ba sira,+ no sira-nia situasaun sai susar tebes.+ 16  Nuneʼe Jeová hili juís sira neʼebé salva sira husi inimigu neʼebé hadau sira-nia sasán.+ 17  Maibé sira mós lakohi rona ba juís sira no faʼan an* ba maromak sira seluk no hakruʼuk ba maromak sira-neʼe. Sira lalais atu laʼo sees husi dalan neʼebé sira-nia beiʼala laʼo bá, katak sira-nia beiʼala neʼebé halo tuir Jeová nia mandamentu.+ Sira la hanesan duni ho sira-nia beiʼala. 18  Bainhira Jeová hili juís ida ba sira,+ Jeová hamutuk ho juís neʼe hodi salva sira husi sira-nia inimigu durante juís neʼe nia moris tomak. Jeová halo nuneʼe tanba nia hanoin tebes sira*+ bainhira sira halerik kona-ba terus neʼebé sira hetan husi ema neʼebé hanehan sira+ no husi ema neʼebé halo aat tebes ba sira. 19  Maibé kuandu juís neʼe mate, sira hatudu hahalok aat liu fali sira-nia aman hodi halo tuir maromak sira seluk, serbí no hakruʼuk ba maromak sira-neʼe.+ Sira la husik sira-nia toman no ulun-toos nafatin. 20  Ikusmai Jeová sai hirus tebes hasoru Izraél,+ no dehan: “Tanba nasaun neʼe kontra ona haʼu-nia aliansa+ neʼebé haʼu haruka ba sira-nia beiʼala no la halo tuir haʼu,+ 21  haʼu mós sei la duni sai nasaun sira neʼebé Josué seidauk manán antes nia mate,+ 22  atu ida-neʼe bele koko ema Izraél se sira sei laʼo tuir Jeová nia dalan+ neʼebé sira-nia aman sira mós laʼo tuir ka lae.” 23  Tan neʼe, Jeová husik nasaun sira-neʼe. Nia la duni sai sira ho lalais, no nia la entrega nasaun sira-neʼe ba Josué nia liman.

Nota-rodapé

Naran neʼe katak “Ema neʼebé tanis”.
Orj., “halibur ho sira-nia beiʼala sira”. Neʼe mak liafuan poezia neʼebé refere ba mate.
Ka “adora”.
Ka “halo prostituisaun”.
Ka “tanba nia sente triste ba sira”.