Juís 1:1-36

  • Judá no Simeão manán rai-Kanaan (1-20)

  • Ema Jebus kontinua hela iha Jeruzalein (21)

  • José nia umakain manán Betel (22-26)

  • La duni sai ema Kanaan hotu (27-36)

1  Bainhira Josué mate tiha ona,+ ema Izraél husu ba Jeová,+ hodi dehan: “Husi ami-nia leet, sé mak sei bá uluk hodi halo funu hasoru ema Kanaan?”  Jeová hatán: “Ema Judá mak sei bá uluk.+ Haʼu sei entrega* rai neʼe ba sira-nia liman.”  Tuirmai ema Judá hatete ba sira-nia maun-alin ema Simeão: “Mai hamutuk ho ami hodi bá rai neʼebé ami simu,+ atu halo funu hasoru ema Kanaan. Depois neʼe, ami sei bá hamutuk ho imi iha rai neʼebé imi simu.” Entaun ema Simeão bá hamutuk ho sira.  Kuandu ema Judá bá, Jeová entrega ema Kanaan no ema Perizeu iha sira-nia liman,+ no sira manán mane naʼin-10.000 iha Bezek.  No iha Bezek mak sira hetan Adoni-Bezek, no sira halo funu hasoru nia no manán ema Kanaan+ no ema Perizeu.+  Bainhira Adoni-Bezek halai, sira duni tuir no kaer nia no tesi sai tiha ninia liman-fuan boot no ain-fuan boot.  Tuirmai Adoni-Bezek hatete: “Iha liurai naʼin-70 neʼebé haʼu tesi sai tiha sira-nia liman-fuan boot no ain-fuan boot no sira hili hahán husi haʼu-nia meza okos. Nuneʼe Maromak selu fali ba haʼu tuir buat neʼebé haʼu halo ona.” Depois neʼe, sira lori nia ba Jeruzalein,+ no nia mate iha neʼebá.  Liután neʼe, ema Judá halo funu hasoru Jeruzalein+ no manán sidade neʼe. Sira oho ema iha sidade neʼe ho surik no sunu sidade neʼe.  Depois neʼe, ema Judá tun fali hodi halo funu hasoru ema Kanaan neʼebé hela iha área foho nian, área Negeb no área Sefela.+ 10  Entaun ema Judá bá hodi ataka ema Kanaan neʼebé hela iha Hebron. No sira oho Sesai, Ahiman no Talmai.+ Uluk Hebron nia naran mak Kiriat-Arba. 11  Sira laʼo husi fatin neʼe hodi halo funu hasoru ema Debir.+ Uluk Debir nia naran mak Kiriat-Sefer.+ 12  Tuirmai Caleb+ dehan: “Mane neʼebé ataka Kiriat-Sefer no manán sidade neʼe, haʼu sei fó haʼu-nia oan-feto Aksa ba nia atu sai ninia feen.”+ 13  No Kenaz nia oan-mane Otniel+ mak manán sidade neʼe. Kenaz+ mak Caleb nia alin-mane. Entaun Caleb fó ninia oan-feto Aksa ba Otniel atu sai ninia feen. 14  Bainhira Aksa fila daudaun ba uma, nia obriga ninia laʼen atu husu ninia aman Caleb atu fó toʼos ida. Tuirmai Aksa tun husi ninia kuda-burru.* Caleb husu nia: “Ó hakarak saida?” 15  Aksa hatán: “Favór ida, fó bensaun ba haʼu, tanba Ita fó ona rai ida iha parte súl;* entaun fó mós Gulot-Maim.”* Ho ida-neʼe, Caleb fó Gulot Leten no Gulot Kraik ba nia. 16  No Moisés nia banin-mane+ nia bei-oan sira, katak ema Keneu,+ sira sai husi sidade ai-palmeira nian+ hamutuk ho ema Judá hodi bá rai-fuik Judá nian iha Arad nia sorin parte súl.+ Sira bá fatin neʼe no hela iha povu nia leet.+ 17  Maibé ema Judá kontinua laʼo hamutuk ho sira-nia maun-alin ema Simeão, no sira ataka ema Kanaan neʼebé hela iha Zefat no harahun sidade neʼe.+ Nuneʼe sira hanaran sidade neʼe Horma.*+ 18  Tuirmai ema Judá manán sidade Gaza,+ Askelon+ no Ekron+ ho rai sira neʼebé haleʼu sidade sira-neʼe. 19  Jeová hamutuk ho ema Judá, no sira foti área foho nian, maibé sira la iha kbiit atu duni sai ema neʼebé hela iha rai-tetuk, tanba ema sira-neʼe iha kuda-karreta funu nian ho roda neʼebé iha surik.*+ 20  Sira fó Hebron ba Caleb, hodi tuir buat neʼebé Moisés promete ona,+ no Caleb duni sai Anac nia oan-mane naʼin-tolu husi fatin neʼe.+ 21  Maibé ema Benjamim la duni sai ema Jebus neʼebé hela iha Jeruzalein, tan neʼe ema Jebus kontinua hela ho ema Benjamim iha Jeruzalein toʼo ohin loron.+ 22  No José nia umakain+ mós bá halo funu hasoru sidade Betel, no Jeová hamutuk ho sira.+ 23  José nia umakain bá atu hafuhu Betel. No uluk Betel nia naran mak Luz.+ 24  No sira neʼebé hafuhu rai neʼe, haree mane ida laʼo sai husi sidade. Nuneʼe sira dehan ba nia: “Favór ida, hatudu ba ami dalan atu tama ba sidade, no ami sei hatudu laran-diʼak* ba ó.” 25  Entaun, mane neʼe hatudu dalan atu tama ba sidade, no sira oho ema iha sidade neʼe ho surik, maibé sira husik mane neʼe no ninia família tomak livre.+ 26  Mane neʼe laʼo ba ema Hetes nia rai no harii sidade ida no hanaran sidade neʼe Luz, no neʼe mak sidade neʼe nia naran toʼo ohin loron. 27  Ema Manasés la foti Bet-Sean no ninia sidade kiʼik sira,* Taanak+ no ninia sidade kiʼik sira, ema neʼebé hela iha Dor no ninia sidade kiʼik sira, ema neʼebé hela iha Ibleam no ninia sidade kiʼik sira, no ema neʼebé hela iha Megido no ninia sidade kiʼik sira.+ Ema Kanaan kontinua hela iha rai neʼe. 28  Kuandu ema Izraél sai forte ona, sira obriga ema Kanaan atu halo serbisu nuʼudar atan,+ maibé ema Izraél la duni sai sira hotu.+ 29  Ema Efraim mós la duni sai ema Kanaan neʼebé hela iha Gezer. Ema Kanaan kontinua hela iha sira-nia leet iha Gezer.+ 30  Ema Zebulão la duni sai ema neʼebé hela iha Kitron no mós ema neʼebé hela iha Nahalol.+ Ema Kanaan kontinua hela iha sira-nia leet no serbisu nuʼudar atan.+ 31  Ema Aser la duni sai ema neʼebé hela iha Ako no mós ema neʼebé hela iha Sidon,+ Alab, Akzib,+ Helba, Afik+ no Reob.+ 32  Entaun, ema Aser kontinua hela iha ema Kanaan nia leet iha rai neʼe, tanba sira la duni sai ema Kanaan. 33  Ema Naftali la duni sai ema neʼebé hela iha Bet-Semes no mós ema neʼebé hela iha Bet-Anat,+ maibé sira kontinua hela iha ema Kanaan nia leet iha rai neʼe.+ No ema iha Bet-Semes no Bet-Anat halo serbisu nuʼudar atan ba sira. 34  Ema Amoreu la husik ema Dan tun ba rai-tetuk, tan neʼe ema Dan hela deʼit iha área foho nian.+ 35  Entaun ema Amoreu kontinua hela iha Foho Heres, Aijalon+ no Saalbim.+ Maibé bainhira José nia umakain sai forte* ona, sira obriga ema Amoreu atu halo serbisu nuʼudar atan. 36  Ema Amoreu nia rai mak husi dalan neʼebé saʼe ba Akrabim,+ hahú husi Sela toʼo foho sira.

Nota-rodapé

Ka “Haʼu entrega ona”.
Ka karik “Aksa basa liman kuandu iha kuda-burru leten hela”.
Ka “área Negeb”.
Naran neʼe katak “Basia bee nian”.
Naran neʼe katak “Buat neʼebé tenke harahun tiha”.
Orj., “kuda-karreta funu nian neʼebé halo husi besi”.
Orj., “hatudu domin neʼebé laran-metin”.
Ka “sidade kiʼik sira neʼebé haleʼu”.
Ka “José nia umakain nia liman sai forte”.