Juís 11:1-40

  • Duni sai Jefte, tuirmai husu nia sai ulun-naʼin (1-11)

  • Jefte haruka lia-menon ba ema Ammon (12-28)

  • Jefte nia juramentu no ninia oan-feto (29-40)

    • Jefte nia oan-feto sei la kaben (38-40)

11  Jefte,+ ema Gilead, mak funu-naʼin neʼebé kbiit boot. Nia mak feto-aat* ida nia oan-mane, no Gilead mak Jefte nia aman.  Maibé Gilead nia feen mós tuur-ahi oan-mane sira seluk. No bainhira ninia feen nia oan-mane sira-neʼe sai boot, sira duni sai Jefte no dehan ba nia: “Ó sei la simu liman-rohan iha ami-nia aman nia umakain, tanba ó mak feto seluk nia oan.”  Entaun Jefte halai husi ninia maun-alin sira no hela iha rai-Tob. No mane sira neʼebé la iha serbisu mai apoia Jefte, no sira laʼo tuir nia.  Liutiha tempu balu, ema Ammon halo funu hasoru ema Izraél.+  Bainhira ema Ammon halo funu hasoru ema Izraél, katuas sira husi Gilead bá kedas hodi lori fali Jefte husi rai-Tob.  Sira hatete ba Jefte: “Mai hodi sai ami-nia komandante, atu nuneʼe ita bele halo funu hasoru ema Ammon.”  Maibé Jefte dehan ba katuas sira husi Gilead: “Imi mak odi tebes haʼu toʼo duni haʼu sai husi haʼu-nia aman nia uma,+ loos ka lae? Entaun tanbasá mak agora imi mai hasoru haʼu bainhira imi hetan susar?”  Katuas sira husi Gilead hatete ba Jefte: “Neʼe loos, maibé agora ami fila fali ba ó. Se ó bá hamutuk ho ami no halo funu hasoru ema Ammon, ó sei sai ulun-naʼin ba ema Gilead tomak.”+  Entaun Jefte hatete ba katuas sira husi Gilead: “Se imi lori haʼu fila hodi halo funu hasoru ema Ammon no Jeová entrega sira ba haʼu-nia liman, entaun haʼu sei sai duni imi-nia ulun-naʼin!” 10  Katuas sira husi Gilead hatete ba Jefte: “Jeová mak sei sai sasin* entre ita se ami la halo tuir buat neʼebé ó dehan.” 11  Nuneʼe Jefte bá hamutuk ho katuas sira husi Gilead, no povu neʼe foti nia nuʼudar ulun-naʼin no komandante. No Jefte fó sai fali ninia liafuan hotu iha Jeová nia oin iha Mizpa.+ 12  Tuirmai Jefte haruka ema lori lia-menon ba ema Ammon nia liurai,+ hodi dehan: “Tanbasá mak Ita mai atu halo funu hasoru haʼu iha haʼu-nia rai?” 13  Entaun ema Ammon nia liurai hatán ba ema neʼebé lori Jefte nia lia-menon: “Haʼu mai halo funu tanba ema Izraél hadau haʼu-nia rai bainhira sira sai husi rai-Ejitu,+ sira hadau rai husi Arnon+ toʼo Jabok no toʼo Mota Jordaun.+ Agora entrega fali rai sira-neʼe ba haʼu ho dame.” 14  Maibé Jefte haruka fali ema lori lia-menon ba ema Ammon nia liurai 15  no hatete ba nia: “Neʼe mak buat neʼebé Jefte hatete: ‘Ema Izraél la hadau ema Moab nia rai+ no ema Ammon nia rai,+ 16  tanba iha tempu neʼebé ema Izraél sai husi rai-Ejitu, sira laʼo liu rai-fuik ba Tasi Mean+ no toʼo iha Kades.+ 17  Tuirmai ema Izraél haruka lia-menon ba liurai Edom,+ hodi dehan: “Favór ida, husik ami laʼo liu Ita-Boot nia rai”, maibé liurai Edom lakohi rona. No mós sira haruka lia-menon ba liurai Moab,+ maibé nia lakohi simu. Entaun ema Izraél kontinua hela iha Kades.+ 18  Bainhira sira laʼo iha rai-fuik, sira laʼo liu deʼit ema Edom nia rai+ no ema Moab nia rai. Sira laʼo iha parte leste husi rai-Moab+ no hela iha área Arnon nian; sira la tama iha Moab nia fronteira,+ tanba área Arnon mak Moab nia fronteira. 19  “‘Depois neʼe, ema Izraél haruka lia-menon ba ema Amoreu nia liurai Sihon, neʼebé husi Hesbon, no ema Izraél dehan ba nia: “Favór ida, husik ami laʼo liuhusi Ita-nia rai hodi bá ami-nia rai rasik.”+ 20  Maibé Sihon la fiar ema Izraél no la husik sira laʼo liuhusi ninia rai, entaun Sihon halibur ninia tropa hotu hamutuk iha Jahaz no halo funu hasoru ema Izraél.+ 21  Ho ida-neʼe, Jeová, Izraél nia Maromak, entrega Sihon no ninia ema hotu ba ema Izraél nia liman, nuneʼe ema Izraél manán sira no foti rai hotu husi ema Amoreu, katak ema neʼebé hela iha rai neʼe.+ 22  Nuneʼe sira foti ema Amoreu nia rai hotu husi Arnon toʼo Jabok no husi rai-fuik toʼo Mota Jordaun hodi sai sira-nian.+ 23  “‘Jeová, Izraél nia Maromak, mak duni sai ema Amoreu husi ema Izraél nia oin,+ entaun agora Ita-Boot hakarak duni sai ema Izraél ka? 24  Rai naran deʼit neʼebé Ita-Boot nia maromak Kemos+ fó ba Ita mak Ita-nian, loos ka lae? Entaun, ema hotu neʼebé Jeová, ami-nia Maromak, duni sai ona husi ami-nia oin mak ema sira neʼebé ami sei duni sai.+ 25  No Ita-Boot diʼak liu fali Zipor nia oan-mane Balak,+ liurai husi Moab ka? Nia nunka haksesuk malu ho Izraél, no nunka halo funu hasoru sira, loos ka lae? 26  Bainhira ema Izraél hela iha Hesbon no ninia sidade kiʼik sira,*+ no hela iha Aroer no ninia sidade kiʼik sira no hela iha sidade hotu neʼebé besik mota sira husi Arnon ba tinan 300, tanbasá mak Ita nunka koko atu foti fali rai sira-neʼe durante tempu neʼebá?+ 27  Haʼu la halo sala ida hasoru Ita-Boot, maibé Ita halo sala hodi ataka haʼu. Ohin, Jeová neʼebé nuʼudar Juís+ sei tesi-lia entre povu Izraél ho povu Ammon.’” 28  Maibé ema Ammon nia liurai la rona ba lia-menon husi Jefte. 29  Jeová nia espíritu tun ba Jefte,+ no nia laʼo liuhusi Gilead no Manasés hodi bá Mizpe iha Gilead,+ no husi Mizpe iha Gilead nia kontinua laʼo hodi hasoru ema Ammon. 30  Tuirmai Jefte jura+ ba Jeová no dehan: “Se Ita-Boot entrega ema Ammon ba haʼu-nia liman, 31  entaun ema naran deʼit neʼebé sai husi haʼu-nia uma nia odamatan atu hasoru haʼu bainhira haʼu fila ho dame husi funu hasoru ema Ammon, nia sei sai Jeová nian,+ no haʼu sei hasaʼe nia nuʼudar sakrifísiu sunu nian.”+ 32  Nuneʼe Jefte bá halo funu hasoru ema Ammon, no Jeová entrega sira ba ninia liman. 33  Nia oho sira barak loos husi Aroer toʼo Minit, nia manán sidade 20, no mós nia oho ema barak toʼo Abel-Keramim. Ho ida-neʼe, ema Izraél manán ema Ammon. 34  Ikusmai Jefte fila fali ba ninia uma iha Mizpa,+ no nia haree katak ninia oan-feto mak sai daudaun mai hasoru nia hodi baku hela tamborín no dansa! Neʼe mak ninia oan mesak deʼit. Nia la iha oan-mane ka oan-feto seluk, só oan-feto neʼe deʼit. 35  Bainhira nia haree ninia oan-feto, nia lees ninia roupa rasik no dehan: “Eipá, haʼu-nia oan! Ó halo haʼu-nia laran triste, tanba ó mak sai ida neʼebé haʼu tenke haruka sai. Haʼu loke ona haʼu-nia ibun ba Jeová, no haʼu labele dada fali.”+ 36  Maibé ninia oan-feto hatete ba nia: “Haʼu-nia aman, se Ita promete ona ba Jeová, entaun halo ba haʼu tuir buat neʼebé Ita promete ona,+ tanba Jeová ajuda ona Ita hodi fó kastigu ba Ita-nia inimigu sira, ema Ammon.” 37  Tuirmai nia hatete ba ninia aman: “Halo buat tuirmai neʼe ba haʼu: Husik haʼu mesak ba fulan rua, no haʼu sei laʼo ba área foho nian atu tanis hamutuk ho haʼu-nia kolega feto sira tanba haʼu sei nunka kaben.”* 38  Ho ida-neʼe, Jefte hatete: “Laʼo bá!” Entaun nia haruka ninia oan-feto neʼe sai ba fulan rua, no feto neʼe laʼo ba área foho nian hamutuk ho ninia kolega sira hodi tanis tanba nia sei nunka kaben. 39  Iha fulan rua nia rohan, nia fila fali ba ninia aman, depois neʼe, nia aman kumpre juramentu neʼebé nia halo kona-ba ninia oan-feto.+ Ninia oan-feto neʼe nunka halo relasaun ho mane ida. No iha Izraél, ema iha toman* atu halo buat tuirmai neʼe: 40  Tinan-tinan, feto joven sira husi Izraél bá hodi gaba Jefte, ema Gilead, nia oan-feto. Sira halo neʼe ba loron haat iha tinan ida nia laran.

Nota-rodapé

Ka “prostituta”.
Orj., “ida neʼebé rona”.
Ka “sidade kiʼik sira neʼebé haleʼu”.
Ka “no haʼu sei tanis ba haʼu-nia virjen hamutuk ho haʼu-nia kolega feto sira”.
Ka “ukun-fuan”.