Josué 8:1-35

  • Josué haruka tropa balu subar atu ataka Ai (1-13)

  • Izraél manán Ai ho susesu (14-29)

  • Josué lee Ukun-Fuan ba povu iha Foho Ebal (30-35)

8  Tuirmai Jeová dehan ba Josué: “Labele sai taʼuk ka nakdedar.+ Lori tropa hotu hamutuk ho ó no saʼe bá hodi ataka sidade Ai. Haree bá, haʼu entrega ona liurai Ai, ninia povu, ninia sidade no ninia rai ba ó-nia liman.+  Halo ba sidade Ai no ninia liurai hanesan buat neʼebé imi halo ona ba Jerikó no ninia liurai,+ maibé agora, imi bele foti sidade neʼe nia sasán sira no lori ninia animál-hakiak sira nuʼudar imi-nian. Haruka tropa balu subar iha sidade nia kotuk hodi prontu atu ataka.”  Entaun Josué no tropa hotu saʼe bá hodi ataka sidade Ai. Josué hili funu-naʼin sira neʼebé kbiit boot hamutuk naʼin-30.000 no haruka sira bá iha kalan.  Nia fó mandamentu tuirmai neʼe ba sira: “Imi tenke subar iha sidade neʼe nia kotuk hodi prontu atu ataka. Keta subar dook loos husi sidade, no imi hotu tenke sai prontu.  Haʼu no ema hotu neʼebé hamutuk ho haʼu sei hakbesik ba sidade neʼe, no bainhira sira sai mai atu ataka ami hanesan uluk,+ ami sei hakiduk husi sira.  Kuandu sira sai mai hodi duni tuir ami, ami sei lohi sira sai husi sidade neʼe, tanba sira sei dehan: ‘Ema sira-neʼe halai ona husi ita hanesan uluk.’+ No ami sei hakiduk husi sira.  Tuirmai imi tenke hamriik husi imi-nia subar-fatin no ataka sidade neʼe; Jeová, imi-nia Maromak, sei entrega sidade neʼe ba imi.  Bainhira imi manán ona, imi tenke sunu sidade neʼe.+ Imi tenke halo tuir Jeová nia liafuan. Ida-neʼe mak haʼu-nia mandamentu.”  Depois neʼe, Josué haruka sira bá, no sira laʼo ba fatin neʼebé sira subar hodi prontu atu ataka; sira subar entre Betel no Ai, iha parte oeste husi Ai, maibé Josué hela kalan neʼe hamutuk ho povu. 10  Josué hadeer sedu iha dadeer no halibur tropa sira, depois neʼe, nia no Izraél nia katuas sira lori tropa sira ba Ai. 11  Tropa sira hotu+ neʼebé hamutuk ho nia laʼo hodi hakbesik ba sidade neʼe nia oin. Sira hela iha parte norte husi Ai, no foho-leet deʼit mak haketak sira no sidade Ai. 12  Nia mós hili ona mane naʼin-5.000 no haruka sira subar+ entre Betel+ no Ai, iha parte oeste husi sidade neʼe. 13  Nuneʼe tropa barak liu halo sira-nia hela-fatin iha parte norte husi sidade neʼe+ no tropa balu neʼebé subar atu ataka mak iha parte oeste husi sidade neʼe,+ no iha kalan neʼe Josué tun ba rai-tetuk neʼebé iha klaran. 14  Bainhira liurai Ai haree ida-neʼe, nia no mane sira husi sidade neʼe ansi hodi sai sedu iha dadeer atu funu hasoru ema Izraél iha fatin ida neʼebé hateke tun ba rai-tetuk maran. Maibé nia la hatene katak iha tropa neʼebé subar hela iha sidade nia kotuk atu ataka sidade neʼe. 15  Bainhira ema Ai ataka, Josué no ema Izraél hotu halai tuir dalan ba rai-fuik.+ 16  Tan neʼe povu hotu iha sidade laran halibur hamutuk hodi duni tuir sira; no sira duni tuir Josué toʼo sira sai dook liután husi sidade neʼe. 17  La iha mane ida mak sei hela iha sidade Ai no Betel, sira hotu sai hodi duni tuir ema Izraél. Sira husik sira-nia sidade nia portaun loke luan no duni tuir ema Izraél. 18  Tuirmai Jeová hatete ba Josué: “Lolo ó-nia diman ba sidade Ai,+ tanba haʼu sei entrega sidade neʼe ba ó.”+ Entaun Josué lolo ninia diman ba sidade neʼe. 19  Iha tempu neʼebé nia lolo liman, tropa neʼebé subar hela hamriik kedas husi sira-nia fatin no halai tama ba sidade no manán sidade neʼe. Sira sunu kedas sidade neʼe.+ 20  Bainhira mane sira husi Ai fila oin, sira haree suar saʼe husi sidade neʼe, no sira la iha ona kbiit atu halai ba fatin ida. Tuirmai tropa Izraél neʼebé halai daudaun ba rai-fuik, fila hodi ataka ema neʼebé duni tuir sira. 21  Bainhira Josué no ema Izraél hotu haree katak tropa neʼebé subar hela manán ona sidade neʼe no haree suar saʼe husi sidade neʼe, sira fila hodi ataka kedas mane sira husi Ai. 22  Kona-ba tropa neʼebé manán ona sidade, sira sai husi sidade neʼe hodi ataka mane sira husi Ai, nuneʼe mane sira-neʼe mak iha klaran no labele halai. Ema Izraél iha sira-nia kotuk no oin, no oho mane sira husi Ai toʼo la iha tan ema ida mak moris ka halai.+ 23  Maibé sira kaer moris liurai Ai+ no lori nia ba Josué nia oin. 24  Bainhira ema Izraél oho hotu ona ema Ai neʼebé duni tuir sira iha rai-fuik, no sira hotu mate ona ho surik, tuirmai ema Izraél hotu fila fali ba sidade Ai no oho ema seluk iha sidade ho surik. 25  Ema hotu neʼebé mate iha loron neʼe, mane no feto, hamutuk naʼin-12.000, katak ema Ai hotu. 26  Josué la dada fali ninia diman+ neʼebé iha ninia liman toʼo nia halakon hotu ema Ai sira.+ 27  Maibé, ema Izraél foti animál-hakiak no sasán sira husi sidade neʼe, hodi halo tuir orden neʼebé Jeová fó ona ba Josué.+ 28  Tuirmai Josué sunu sidade Ai no sidade neʼe sai rahun ba nafatin,+ no neʼe sei rahun toʼo ohin loron. 29  Nia tara liurai Ai iha ai-riin* ida toʼo lokraik, no bainhira loro-matan besik atu tun ona, Josué haruka atu hatún liurai neʼe nia mate-isin husi ai-riin.+ Depois neʼe, sira soe nia iha sidade nia portaun no hada fatuk butuk boot iha ninia leten, no neʼe sei iha toʼo ohin loron. 30  Iha tempu neʼe mak Josué harii altár ida ba Jeová, Izraél nia Maromak, iha Foho Ebal,+ 31  hodi halo tuir Jeová nia atan Moisés nia mandamentu ba ema Izraél, hanesan hakerek ona iha livru Moisés nia Ukun-Fuan,+ neʼebé dehan: “Halo altár hodi uza fatuk sira neʼebé tomak, neʼebé la fera ho besi.”+ Sira hasaʼe sakrifísiu sunu nian no sakrifísiu dame nian ba Jeová iha altár neʼe nia leten.+ 32  Tuirmai Josué hakerek fali Ukun-Fuan+ neʼebé Moisés hakerek ona iha ema Izraél nia oin+ iha fatuk sira-neʼe. 33  Ema Izraél hotu, sira-nia katuas, ulun-naʼin no juís sira hamriik iha Arka nia sorin-sorin iha amlulik Levi sira-nia oin, katak amlulik sira neʼebé lori Jeová nia Arka Aliansa nian. Ema estranjeiru no ema Izraél hotu+ mós iha neʼebá. Sira sorin balu hamriik iha Foho Gerizim nia oin, no sorin balu seluk hamriik iha Foho Ebal nia oin+ atu fó bensaun ba povu Izraél, hodi halo tuir Jeová nia atan Moisés nia mandamentu.+ 34  Depois neʼe, Josué lee ho lian makaʼas liafuan hotu husi Ukun-Fuan neʼe,+ bensaun+ no malisan sira,+ hodi tuir liafuan hotu neʼebé hakerek ona iha livru Ukun-Fuan nian. 35  Liafuan hotu neʼebé Moisés hakerek, Josué lee ho lian makaʼas iha kongregasaun* Izraél hotu nia oin,+ neʼe inklui mós feto, labarik no ema estranjeiru sira+ neʼebé hela* iha sira-nia leet.+

Nota-rodapé

Ka “ai-hun”.
Orj., “laʼo”.