Juís 12:1-15

  • Konflitu ho ema Efraim (1-7)

    • Koko ho liafuan Xibolet (6)

  • Juís Ibzan, Elon no Abdon (8-15)

12  Tuirmai ema Efraim halibur hamutuk no hakur mota hodi toʼo iha Zafon* no dehan ba Jefte: “Tanbasá mak ó la bolu ami atu bá ho ó bainhira ó halo funu hasoru ema Ammon?+ Ami sei sunu ó-nia uma hamutuk ho ó iha laran.”  Maibé Jefte hatete ba sira: “Haʼu no haʼu-nia ema sira halo funu hasoru ema Ammon. Haʼu bolu duni imi atu ajuda haʼu, maibé imi la salva ami husi sira-nia liman.  Bainhira haʼu haree katak imi la salva haʼu, entaun haʼu tau haʼu-nia moris* iha perigu laran hodi bá halo funu hasoru ema Ammon,+ no Jeová entrega sira ba haʼu. Tanbasá mak agora imi mai atu halo funu hasoru haʼu?”  Tuirmai Jefte halibur mane hotu husi Gilead,+ no sira halo funu hasoru ema Efraim. Mane Gilead sira manán ema Efraim, neʼebé uluk dehan: “Imi ema Gilead, imi hela iha Efraim no Manasés nia leet. Imi mak hanesan refujiadu husi Efraim.”  Ema Gilead manán dalan sira neʼebé uza atu hakur Mota Jordaun+ uluk liu fali ema Efraim. Kuandu mane Efraim sira neʼebé koko atu halai dehan: “Husik haʼu hakur mota neʼe”, mane Gilead sira husu ba ema ida-idak: “Ó mak ema Efraim ka?” Bainhira nia hatán: “Lae!”  sira husu tan: “Favór ida, hatete toʼok Xibolet.” Maibé nia hatán: “Sibolet”, tanba nia labele temi liafuan neʼe ho loloos. Tuirmai sira kaer nia no oho nia iha dalan atu hakur Mota Jordaun. Nuneʼe, ema Efraim naʼin-42.000 mate iha tempu neʼe.  Jefte, ema Gilead, sai juís iha Izraél ba tinan neen, depois neʼe, Jefte mate no ema hakoi nia iha ninia sidade iha Gilead.  Depois nia, Ibzan husi Belein mak sai juís ba Izraél.+  Nia iha oan-mane naʼin-30 no oan-feto naʼin-30. Nia haruka ninia oan-feto sira bá hodi kaben ho mane sira neʼebé laʼós husi ninia suku, no nia lori mai feto naʼin-30 atu kaben ho ninia oan-mane sira. Nia sai juís iha Izraél ba tinan hitu. 10  Tuirmai Ibzan mate no ema hakoi nia iha Belein. 11  Depois nia, Elon, ema Zebulão, mak sai juís iha Izraél ba tinan sanulu. 12  Tuirmai Elon, ema Zebulão, mate no ema hakoi nia iha Aijalon iha rai-Zebulão. 13  Depois nia, Hilel nia oan-mane Abdon, ema Piraton, mak sai juís ba Izraél. 14  Nia iha oan-mane naʼin-40 no bei-oan mane naʼin-30 neʼebé saʼe kuda-burru 70. Nia sai juís iha Izraél ba tinan ualu. 15  Tuirmai Hilel nia oan-mane Abdon ema Piraton, mate no ema hakoi nia iha Piraton iha rai-Efraim iha ema Amalec sira-nia foho.+

Nota-rodapé

Ka karik “hakur ba parte norte”.