Juís 15:1-20

  • Sansão selu fali ema Filístia sira (1-20)

15  Liutiha tempu balu, iha tempu koʼa trigu nian, Sansão bá vizita ninia feen no lori bibi-timur oan ida. Nia dehan: “Haʼu hakarak atu tama ba haʼu-nia feen nia kuartu.” Maibé feto neʼe nia aman la husik nia atu tama.  Feto neʼe nia aman hatete: “Haʼu hanoin: ‘Ó odi tebes nia.’+ Tan neʼe, haʼu entrega nia ba mane ida neʼebé uluk akompaña ó nuʼudar noivu.+ Ninia alin-feto bonita liu nia, loos ka lae? Favór ida, hola nia bá.”  Maibé Sansão hatete ba sira: “Agora ema Filístia labele duun haʼu kuandu haʼu halo aat ba sira.”  Entaun Sansão bá kaer asu-rapoza* 300. Tuirmai nia kesi asu-rapoza rua-rua nia ikun ba malu no nia foti ai* no tau ai neʼe entre ikun rua nia klaran.  Depois neʼe, nia sunu lakan ai sira no husik asu-rapoza sira-neʼe tama ba ema Filístia nia toʼos-trigu. Nia sunu buat hotu, husi trigu-futun toʼo trigu neʼebé seidauk koʼa, no mós toʼos-uvas no toʼos-oliveira.  Ema Filístia sira husu: “Sé mak halo ida-neʼe?” Ema dehan ba sira: “Sansão, ema Timna nia mane-foun mak halo ida-neʼe, tanba Sansão nia banin-mane fó tiha ona ninia feen ba mane ida neʼebé uluk akompaña nia nuʼudar noivu.”+ Ho ida-neʼe, ema Filístia sira bá sunu feto neʼe hamutuk ho ninia aman.+  Tuirmai Sansão hatete ba sira: “Tanba imi halo nuneʼe, entaun haʼu sei la para atu selu fali imi-nia hahalok aat neʼe.”+  Entaun, nia oho sira ida-idak toʼo barak tebes, depois nia tun bá no hela iha fatuk-kuak iha Fatuk Boot Etam.  Liutiha tempu balu, ema Filístia saʼe mai no harii tropa nia hela-fatin iha Judá no laʼo bá-mai iha Lehi.+ 10  Tan neʼe, ema Judá dehan: “Tanbasá mak imi mai kontra ami?” Sira hatán: “Ami mai atu kaer* Sansão, hodi halo ba nia hanesan nia halo ona ba ami.” 11  Entaun mane Judá naʼin-3.000 tun ba fatuk-kuak iha Fatuk Boot Etam no hatete ba Sansão: “Ó la hatene katak ema Filístia mak ukun ita ka?+ Tanbasá mak ó halo nuneʼe ba ami?” Nia hatán ba sira: “Haʼu halo neʼe ba sira, hanesan sira halo ona ba haʼu.” 12  Maibé sira hatete ba nia: “Ami mai atu kaer* ó no entrega ó ba ema Filístia.” Sansão hatán: “Imi tenke jura ba haʼu katak imi rasik sei la ataka haʼu.” 13  Sira dehan ba nia: “Lae, ami sei kesi deʼit ó no entrega ó ba sira, maibé ami sei la oho ó.” Entaun sira kesi Sansão ho tali foun rua no lori nia sai husi fatuk boot neʼe nia kuak. 14  Bainhira nia toʼo iha Lehi, ema Filístia haklalak ho lian kontente hodi hasoru nia. Tuirmai Jeová nia espíritu fó kbiit ba nia,+ no tali neʼebé bobar nia liman sai fali hanesan kabas neʼebé ahi han ona, no tali sira nabeen husi ninia liman.+ 15  Iha tempu neʼe, nia hetan kuda-burru aman neʼebé foin mate nia hasan-ruin; nia foti ruin neʼe no uza hodi oho mane naʼin-1.000.+ 16  Tuirmai Sansão hatete: “Ho kuda-burru nia hasan-ruin, haʼu oho sira no tau sira-nia mate-isin hamutuk iha butuk ida, butuk rua! Ho kuda-burru nia hasan-ruin, haʼu oho mane naʼin-1.000.”+ 17  Bainhira Sansão koʼalia hotu tiha, nia soe kuda-burru nia hasan-ruin neʼe no hanaran fatin neʼe Ramat-Lehi.*+ 18  Tuirmai nia sente hamrook tebes, no nia bolu Jeová, hodi dehan: “Ita mak fó salvasaun boot neʼe ba Ita-nia atan. Maibé agora Ita sei husik haʼu atu mate tanba hamrook no monu ba ema neʼebé la hetan sirkunsizaun* nia liman ka?” 19  Entaun Maromak loke rai-kuak ida neʼebé iha Lehi, no bee sai husi ida-neʼe.+ Bainhira nia hemu, ninia forsa* fila fali ba nia no nia sente forte fali. Tan neʼe mak nia hanaran fatin neʼe En-Hakore,* neʼebé sei iha Lehi toʼo ohin loron. 20  Sansão sai juís iha Izraél ba tinan 20 durante tempu neʼebé ema Filístia ukun rai neʼe.+

Nota-rodapé

Ka “ai neʼebé ema kaer no sunu lakan atu fó naroman”.
Ka “kesi”.
Ka “kesi”.
Naran neʼe katak “Fatin aas hasan-ruin nian”.
Naran neʼe katak “Bee-matan husi ida neʼebé bolu”.