Juís 13:1-25

  • Anju ida vizita Manoá no ninia feen (1-23)

  • Sansão moris (24, 25)

13  Dala ida tan ema Izraél halo buat neʼebé aat tuir Jeová nia haree,+ no Jeová entrega sira ba ema Filístia nia liman+ durante tinan 40.  Iha tempu neʼe, iha mane ida neʼebé hela iha sidade Zora,+ nia husi Dan nia umakain.+ Mane neʼe nia naran mak Manoá.+ Ninia feen labele iha oan.+  Loron ida, Jeová nia anju mosu ba feto neʼe no hatete ba nia: “Maski ó labele iha oan, maibé ó sei sai isin-rua no tuur-ahi oan-mane ida.+  Agora ó tenke kuidadu bá atu la hemu tua-uvas ka tua sira seluk,+ no keta han buat neʼebé la moos.+  Ó sei sai isin-rua no tuur-ahi oan-mane ida. Lámina ida labele kona ninia ulun,+ tanba oan neʼe sei sai ema Nazireu ida ba Maromak husi tempu neʼebé nia moris mai,* no nia sei salva ema Izraél husi ema Filístia nia liman.”+  Tuirmai feto neʼe bá fó-hatene ninia laʼen, hodi dehan: “Maromak loos nia atan ida mai hasoru haʼu. Nia haree hanesan Maromak loos nia anju ida, nia kmanek tebes. Haʼu la husu nia mai husi neʼebé, no nia mós la fó-hatene ninia naran mai haʼu.+  Maibé nia hatete mai haʼu: ‘Ó sei sai isin-rua no tuur-ahi oan-mane ida. Agora ó labele hemu tua-uvas ka tua sira seluk, no keta han buat neʼebé la moos, tanba oan neʼe sei sai ema Nazireu ida ba Maromak husi tempu neʼebé nia moris mai* toʼo loron neʼebé nia mate.’”  Manoá husu ho laran ba Jeová, hodi dehan: “Deskulpa Jeová. Favór ida, haruka fali Maromak loos nia atan neʼebé Ita foin haruka mai, atu nia bele mai hodi hanorin ami kona-ba buat neʼebé ami tenke halo ba labarik neʼebé sei moris mai.”  Entaun Maromak loos rona ba Manoá, no anju husi Maromak loos mai fali hasoru Manoá nia feen bainhira nia tuur hela iha rai-luan. Iha momentu neʼe, ninia laʼen Manoá la hamutuk ho nia. 10  Feto neʼe halai lalais no fó-hatene nia laʼen: “Mane neʼebé loron balu liubá mai hasoru haʼu mosu fali ona ba haʼu.”+ 11  Tuirmai Manoá hamriik no bá ho ninia feen. Nia toʼo ba mane neʼe no dehan ba nia: “Ita mak mane neʼebé koʼalia ho haʼu-nia feen ka?” Nia hatán: “Loos duni.” 12  Tuirmai Manoá hatete: “Haʼu hein katak Ita-nia liafuan sei sai loos! Labarik neʼe nia moris sei sai hanesan saida? No serbisu saida mak nia sei halo?”+ 13  Entaun Jeová nia anju hatete ba Manoá: “Ó-nia feen tenke hadook an husi buat hotu neʼebé haʼu fó sai ona ba nia.+ 14  Nia labele han buat naran deʼit neʼebé halo husi uvas-fuan, nia labele hemu tua-uvas ka tua sira seluk,+ no nia labele han buat neʼebé la moos.+ Nia tenke halo tuir buat hotu neʼebé haʼu haruka nia atu halo.” 15  Manoá hatete ba Jeová nia anju: “Favór ida, hein lai iha neʼe. Ami sei prepara bibi-timur oan ida ba Ita atu han.”+ 16  Maibé Jeová nia anju hatete ba Manoá: “Se haʼu hein, haʼu sei la han ó-nia ai-han; maibé se ó hakarak atu hasaʼe sakrifísiu sunu nian ba Jeová, ó bele hasaʼe ida-neʼe.” Manoá la hatene katak nia mak Jeová nia anju. 17  Tuirmai Manoá hatete ba Jeová nia anju: “Ita-nia naran saida,+ atu nuneʼe ami bele hahiʼi Ita bainhira Ita-nia liafuan sai loos?” 18  Maibé Jeová nia anju hatete ba nia: “Tanbasá ó husu haʼu-nia naran? Tuir loloos, naran neʼe mak kmanek loos.” 19  Depois neʼe, Manoá foti bibi-timur oan no sakrifísiu trigu* nian no tau neʼe iha fatuk leten hodi hasaʼe ba Jeová. No Manoá ho ninia feen haree Maromak halo buat neʼebé kmanek loos. 20  Kuandu ahi-lakan saʼe husi altár neʼe ba lalehan, Manoá no ninia feen haree Jeová nia anju saʼe ba leten iha ahi neʼe nia laran. Sira hakneʼak kedas no hakruʼuk ho oin ba rai. 21  Ho ida-neʼe, Manoá foin hatene katak neʼe mak Jeová nia anju.+ No Jeová nia anju la mosu tan ba Manoá no ninia feen. 22  Depois neʼe, Manoá hatete ba nia feen: “Ita sei mate duni, tanba ita haree ona Maromak.”+ 23  Maibé ninia feen dehan ba nia: “Se Jeová hakarak atu oho ita, nia sei la simu sakrifísiu sunu nian+ no sakrifísiu trigu nian husi ita-nia liman, nia sei la hatudu buat hotu neʼe ba ita, no nia sei la fó sai buat hotu neʼe mai ita.” 24  Depois neʼe, feto neʼe tuur-ahi oan-mane ida no hanaran nia Sansão.+ Labarik neʼe sai boot, no Jeová kontinua haraik bensaun ba nia. 25  Liutiha tempu balu, Jeová nia espíritu tun ba nia+ iha Mahane-Dan,+ entre Zora no Estaol.+

Nota-rodapé

Orj., “husi oan-fatin”.
Orj., “husi oan-fatin”.
Neʼe bele refere mós ba sevada. Haree “Sakrifísiu trigu nian” iha Glosáriu.